Abashakashatsi bagiye gukora igerageza ry’umuti wa Auceliciclib ushobora kuvura kanseri y’ubwonko

Yanditswe na Ntabareshya Jean de Dieu
Kuya 5 Gashyantare 2021 saa 10:11
Yasuwe :
0 0

Abashakashatsi bo muri Kaminuza ya Australie y’Amajyepfo (UniSA) batangaje ko bagiye gukora igerageza ry’umuti wa Auceliciclib wagaragaje ubushobozi bwo kuba wavura kanseri y’ubwonko yitwa Glioblastoma, imwe mu zigoye kuvura kurusha izindi ndetse ikaba itanagira umuti n’umwe magingo aya.

Wang Shudong Ushinzwe ibikorwa byo gushaka imiti no kuyigerageza muri UniSA, yatangaje ko mu bushakashatsi bw’ibanze bakoze, basanze umuti wa Auceliciclib waratanze ibisubizo byiza kuri kanseri y’ubwonko ya glioblastoma mu nyamaswa.

Yongeyeho ko iyi ari inkuru nziza kuko ubusanzwe kuvura kanseri zo mu bwonko bigora, kuko hari imiti mike ishobora kugera mu gice cy’ubwonko kirwaye, akenshi igira izindi ngaruka zikomeye ku buzima.

Ku rundi ruhande, kanseri z’ubwonko ziri mu zica abazirwaye vuba ari iyi ya Glioblastoma ikaba ifite umwihariko wo kwica 95% by’abayirwaye mu gihe kitarenze imyaka itanu.

Wang yavuze ko umuti wa Auceliciclib wamaze kugaragaza ubushobozi bwo kugera ku gice cy’ubwonko kirwaye kanseri mu buryo bworoshye, ndetse ikaba inashobora kukivura mu buryo butanga umusaruro wihuse.

Ati “Uyu muti ufasha mu kugera ku gice kirwaye mu buryo bwiza ndetse ikanawuvura mu buryo bworoshye, butanga umusaruro mu gihe gito".

Yongeyeho ko abarwayi bo mu gace iyi kaminuza irimo ari bo ba mbere bazabanza gupimwa, ati “Iri rizaba ari igeragezwa rya mbere ry’uyu muti ku Isi yose mu kandi nshimishijwe cyane n’uko abarwayi bari mu gice iyi kaminuza irimo bazaherwaho muri ubwo buvuzi".

Umuti wa Auceliciclib uramutse utanze umusaruro witezwe, ushobora kuzaba urufunguzo rw’indi miti ishobora kuvura kanseri y’ibihaha ndetse n’ibere mu minsi iri imbere.

Glioblastoma ni kanseri y'ubwonko yica 95% by'abayirwaye mu gihe kitarenze imyaka itanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .