Abarinzi ba Perezida Paul Biya bakatiwe n’urukiko rwo mu Busuwisi

Yanditswe na IGIHE
Kuya 4 Nyakanga 2019 saa 10:30
Yasuwe :
0 0

Urukiko rwo mu Busuwisi rwahaye ibihano bisubitse abarinzi ba Perezida wa Cameroun, Paul Biya nyuma yo gusagarira umunyamakuru.

Abo barinzi bari batawe muri yombi i Geneve kuri uyu wa Kabiri.

Ikinyamakuru cyo mu Busuwisi Tribune Geneve cyatangaje ko kuri uyu wa Gatatu abantu batandatu bagaragaye mu rukiko barimo umugore umwe waje kurekurwa nyuma kubera ko yari afite pasiporo y’abadipolomate.

Ikirego cyatanzwe n’umunyamakuru ukorera Radio Télévision Suisse (RTS), avuga ko yasagariwe mu cyumweru gishize n’abarinzi ba Perezida Paul Biya ubwo yakurikiranaga imyigaragambtyo y’abatavuga rumwe na Leta ya Biya.

Itangazo ryasohowe n’ubuyobozi bwo mu Busuwisi rivuga ko uwo munyamakuru yakomerekejwe ndetse n’ibikoresho bye bikangizwa.

Abo barinzi bahawe ibihano bisubitse by’amezi atatu ariko bahita barekurwa.

Perezida Paul Biya amaze imyaka 36 ayobora Cameroun ndetse umwaka ushize yatorewe indi manda y’imyaka irindwi.

Akunze kunengwa n’abatavuga rumwe na we kubwo kuba umunyagitugu no gusesagura umutungo wa Leta kubera ingendo nyinshi ahoramo hanze y’igihugu.

Raporo yakozwe n’abanyamakuru yagaragaje ko mu 2017, Perezida Biya yamaze iminsi 60 hanze y’igihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza