Kwamamaza

Abanyabyaha 135 barimo abanyarwanda bari muri paradizo mu Bwongereza

Yanditswe kuya 14-09-2016 saa 21:58' na Jean Louis Uwishyaka


Ibinyamakuru binyuranye byandikirwa mu Bwongereza, biravuga ko abanyabyaha bakomeye 135 bo mu bihugu by’amahanga birimo n’u Rwanda basa n’abemerewe kwibera muri iki gihugu bitewe n’uko ngo bamenyekanye ko hari ibyaha by’intambara bakurikiranyweho ariko ntibafatwe.

Ibinyamakuru birimo Daily Mail na Express byombi byo mu Bwongereza, byanditse bivuga ko abantu 135 bakurikiranyweho ibyaha by’intambara, iby’iyica rubozo ndetse n’ibya Jenoside ngo bananiwe gusubizwa mu bihugu byabo kugira ngo baburanishwe ku byaha basize bakozemo, ahubwo ngo bagakomeza kwibera muri iki gihugu nta nkomyi.

Aba bantu bose[batatangajwe amazina] ngo basize bakoze ibyaha by’ubwicanyi mu bihugu birimo u Rwanda, Afghanistan, Libya, Serbia ndetse na Sli Lanka.

Aba banyabyaha ngo bageze muri iki gihugu basaba ubwenegihugu bw’u Bwongereza mu myaka itatu itandukanye, barabwimwa bitewe n’uko ngo babakekagaho ibyaha by’ubwicanyi, gusa ariko ngo Leta y’iki gihugu yatereye agati mu ryinyo ntiyabata muri yombi.

Ibi binyamakuru bivuga ko mu mwaka wa 2013 abantu 43 batse ubwenegihugu bw’u Bwongereza, mu 2014 ababwatse bagera kuri 50 abandi 40 babwatse mu 2015, gusa aba bose ngo barabwimwe bitewe n’uko bakekwagwaho ibyaha by’ubwicanyi.

Gusa ariko muri abo bose ngo nta n’umwe wigeze ushyikirizwa inzego zibishinzwe kugira ngo asubizwe iwabo akurikiranwe kuri ibi byaha.

Ibi byatumye abaharanira uburenganzira bwa muntu baburira iki gihugu ko gishobora kuzaba ’Ijuru ritekanye’ (safe heaven) ku bakoze ibyaha by’intambara mu gihe ntacyaba gikozwe ngo bikosorwe.

Abashinzwe abinjira n’abasohoka ngo amakosa yarakozwe

Umuvugizi w’ikigo cy’abinjira n’abasohoka ndetse no kurwanya iterabwoba muri iki gihugu, yavuze ko bazamenyesha inzego z’umutekano muri iki gihugu ibyemezo byose bidahwitse byafashwe n’abo muri iki kigo kubera ibi birego by’ibyaha by’intambara, Jenoside ndetse n’iyicarubozo, bitewe n’uko ngo ibi byaha bikorerwa hirya no hino ku isi byazatuma iki gihugu gifatwa nk’uburuhukiro ku babikora.

Ababikurikiranira hafi bibaza impamvu ibi byakozwe kuko ngo ntabwo byumvikana ukuntu aba bantu (abanyabyaha) bemerewe gusaba ubwenegihugu bakigera muri iki gihugu mu gihe ubundi bisaba umuntu byibura kuba amaze imyaka itanu aba mu Bwongereza.

Allan Hogarth, Umuyobozi ushinzwe ibikorwa n’ubuvugizi mu muryango Amnesty International,ishami ryawo ryo mu Bwongereza, yavuze ko imibare y’aba bantu iteye ubwoba ndetse ko bitumvikana ukuntu bamenyekanye ubwo basabaga ubwenegihugu ariko ntihagire igikorwa ngo bajyanwe mu nkiko.

Yagize ati "Niba hari impamvu zifatika zigaragaza ko umuntu yagize uruhare mu byaha by’intambara, ibyibasiye inyokomuntu, ibya Jenoside mu bihugu by’amahanga, birakwiye ko ikigo cy’abinjira n’abasohoka kimenyesha polisi n’ubushinjacyaha kuko ari bo bafite izo nshingano zo kubakurikirana."

Yakomeje agira ati "Ntabwo dushobora kureka u Bwongereza buhinduka ubuhungiro bw’abakoze ibyaha by’intambara. Ababishinzwe bakwiye gusobanura uko byagenze hano ndetse n’ingamba zihari zo kugeza ibi birego mu bushinjacyaha kugira ngo bikorerwe iperereza."

Abashinzwe kurengera abakorewe iyicarubozo basaba polisi y’u Bwongereza gukora iperereza ku bantu bose bakekwaho kugira uruhare mu byaha by’intambara aho bari hose.

Leta iti ’Ntabwo Ubwongereza buzaba Ijuru ku banyabyaha

Leta y’u Bwongereza yatangaje ko idashobora kwemera ko iki gihugu cyaba ubuturo butekanye kuri aba bantu. Bavuga ko nta bimenyetso bihagije bari bafite gusa ngo bamaze kwiha intego z’uko nta muntu ukekwaho ibyaha by’intambara uzongera guhabwa ubwenegihugu cyangwa ngo yemererwe ubuhunzi.

Ubundi itegeko ry’abarengera uburenganzira bwa muntu rivuga ko nta muntu woherezwa mu gihugu cye mu gihe atizeye umutekano we, gusa ntibitangazwa niba n’aba ngaba ari yo mpamvu batasubijwe mu bihugu byabo banakoreyemo ibyaha bakekwaho.

U Bwongereza ni kimwe mu bihugu byanze kohereza abanyarwanda bakekwaho ibyaha bya Jenoside mu Rwanda, nk’aho mu 2015, umucamanza wo mu Bwongereza yateye utwatsi ibyo kohereza mu Rwanda abagabo batanu b’abanyarwanda bahungiye muri iki gihugu, barimo Vincent Bajinya wiyise Vincent Brown, Charles Munyaneza, Emmanuel Nteziryayo, Celestin Ugirashebuja na Celestin Mutabaruka bose bakurikiranyweho ibyaha bya Jenoside, avuga ko mu Rwanda batahabonera ubutabera buboneye.

Ibi byabaye nyuma y’uko mu 2013, Leta y’u Rwanda yasabye ko aba bagabo bakoherwa kuburanira mu Rwanda igaragaza ko ibakurikiranyeho uruhare muri Jenoside yakorewe Abatutsi mu 1994.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved