00:00:00 IGIHE NETWORK KN KINYARWANDA EN ENGLISH FR FRANCAIS

Abantu 100.000 bazize imiti irenze igipimo, umudepite muri USA yasabiwe igihano gikomeye…ay’ingenzi mu mahanga

Yanditswe na IGIHE
Kuya 18 Ugushyingo 2021 saa 11:43
Yasuwe :
0 0

Inteko Ishinga Amategeko, Umutwe w’Abadepite muri Leta Zunze Ubumwe za Amerika, yemeje igihano cy’umudepite w’Umu-Républicain, washyize kuri Twitter ‘cartoon’ imugaragaza nk’uri kurwanya Aba-Démocrates afite inkota.

Paul Gosar byemejwe n’abadepite bagenzi be ko akurwa mu nshingano ze.

Cartoon yashyize kuri Twitter yahize ayisiba, Aba-Démocrates bakaba bavuze ko yatumye hari abantu bibasira Perezida Joe Biden n’Umudepite witwa Alexandria Ocasio-Cortez.

Ibi bibaye nyuma y’amezi 10 abashyigikiye Umu-Républicain Donald Trump wahoze ari Perezida bigabije Inteko bashaka kuburizamo intsinzi ya Biden wari umaze gutorwa nk’umukuru w’igihugu.

Umudepite muri Amerika yafatiwe ibihano nyuma yo gusakaza ubutumwa bumugaragaza nk'uwibasiye Aba-Démocrates

====================================================

U Budage: Ubwandu bwa Covid-19 bwongeye kuzamuka

Ubwandu bwa Covid-19 bwongeye kuzamuka mu Budage mu gihe no mu bindi bihugu by’i Burayi hagiye hafatwa ingamba zitandukanye zigamije kurinda ko imibare y’abandura yakomeza gutumbagira.

Nko ku wa Gatatu, abantu 52.826 ni bo banduye Covid-19 mu Budage.

U Bubiligi bwatangaje ko bwafashe ingamba zitandukanye hirindwa ko bwakwinjira muri Guma mu Rugo.

Muri izo ngamba harimo ko abantu birinda kwegerana nk’uko Minisitiri w’Intebe Alexander De Croo, yabivuze.

Abana bategetswe kwambara agapfukamunwa kuva ku bafite imyaka 10 ugereranyije n’ingamba zari zisanzwe kuko byaheraga ku bafite imyaka 12.

Gukorera mu ngo bigiye kuba itegeko guhera ku wa Gatandatu bikazajya bikorwa iminsi ine mu cyumweru ndetse kwinjira mu nyubako za sinema n’ingoro ndangamurage bizajya bisaba ko umuntu yerekana uruhushya.

Ikindi ni uko urukingo rwa gatatu ruzatangwa ku Babiligi bose guhera muri Mata 2022.

Ibindi bihugu byagiye bifata ingamba zitandukanye zo kugabanya ubwandu bwa Covid-19 birimo Autriche yashyizeho Guma mu Rugo ku baturage bagera kuri miliyoni ebyiri batarakingirwa ku wa Mbere w’iki cyumweru.

U Buholandi bwashyizeho Guma mu Rugo mu bice bimwe na bimwe mu gihe Suède igiye kujya isaba icyemezo cy’uko umuntu yakingiwe uhereye ku itariki ya 1 Ukuboza ku bajya mu bitaramo n’ibindi birori byitabirwa n’abarenga 100.

Muri Tchèque umuntu utarakingiwe cyangwa uterekanye ko yakize Covid-19 ntazajya yemererwa kujya ahahurira abantu benshi cyangwa guhabwa serivisi ndetse no kwipimisha ntabwo bizaba bihagije uhereye ku wa Mbere.

Mu Budage ubwandu bwa Covid-19 bwongeye kuzamuka

====================================================

Amerika: Bwa mbere abishwe no kunywa imiti irenze igipimo bageze ku 100.000

Abarenga ibihumbi 100 bishwe no kunywa imiti irenze igipimo muri Amerika mu mezi 12 yarangiye muri Mata 2021.

Ikigo gishinzwe kurwanya Indwara muri Amerika ku wa Gatatu cyatangaje ko kunywa imiti irengeje igipimo bimeze nk’ibyabaye icyorezo kiri mu bihitana ubuzima bw’abantu benshi.

Iyi mibare yiyongereyeho 28,5% ugereranyije n’uko byari bimeze mu mwaka wabanje ndetse imaze kwikuba kabiri kuva mu myaka itanu ishize.

Abahitanwa no kunywa imiti irengeje urugero muri Amerika bakomeje kwiyongera

====================================================

Canada yatangaje ibihe bidasanzwe kubera ingaruka z’ibiza

Mu Ntara ya British Columbia muri Canada hashyizweho ibihe bidasanzwe bitewe n’ibiza byasize ibice byinshi biri mu bwigunge kubera icika ry’imihanda n’inzira za gari ya moshi.

Abasirikare muri iki gihugu bari koherezwa gufasha ibihumbi by’abantu babuze uko bava aho bari kubera ingaruka z’imvura y’amahindu yaguye ku wa Gatandatu w’icyumweru gishize.

Minisitiri w’Intebe, Justin Trudeau, yasabye ubufasha ubwo yasuraga Washington DC avuga ko igisirikare kizagira uruhare mu gusana ibyangiritse.

BBC yatangaje ko ibi biza byahitanye umugore umwe wagwiriwe n’inkangu ariko ko hari abandi babiri baburiwe irengero.

Ibiza byakomotse ku mvura n'imyuzure byatumye Canada itangaza ibihe bidasanzwe muri British Columbia

===================================================

Turikiya yafunguye umugabo n’umugore we b’Abanya-Israel yashinjaga ubutasi

Umugabo n’umugore we b’Abanya-Israel bari bamaze icyumweru bafungiye muri Turikiya bashinjwa ubutasi barekuwe.

Mordi na Natali Oknin bafashwe ubwo basuraga inyubako ndende kurusha izindi muri Istanboul yitwa Camlica Tower yari iherutse gufungurwa. Barekuwe kuri uyu wa Kane.

Urukiko rwabashinje icyaha cy’ubutasi bwa politiki n’igisirikare ubwo bafataga amafoto y’icumbi rya Perezida Recep Tayyip Erdogan.

Umunya-Turikiya wari kumwe n’iyi ‘couple’ na we yafashwe ashinjwa ibyaha bimwe n’iby’abo banyamahanga.

Umunya-Israel n'umugore we bari bafungiye muri Turikiya barekuwe

====================================================

Inzovu yapfuye nyuma yo gucika ½ cy’umutonzi wayo

Icyana cy’inzovu cyapfuye nyuma yo gufatwa mu mutego w’abahigi wakomerekeje bikomeye umutonzi wacyo muri Indonesie.

Iyi nzovu y’umwaka umwe ikimara gufatwa n’umutego ishyo yari irimo ryahise riyisiga abaturage baza kuyibona maze ijyanwa kuvuzwa.

Ubuyobozi bwa pariki bwavuze ko bwagerageje gukiza ubuzima bwayo binyuze mu kuyica umutonzi ariko biyiviramo kwicwa n’ibikomere nyuma y’iminsi ibiri.

Inzovu z’ingabo zikunda guhigwa na ba rushimusi bitewe n’uko amahembe yazo agurishwa akayabo ku masoko atemewe.

Icyana cy'inzovu cyapfuye nyuma yo gufatwa mu mutego kigacika umutonzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .