Abakinnyi b’Abanya-Thaïlande baheze mu buvumo bandikiye ababyeyi babo ibaruwa yuje amarangamutima

Yanditswe na Evariste Nsengimana
Kuya 8 Nyakanga 2018 saa 08:54
Yasuwe :
0 0

Abakinnyi 12 b’ikipe y’ingimbi y’umupira w’amaguru yo muri Thaïlande baheze mu buvumo, bandikiye ababyeyi babo ibaruwa yuje amarangamutima, babahumuriza, bababwira ko bameze neza.

Ni igikorwa bakoze ku nshuro ya mbere kuva baburirwa irengero ku wa 23 Kamena 2018, ubwo binjiraga mu buvumo buri mu Ntara ya Chiang Rai bagiye gutembera nk’uko byari bisanzwe iyo habaga humutse, nyuma yo gutembereramo, hakagwa imvura nyinshi igasiba inzira babuze uko basohoka.

Aba bana b’abahungu bari hagati y’imyaka 11 na 16 n’umutoza wabo w’imyaka 25, babonetse ari bazima nyuma y’iminsi icyenda, bagezwaho ibiribwa n’imiti nyuma y’iminsi 10 nta cyo bashyira ku munwa.

BBC yanditse ko kuri uyu wa gatanu aribwo babashije kwandikira ababyeyi babo amabaruwa yandikishije ikaramu, umushoferi w’Umwongereza ayabagezaho kuri uyu wa gatandatu, Guverinoma ihita iyashyira ku rukuta rwayo rwa Facebook.

Umwe mu bana yanditse ati "Ntimugire ikibazo, turakomeye.” akomeza atera urwenya ati “Mwarimu wacu, ntuduhe imikoro myinshi.”

Mugenzi we witwa Pong yagize ati "Ntimumpangayikire, ndarinzwe, meze neza.”

Umutoza wabo wari wabajyanye mu butembere, Ekkapol Chantawong, yihanganishije ababyeyi anabasaba imbabazi ko atariwe byaturutseho.

Ati "Bakundwa mwese babyeyi b’aba bana, ubu bose bameze neza. Ikipe y’abatabazi batwoherereje iri kutwitaho neza kandi ndabasezeranya ko nzakomeza kwita ku bana uko nshoboye kose, kandi mbikuye ku mutima, babyeyi b’abana mumbabarire."

Nubwo uyu mutoza yanditse asaba imbabazi ababyeyi akeka ko bamurakariye, bamwe muri bo banditse kuri ubwo butumwa Guverinoma yashyize kuri Facebook, bamubwira ko nta kosa yakoze nabo ntacyo bamushinja.

Umwe yanditse ati "Ba Mama na ba Papa b’abana ntabwo bakurakariye. Warakoze gukomeza kwita ku bana.”

Undi ati “Mubwire umutoza Ake, muti ‘Ntutekereze byinshi. Ntabwo twigeze tukurakarira.”

Uretse kuba abo bana baragejejweho ubutabazi bw’ibanze nk’imiti, ibiribwa n’umwuka, ibindi bikorwa by’ubutabazi byakomeje kubagezwaho ariko ku wa Gatanu, batashywe n’ubwoba ubwo uwahoze ari umushoferi w’umunya-Thailand yapfiragamo abagemuriye umwuka.

Abakinnyi 12 b’ikipe y’ingimbi y’umupira w’amaguru yo muri Thaïlande baheze mu buvumo
Abatabazi bakomeje gukora ibishoboka byose ngo barokore aba bana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza