Abajyanywe muri Amerika ari bato batengushywe n’aba-démocrate bari barasezeranye kubarwanirira

Yanditswe na Mukaneza M.Ange
Kuya 23 Mutarama 2018 saa 09:04
Yasuwe :
0 0

Urubyiruko rutuye muri Leta Zunze Ubumwe za Amerika mu buryo bunyuranyije n’amategeko nyuma yo kuhajyanwa bakiri bato, ku wa Mbere batengushywe n’abasenateri bo mu ishyaka n’aba-démocrate bari barasezeranye gukora ibishoboka byose ngo batazasubizwa mu bihugu byabo.

Uru rubyiruko ruzwi nka Dreamers, bituruka ku iteka ryitwa DREAM (Development, Relief, and Education for Alien Minors Act), ryemerera abajyanywe muri Amerika bari munsi y’imyaka 18 gutura muri iki gihugu by’agateganyo, nyuma yo kuzuza ibisabwa bagahabwa ubwenegihugu.

Abaharanira uburenganzira bw’uru rubyiruko ariko bari mu gahinda, nyuma y’uko abasenateri bo mu ishyaka ry’aba-démocrate batoye umushinga w’itegeko ry’ingengo y’imari izakoreshwa na Guverinoma kugeza muri Gashyantare 2018, mu gihe bari baravuze ko batazabikora igihe cyose batizeye neza ahazaza ha bariya bana.

Ku wa Mbere nibwo habaye amatora yo kwemeza ingengo y’imari no gushyira iherezo ku ifungwa rya bimwe mu bigo bya leta byari byatangiye gukorwa nyuma y’uko ku wa Gatanu abasenateri bananiwe kumvikana ku mushinga w’itegeko rigena amafaranga bigomba gukoresha.

Karina Ruiz w’imyaka 33 ni umwe mu bumva ko bahemukiwe n’aba- démocrate, aho avuga ko yari afite icyizere ko batari bwemere gutora nk’uko bari babikoze ku wa Gatanu ndetse yongeraho ko biteguye gukomeza gutanga ubutumwa bugaragaza ko ikibazo cyabo cyihutirwa.

Nk’uko The Huffington Post yabyanditse, abimukira batagira ibyangombwa bari basabye aba- démocrate kutemera gushyigikira itorwa ry’ingengo y’imari, igihe cyose nta gikozwe ngo harindwe ruriya rubyiruko rugera ku bihumbi 700 rushobora kwirukanwa nyuma y’uko Perezida Donald Trump ashyize iherezo kuri gahunda yari igamije kurengera abaje muri Amerika ari bato (Deferred Action for Childhood Arrivals, DACA).

Antonio Jauregui w’imyaka 20 wajyanywe muri Amerika afite itanu, ni umwe mu babajwe no kwisubiraho kw’aba- démocrate dore ko icyemezo kimwemerera gutura muri Amerika cyarangiye muri Nzeri umwaka ushize, akaba afite ibyago byo gusubizwa aho akomoka, kimwe n’abandi bagera ku 122 ibyemezo byabo bya DACA birangira buri munsi.

Aba- démocrate ariko bavuga ko bemeye gutora itegeko rigena ingengo y’imari nyuma y’uko Umuyobozi w’aba- républicains muri Sena, Mitch McConnell abemereye ko azategura amatora k’umushinga w’itegeko rirebana na DACA igihe cyose bizagera tariki ya 8 Gashyantare ntariratorwa.

Muri Nzeri 2017 nibwo Trump yahagaritse gahunda ya DACA, ashimangira ko ari uburyo bwo gushyira mu bikorwa umurongo yihaye mu guhangana n’ikibazo cy’abimukira binjira muri iki gihugu mu buryo butemewe n’amategeko.

Itsinda ry'abajyanywe muri Amerika bakiri bato batengushywe n’aba-démocrate bari barasezeranye kubarwanirira

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza