Uwo uzaheka ntumwicisha urume! Umusaruro w’umuti ushaririye wa ‘Bye Bye Nyakatsi’

Yanditswe na Akayezu Jean de Dieu
Kuya 31 Mutarama 2021 saa 07:30
Yasuwe :
0 0

Abantu bagitaha ibirori bakizihirwa hari indirimbo bagera aho bagatera, bagahanika ijwi bagira bati ‘Ibanga Abanyarwanda tugendana, Abanyamahanga ryarabananiye’! Uretse bimwe by’uwambaye ikirezi ntamenye uko cyera, Bene Gihanga bafite ibanga.

Gahunda zigamije inyungu rusange by’umwihariko izikora ku buzima bw’abaturage akenshi zirarikoroza ariko nanone ubuyobozi bureberera abaturage bushingira ku mpamvu zumvikana kandi ntabwo bitinda kugaragara koko ko abo bantu baganishwaga aheza.

Inama ya munani y’Umushyikirano yabaye tariki ya 20-21 Ukuboza 2010 yafashe imyanzuro irimo uwo guca burundu nyakatsi, izo zikaba zari inzu zisakaje ibyatsi kuva kera cyane, zitari zijyanye n’u Rwanda rushya.

Ni gahunda yaje guhabwa izina rya ‘Bye Bye Nyakatsi’, igamije kurandura burundu izi nzu zabaga akenshi zubakishije ibiti kandi zisakaje ibyatsi [wasangaga ari ishinge cyangwa urukangaga].

Nubwo hari hashize hafi umwaka guverinoma y’u Rwanda ishishikariza abatuye muri Nyakatsi gushaka isakaro ry’amategura cyangwa amabati, hari abatarabyumvaga kandi bari benshi kugeza ubwo bisabye ko ubuyobozi bw’igihugu bwinjira mu rugamba bigakorwa mu nyungu rusange.

Muri ibyo bihe wasangaga nibura nko mu bice by’icyaro, umuryango utuye nko mu nzu isakaje ibyatsi cyangwa bafite imwe isakaje amategura noneho bakagira n’igikoni gisakaje ibyatsi, hari n’abo wasangaga bafite inzu ebyiri, ikiraro cy’inka ndetse n’ubwiherero byose bisakaje nyakatsi.

Kugira ngo abanyarwanda mu ngeri zitandukanye babashe kumva neza iyi gahunda, byasabye amasomo ahambaye ndetse imiryango mpuzamahanga yarahagurutse ishinja leta gukoresha ingufu z’umurengera ariko ku rundi ruhande n’ubwo wari umuti ushaririye, abaturarwanda bagombaga kuwunywa kugira ngo babashe gukira.

Kurandura Nyakatsi ni urugamba rwasabye ko buri munyarwanda wese abigiramo uruhare. Nko muri 2007, muri Petit Stade Amahoro, I Remera habereye igitaramo mbaturamugabo cyari cyahuje abahanzi bari bagezweho icyo gihe kugira ngo batange ubutumwa bushishikariza abanyarwanda gusezera kuri Nyakatsi.

Iki gitaramo cyari kitabiriwe n’abahanzi barimo Jay Polly, Kamichi, Dream Boys, Riderman, Babou n’abandi benshi wasangaga bakunzwe n’abanyarwanda muri icyo gihe. Bose bose intero yari ‘Bye Bye Nyakatsi’.

Abaturage bamwe barabyumvise, abandi babanza gutsimbarara ariko uko iminsi yagiye ishira, bagendaga babona ibyiza byo gutura heza bakava muri izo nzu dore ko mu gihe cy’impeshyi n’icyi bamwe babaga bafite ubw0ba bw’uko izo nzu zishobora gushya.

Cyari icyemezo gifite ishingiro!

Kampayana Augustin wari umukozi wa Minisiteri y’Ubutegetsi bw’Igihugu mu gihe hatangizwaga uru rugamba yabwiye IGIHE ko ubundi bijya gutangira hari mu 2009. Hari itsinda ry’abadepite ryakoreye ingendo mu turere dutandukanye tw’igihugu, basanga ikibazo cy’abaturage baba muri Nyakatsi gihangayikishije.

Abadepite bagarutse mu Nteko bagiye impaka kuri icyo kibazo ndetse bafata imyanzuro ikakaye irimo gutumiza guverinoma ngo ize gutanga ibisobanuro kuri iyo ngingo ari nabwo Minisiteri y’Ubutegetsi bw’Igihugu (Minaloc) yahise ihabwa umukoro wo gushaka uburyo izi nyakatsi zavanwaho.

Kampayana Augustin yavuze ko abadepite bakoreye ingendo mu baturage, bakaza basaba ko ikibazo cya nyakatsi gihagurukirwa

Kampayana avuga ko koko ikibazo cya Nyakatsi cyari gihangayikishije agendeye ku ngero z’ibice by’igihugu nka Kayonza wasangaga abaturage bahira mu nzu cyangwa ibikorwa byabo bigashya.

Ati “Buriya icya mbere, ni ububi bwatumaga abantu binubira kuba muri Nyakatsi, ndetse bashaka no kuyivamo n’ubwo hari abatarabyumvaga cyangwa bagatinda kubyumva. Bijya nko gukomera igihe amazu yarimo ashya hari nk’inzu za Bugesera n’ahandi umuntu akakubwira ngo inzu ye yahiye hahiramo umusaruro n’ibintu byose bifite nk’agaciro k’ibihumbi 800Frw.”

Yakomeje agira ati “Hari abarumwaga n’inzoka, imvura yagwa ntibaryame, hakazamo ibishorobwa, Abana wasangaga bahitamo kujya kwibera kwa ba nyirasenge. Ikindi ni imyumvire, ku buryo wasanga nk’umuntu afite inka mu rwuri zirenga 100 ariko ukabona aba mu nzu y’ibyatsi ndetse arara ku musambi.”

Mu 2012, ubwo hari hamaze gutangizwa iyo gahunda, Minisiteri y’Ubutegetsi bw’Igihugu, yatangazaga ko nibura inzu ibihumbi 124 arizo zagombaga gusenywa [ni ukuvuga ko zari zubakishije ibyatsi, ‘Nyakatsi’].

Guverinoma y’u Rwanda yafatanyije n’abandi bafatanyabikorwa bayo barimo abanyarwanda babaga mu mahanga, hatangwa amabati ku bari bashoboye kwiyubakira, abandi barubakirwa banahabwa amabati yo gusakara izo nzu, baca ukubiri na Nyakatsi gutyo.

Kugira ngo byumvikane neza, ibi bintu byasabye ubushobozi buhambaye kuko nko muri Werurwe 2011, Minaloc yahaye uturere twa Musanze, Rwamagana, Nyamagabe na Nyaruguru amabati miliyoni ndetse ’imisumari byombi bifite agaciro ka miliyari 3 Frw.

Ni amafaranga yahawe imiryango 35 yari ikennye kurusha indi, ni ukuvuga ko itabashaga kwiyubakira inzu nyuma yo gusenya izari zisakaje ibyatsi.

Impuguke akaba n’Umwarimu muri Kaminuza y’u Rwanda wigisha ibijyanye na politiki mpuzamahanga, Dr Ismael Buchanan, yabwiye IGIHE ko kurandura Nyakatsi n’ubwo hari abatarabanje kubyumva ariko ari gahunda yatanze umusaruro kugeza uyu munsi.

Dr Buchanan wari umuyobozi wa Diaspora mu gihe uru rugamba rwatangiraga, yavuze ko Abanyarwanda batuye mu mahanga aribo badukanye iki gitekerezo bitangiriye ku gushaka kubakira abana barokotse Jenoside yakorewe Abatutsi batagiraga aho kuba ariko biza kuba ngombwa ko n’abandi banyarwanda batishoboye bubakirwa.

Yagize ati “Twatangiye dufite igitekerezo cyo kubakira abanyarwanda barokotse Jenoside bararaga ku mihanda, abararaga mu bitaro, ariko noneho nyuma tuza kuyigira gahunda y’igihugu cyose dushaka no kubakira abari batuye mu bigonyi. Ni ibintu na Minaloc yaje guhita itangira gushyira mu bikorwa biraguka bigera mu gihugu cyose.”

Yakomeje agira ati “Kugeza magingo aya navuga ko icyo cyerekezo cyatumye aho u Rwanda rugeze ubu ni bwa buryo bwo kwishakamo igisubizo, kandi n’iyo tuvuze ngo abantu babayeho neza kandi heza ni aho byaturutse.”

Dr Ismael Buchanan yavuze ko diaspora yagize uruhare runini mu irandurwa rya nyakatsi

Kampayana avuga kandi ko iyo urebye gusa nyakatsi byafashije muri politiki yo gutuza abantu ku midugudu kuko mbere ya 2010, abari bayituyeho bageraga kuri 38%, mu gihe muri 2012 ubwo ‘Bye Bye Nyakatsi yarangiraga bari bamaze kugera kuri hafi 70%.

Yakomeje avuga ko “Ikindi nakubwira cyiza, byatumye habaho ubufatanye bwiza bwa leta n’inzego zitandukanye, ugasanga nk’urusengero ruvuze ko ruzubakira abatishoboye barwo, bakabagurira amabati, bakabubakira ndetse bakanabagurira ibikoresho byo mu rugo.”

Guhanda yo guca Nyakatsi yakurikiranye no gutuza abantu mu midugudu y’icyitegererezo, itangirira mu Murenge wa Rweru, Akarere ka Bugesera, tariki ya 4 Nyakanga 2016. Ni gahunda yahise itangira gushyirwa mu bikorwa hirya no hino, abaturage batishoboye by’umwihariko abari barasenyewe muri gahunda ya Nyakatsi bari basigaye batarahabwa amacumbi.

Nko mu mwaka w’ingengo y’imari 2016/2017, ingo 32,301 ku 40,000 zari zituye zitatanye zatujwe mu midugudu naho izigera ku 2,707 zikurwa mu manegeka. Inzu z’icyitegererezo 319 zubatswe mu turere twose uko ari 30 hagendewe ku rugero rw’umudugudu w’icyitegererezo wa Rweru.

Mu mwaka wakurikiyeho wa 2017/2018, ingo 17,249 zari zituye mu buryo butatanye n’izindi 3,905 zituye mu manegeka, leta yazituje mu midugudu y’icyitegererezo, hakoreshejwe miliyari 15 z’amafaranga y’u Rwanda.

Mu ntangiro za 2018, Mu Karere ka Gisagara, mu Majyepfo hari huzuye Umudugudu w’icyitegererezo wa Ruhuha ho mu Murenge wa Mamba. Hubatswe amazu yatujwemo imiryango 120, igizwe n’abantu 544.

Bari abatishoboye biganjemo abakuwe muri nyakatsi bakananirwa kongera kwiyubakira, n’abakene bari batuye ahantu habi. Abaturage bawutujwemo bo icyo gihe bavugaga ko bumva bamaze kugera muri viziyo 2020.

Icyo gihe ubwo uwo Mudugudu watahwaga, uwitwa Vianney Nzagahimana yagize ati “Ibi bintu ni byiza cyane, biragaragaza ko ya viziyo 2020 bavuze tuzahagera igihe kitaragera.”

Ejo bundi mu Nyakanga 2020, umubyeyi witwa Mukantabana Béata aherutse kubwira IGIHE ko mbere yabaga mu nzu ya nyakatsi nta cyizere cy’ubuzima bwiza afite ariko kuri ubu yumva anezerewe.

Ati “Nabaga mu nzu ya nyakatsi mvirwa narihebye ariko Perezida wacu yaduhaye inzu nziza. Ubu njyewe numva nezerewe kandi ubuzima bwaragarutse; bampaye inka ku buryo amata nyabona. Kuba narabonye ahantu heza ho kuba ni ibyishimo kandi mpora nshimira Imana n’ubuyobozi bwacu bwiza.”

Nyakatsi mu marembera...

Mu kiganiro na IGIHE, Minisitiri w’Ubutegetsi bw’Igihugu, Prof Shyaka Anastase yavuze ko ubwo iyi gahunda yo kwimura abari batuye muri nyakatsi binyuze muri ‘Bye Bye Nyakatsi’ yabaga, hari bamwe mu baturage batahise bubakirwa ariko kuri ubu hasigaye bacye cyane.

Yavuze ko “Buriya rero ubwo Guverinoma yimuraga abaturage muri gahunda ya ‘Bye Bye Nyakatsi’ hari bamwe batahise bubakirwa icyo gihe bacumbikiwe n’abavandimwe, abaturanyi cyangwa inshuti zabo ariko navuga ko kuri ubu tugeze kure tubabonera aho kuba.”

Imibare ya Minisiteri y’Ubutegetsi bw’Igihugu igaragaza ko nibura 91% by’abasenyewe muri iyi gahunda ya ‘Bye Bye Nyakatsi’ ndetse n’abandi batishoboye mu buryo bumwe cyangwa ubundi bamaze kubakirwa

Kugeza mu 2017, habarurwaga nibura imiryango 17,377 idafite aho kuba iri mu yasenyewe muri gahunda ya ‘Bye Bye Nyakatsi’, kandi nta bushobozi bwo kwiyubakira amacumbi yari ifite.

Mu mwaka w’ingengo y’imari 2017/18, hubatswe inzu 1,282, mu mwaka wakurikiyeho wa 2018/19 hubakwa 4,683, mu gihe muri 2019/20 hubatswe 8,717.

Minaloc igaragaza ko kugeza hagati ya Nyakanga kugeza mu Ukuboza 2020, hari hamaze kubakwa amazu 1,147.

Minisitiri Prof Shyaka avuga ko hari gahunda ya Guverinoma yo kubakira aba baturage bose noneho hagasigara urugamba rwo kubafasha mu iterambere no kubaka ubushobozi bwabo.

Nyakatsi zari zarabaye umuco kuri benshi, nyamara atari uko bazikunze bamwe ari ukubura uko bagira
Abahoze batuye muri nyakatsi batujwe mu midugudu myiza kandi igezeweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .