Urukingo rwa Sida rwatanze icyizere nyuma yo kugeragerezwa ku barimo Abanyarwanda

Yanditswe na Mukaneza M.Ange
Kuya 7 Nyakanga 2018 saa 10:22
Yasuwe :
0 0

Ubushakashatsi ku rukingo rwitezeho kurinda abantu kwandura Virusi itera Sida (VIH) bwakorewe ku bantu barimo n’Abanyarwanda, bwatanze icyizere ko rushobora gutangira gufasha abantu mu myaka iri imbere.

Rwasuzumiwe ku bantu 393, nyuma bigaragara ko bongerewe ubushobozi bwo guhangana n’iyi virusi itera Sida. Mu isuzuma ryakozwe byanagaragaye ko rwabashije kurinda inkende zimwe virusa ijya gusa na VIH.

Imibare y’Ishami ry’Umuryango w’Abibumbye ryita ku buzima, OMS, igaragaza ko ku Isi habarurwa abagera kuri miliyoni 37 babana na VIH, mu gihe buri mwaka ubwandu bushya bugaragara byibura mu bantu miliyoni 1.8.

Nubwo hari intambwe yatewe mu kwita no kuvura abarwaye Sida, ntabwo umuti wayikiza cyangwa urukingo rwarinda abantu kwandura biraboneka.

Imbogamizi ikomeza kugaragara mu gushakisha urukingo n’uko iyi Virusi igenda yihinduranya, mu rwego rwo guhangana n’ibitero ishobora kugabwaho n’abasirikare b’umubiri w’umuntu.

Uru rukingo rushya rwakozwe hifashishijwe ubwoko bwa VIH igaragara ku bice bitandukanye by’Isi, rwageragerejwe ku bantu bafite hagati y’imyaka 15-50 bo mu Rwanda, Amerika, Uganda na Afurika y’Epfo batari bafite ubwandu, bahabwa inkingo enye mu gihe cy’ibyumweru 48.

Nk’uko The Lancet yabitangaje, izo nkingo zatumye umubiri wabo ugira ubushobozi bwo gukumira kuba bakwandura VIH. Bwanakorewe kandi ku nkende 72, bigaragara ko 67% muri zo zaronse ubushobozi bwo kutandura virusi iteye kimwe na VIH.

Abashakashatsi bo mu Ishuri ry’ubuvuzi rya Havard bakoze uru rukingo batangaje ko igikurikiyeho ari ugukorera igerageza ku bagore 2600 bo muri Afurika y’Epfo bafite ibyago byinshi byo kwandura, kugira ngo bemeze niba koko rushobora gukumira kwandura Virusi itera Sida.

Abahanga bakomeje ubushakashatsi ku rukingo rwa Sida

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza