00:00:00 IGIHE NETWORK KN KINYARWANDA EN ENGLISH FR FRANCAIS

Urukiko rwateye utwatsi ubusabe bwa Munyenyezi bwo kuburana mu Cyongereza

Yanditswe na Ntabareshya Jean de Dieu
Kuya 11 Kamena 2021 saa 09:03
Yasuwe :
0 0

Urukiko Rwisumbuye rwa Nyarugenge rwateye utwatsi ubusabe bwa Munyenyezi Béatrice wifuzaga kuburana mu Cyongereza, rwanzura ko akwiye gukomeza gukoresha Ikinyarwanda kuko kuva yagera mu Rwanda kugeza uyu munsi agikoresha neza kandi akumvikana n’abo bavugana.

Munyenyezi akurikiranyweho ibyaha birimo ibyo Kwica nk’icyaha cya Jenoside, Gucura umugambi wo gukora Jenoside, Gutegura Jenoside, Gushishikariza abantu ku buryo buziguye cyangwa butaziguye gukora Jenoside, Ubufatanyacyaha muri Jenoside, Kurimbura nk’icyaha cyibasiye inyokomuntu n’Ubufatanyacyaha mu gusambanya ku gahato nk’icyaha cyibasiye inyokomuntu.

Ubwo aheruka imbere y’Urukiko ku wa 8 Kamena 2021 yabwiye Inteko iburanisha ko ururimi rw’Ikinyarwanda rumugora, bityo asaba ko yazajya akoresha Icyongereza kugira ngo abashe kwisobanura.

Ibi yongeye kubigarukaho kuri uyu wa Gatanu ndetse n’abamwunganira mu mategeko aribo Me Buhuru Pierre Célèstin na Me Gatera Gashabana bagaragaza ko umukiliya wabo afite uburenganzira bwo kuburana mu rurimi yumva, cyane ko Icyongereza kiri mu rurimi rwemewe gukoreshwa mu Rwanda kandi n’impande zose muri uru rukiko zibasha kurwumva.

Urukiko rumaze gusesengura ingingo zatanzwe n’impande zombi rwanzuye ko hagendewe ku kuntu iburanisha ryagenze, hagamijwe kwirinda icyorezo ndetse n’inama zitangwa n’inzego z’ubuzima urukiko rusanga Munyenyezi agomba gukomeza kuburana hifashishijwe ikoranabuhanga kandi nta ngorane zirimo kuko bitabangamiye uburenganzira bwe bw’ibanze.

Ku ngingo igendanye n’ururimi, bavuze ko hashingiwe ku kuba kuva yafatwa yarabajijwe mu Kinyarwanda ndetse no mu maburanisha aherutse yaravuze Ikinyarwanda kandi akumvwa, agomba gukomeza kuburana mu rurimi yaburanyemo mbere cyane ko bitabangamiye uburenganzira bwe.

Iminsi 30 y’igifungo yateje impaka

Urukiko rumaze gusoma umwanzuro, rwategetse ko urubanza rukomeza haburanwa ku nzitizi zatanzwe na Munyenyezi n’abamwunganira mu kujurira urukiko ku cyemezo cyari cyafashwe n’Urukiko rw’Ibanze rwa Kicukiro cyo gufungwa iminsi 30 y’agateganyo cyo ku wa 10 Gicurasi 2021.

Me Buhuru yongeye kugaragariza urukiko ko ibyaha akurikiranyweho yari yarabihaniwe muri Leta zunze Ubumwe za Amerika, bityo atagakwiye kuba akibikurikiranyweho.

Ikindi uruhande rwa Munyenyezi rwagaragaje ko abatangabuhamya bagiye basa n’abavuguruzanya bityo ko byazasuzumwa mu bushishozi.

Munyenyezi yongeye kuvuga ko atigeze yiga muri Kaminuza kuko yavuye mu Rwanda atarangije n’ayisumbuye, bityo ko abatangabuhamya bamushinja atazi aho bakura kubeshyera umuntu batanazi.

Yavuze ko ubuhamya bwatanzwe budakwiye guhabwa ishingiro kuko bigaragara ko abamushinja batamuzi.

Me Gatera Gashabana yifashishije ibiteganywa n’ingingo ya 79 y’itegeko rigena imiburanishirize y’imanza nshinjabyaha, yagaragaje ko ukwezi Munyenyezi yakatiwe n’Urukiko rw’Ibanze kwarangiye bityo ko icyemezo kimufunga cyamaze guta agaciro. Yavuze ko umukiliya we afunzwe mu buryo bunyuranyije n’amategeko, asaba urukiko kumurekura akaburana ari hanze.

Ubushinjacyaha buhawe umwanya, bwasobanuye ko nta gufungwa mu buryo binyuranyije n’amategeko kwabayeho kuko n’ubwo ukwezi yakatiwe n’Urukiko rw’Ibanze rwa Kicukiro kwarangiye, basabye kongera igihe mu rukiko kandi ko byemewe.

Izo mpamvu zose zatanzwe n’uruhande rwa Munyenyezi, Ubushinjacyaha bwagaragaje ko nta shingiro zifite kuko n’Urukiko rw’Ibanze rwa Kicukiro rwabigaragaje.

Bwasabye ko urukiko rwakwakira ubujurire bwa Munyenyezi ariko bugategeka ko nta shingiro bufite bityo agakomeza kuburana afunze.

Ubushinjacyaha bwongeye kugaragaza ko ibyaha yakurikiranyweho muri Amerika ari uko yabeshye Urwego rw’Abinjira n’Abasohoka rw’icyo gihugu, kandi ko ibyo akurikiranyweho ubu ntaho yigeze abihanirwa.

Umwanzuro ku bujurire ku ifunga n’ifungurwa by’agateganyo ruzasomwa ku wa 21 Kamena 2021 saa Kumi z’umugoroba.

Urukiko rwanze ubusabe bwa Munyenyezi bwo kuburana mu Cyongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .