00:00:00 IGIHE NETWORK KN KINYARWANDA EN ENGLISH FR FRANCAIS

Umushinga w’ishuri rikuru ry’amahoteli i Kigali wahombeje leta akayabo

Yanditswe na Kanamugire Emmanuel
Kuya 3 Kamena 2021 saa 01:35
Yasuwe :
0 0

Leta y’u Rwanda ishobora guhomba arenga miliyari 69 z’amafaranga y’u Rwanda yashoye mu mishanga itandukanye ariko igihe yagombaga gutangira gutanga umusaruro kikarenga nta kirakorwa.

Ibi ni ibyagaragajwe muri raporo y’Umugenzuzi Mukuru w’Imari ya Leta, y’umwaka wa 2019/20, yerekana ko mu bibazo ahanini bituma haba imishinga myinshi idindira bikarangira igushije leta mu gihombo harimo ibura cyangwa ikererwa ry’ingengo y’imari iba igenewe ishyirwa mu bikorwa ryayo.

Ikibazo nk’iki kiboneka mu bigo bya leta bitandukanye harimo n’icyahoze gishinzwe guteza imbere amashuri y’imyuga n’ubumenyingiro (WDA).

Mu 2015 WDA yagiranye amasezerano n’Ikigo cy’abanyamahanga cyari cyiyemeje gutanga ubujyanama n’inkunga mu gutangiza Ishuri Rikuru ry’amahoteli i Kigali(Hospitality Management Institute:HMI), aya masezerano akaba yaragombaga kurangira mu 2019 n’ishuri rimaze kuzura.

Nyamara amasezerano yarangiye ku wa 30 Werurwe 2019, ibikorwa byo kubaka iri shuri bitarangiye igikomeye cyagaragajwe muri raporo ni uko nta gahunda igaragara y’uburyo imirimo izasubukurwa kubera ko WDA byayinaniye.

Kugeza ku wa 1 Ukwakira 2020 amasezerano afite agaciro ka 2 446 877 824 Frw yarahagaritswe biturutse ku kuba uwahawe isoko ryo kubaka iryo shuri yarananiwe gukomeza imirimo.

Ni mu gihe WDA yari yaramaze kumwishyura 2058 566 626Frw bingana na 84% by’agaciro k’isoko ryose.

WDA yari yaramaze kwakira ibikoresho byagombaga gukoreshwa muri HMI bifite agaciro k’ibihumbi 513 286 by’amayero ni ukuvuga hafi 488 099 153 Frw, kuri ubu ngo birimo kwangirikira mu bubiko byarabuze icyo bikora.

Iki kigo kandi cyatahuweho kwishyura agera kuri 474 150 852 Frw yishyuwe ikigo nacyo cy’abanyamahanga kuri serivisi bitagaragara niba zaratanzwe nk’uko raporo ikomeza ibivuga.

Bivugwa ko Ikigo cy’Abanyamahanga cyari gifitanye amaseserano na WDA mu itangizwa ry’uyu mushinga ari Ishuri ry’Aba-Souisse ryitwa ‘Les Roches International School of Hotel Management.’

HMI ni ishuri ryari ryitezweho umusanzu mu gukemura ibibazo bya serivisi zicumbagira mu rwego rw’amahoteli mu Rwanda no gufasha mu ishyirwa mu bikorwa rya gahunda y’igihugu yo gushyira imbaraga mu bukerarugendo bushingiye ku nama.

Byari biteganyijwe ko ryagomgaba kuzaba rifite porogaramu z’amahugurwa mu by’amahoteli n’ubukerarugendo ku bari mu mwuga hakanatangirwa amasomo atuma uwaryizemo ahabwa impamyabushobozi yo ku rwego rwa Diploma. Inyubako zaryo zadindiye ziherereye mu Karere ka Gasabo mu Mujyi wa Kigali.

Muri rusange raporo y’Umugenzuzi Mukuru w’Imari ya Leta igaragaza ko hari impungenge ko leta ishobora guhomba amafaranga y’u Rwanda angana na 69 140 926 508 yashowe mu mishanga itandukanye ariko igihe cyagenwe kikarangira nta gikozwe.

Ku rundi ruhande ngo hari imishinga ishorwamo akayabo bikarangira ibikorwa remezo byuzuye ariko ntibikoreshwe. Muri iyi raporo havugwamo Burera College of Trade, ishuri rimaze imyaka itandatu ryubatswe ariko ridakora.Hari Burera Beach Resort, Ngororero Cassava Plant, uruganda rw’imyumbati rumaze imyaka irindwi, Isoko rya Ruhango, Inzu zo guturamo zubatswe i Muhanga(Eight in One) n’ibindi.

Mu bindi bigo ho uhasanga amafaranga ari kuri konti atarigeze akoreshwa kimwe n’indi mitungo aho muri raporo iheruka iki kibazo cyagaragaye inshuro 96 mu bigo bya leta 54, agaciro k’iyo mitungo kakaba kangana na 21 747 324 729 Frw.

Umushinga wo kubaka Ishuri Rikuru ryigisha iby'amahoteli (Hospitality Management Institute: HMI Kigali) waradindiye/Ifoto: OAG

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .