Umugabo ukomoka muri Uganda yafatiwe mu Rwanda afite ibilo 20 by’urumogi

Yanditswe na Tuyishimire Raymond
Kuya 9 Gashyantare 2021 saa 02:01
Yasuwe :
0 0

Polisi y’u Rwanda kuri uyu wa Kabiri yeretse itangazamakuru umugabo ufite ubwenegihugu bwa Uganda wafashwe akekwa kugemura ibiyobyabwenge mu Rwanda dore ko yafatanywe ibiro 20.

Uyu mugabo yafashwe ku wa 8 Gashyantare 2021 afatiwe mu murenge wa Kivuye mu karere ka Gicumbi yinjiza mu gihugu ibiro 20 by’urumogi.

Uyu mugabo usanzwe utuye mu Karere ka Kabare muri Uganda, yabwiye itangazamakuru ko hari umuntu wamusabye ko bahurira hafi yo ku mupaka amuzaniye urumogi mu gihe bagiciririkanya amafaranga ahita afatwa.

Ati “Umuntu yarampamagaye ambwira ngo muzanire itabi ngo nze duhurire ku mupaka maze twumvikane igiciro. Nkirimuzanira bahita bamfata”.

Yavuze ko mbere y’uko azanira uwamutumye urwo rumogi yari yamwijeje kumwishyura amafaranga 220 000Frw.

Umuvugizi wa Polisi y’u Rwanda, CP John Bosco Kabera yasabye abanyarwanda kwirinda gukoresha ibiyobyabwenge kuko byangiza ubuzima.

Ati "Icya mbere ibiyobyabwenge nta kamaro bifite uretse kwangiza ababikoresha, urubyiruko cyangwa umuntu wese ubikoresha. Ikindi n’uko dusaba abanyaranda kuduha amakuru kuko bwa mbere abizana twabonye amakuru , dufata abo yabizaniye ariko n’uyu ubizanye arafatwa.”

Yasabye abaturage ko no mu gihe bamenye ko hari ibiyobyabwenge byinjiye, bakwiriye kubivuga kugira ngo bidakwirakwizwa mu baturage.

Uyu mugabo naramuka ahamijwe iki cyaha azahanishwa igifungo kiri hagati y’imyaka 20 na 25 ndetse n’ihazabu ya miliyoni ziri hagati ya 15 Frw kugeza kuri 20 Frw.

Ibiro 20 by'urumogi nibyo byafatanywe umugabo ukomoka muri Uganda
Uyu mugabo ufite ubwenegihugu bwa Uganda yavuze ko hari umuntu wari wamusabye kumuzanira ibiyobyabwenge abizanye ahita afatwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .