00:00:00 IGIHE NETWORK KN KINYARWANDA EN ENGLISH FR FRANCAIS

Uko Perezida Micombero w’u Burundi indege yari imutsinze mu Rwanda Imana igakinga akaboko

Yanditswe na Ferdinand Maniraguha
Kuya 11 Ugushyingo 2021 saa 10:55
Yasuwe :
0 0

Turi ku wa Gatandatu tariki 26 Mutarama 1974, nk’ibisanzwe izuba ry’ukwa mbere ni ryinshi mu bice bitandukanye by’u Rwanda, dore ko igihugu cyari cyinjiye no mu bihe bidasanzwe by’amapfa. Uwo munsi ni bwo Col Michel Micombero wayoboraga u Burundi yari avuye mu ruzinduko muri Uganda atashye mu gihugu cye.

Indege ya Micombero yagombaga guca mu kirere cy’u Rwanda mbere yo kugera mu Burundi. Ibihugu byombi byari bikirebana ay’ingwe nubwo hari hashize amezi arindwi Juvénal Habyarimana ahiritse ubutegetsi bwa Perezida Grégoire Kayibanda.

U Rwanda n’u Burundi byapfaga impamvu za politiki zishingiye ku moko. U Rwanda rwari ruyobowe n’Abahutu mu gihe u Burundi bwayoborwaga n’Abatutsi, buri gihugu kigahora kikanga ko ikindi kizagica ruhinga nyuma kigashyigikira abo mu bwoko batavuga rumwe.

Nko ku Rwanda, u Burundi bwari bucumbikiye benshi mu Batutsi bahunze ubugizi bwa nabi bwatangiye mu 1959, bigizwemo uruhare n’Abategetsi b’Abahutu bari bashyigikiwe n’Ababiligi.

Ikindi kandi mu mezi make yari ashize, Kayibanda na Micombero birirwaga baterana amagambo kuri radiyo, uw’i Kigali ashinja uw’i Bujumbura gukorera Jenoside Abahutu bari baherutse kugerageza guhirika ubutegetsi. Ikibazo cyabo cyarakomeye, amagambo ava kuri radiyo bajya no kuyateranira muri Loni.

Reka amoko na politiki tubishyire ku ruhande, twigarukire ku wa Gatandatu ubwo indege ya Micombero yari imaze gufata ikirere yinjiye mu Rwanda.

Inyandiko yo ku wa 28 Mutarama 1974, Ambasade ya Leta Zunze Ubumwe za Amerika mu Burundi yoherereje Ibiro bikuru bishinzwe Afurika, ivuga ko iyo ndege yahuye n’ibibazo tekiniki bikomeye.

Iyo nyandiko ivuga ko byabaye ibintu bikomeye ku buryo ‘habuze gato ngo ikore impanuka’. Impamvu y’icyo kibazo tekiniki Ambasade ya Amerika i Bujumbura ntiyisobanura, gusa ubwo hari hashize iminsi itatu, ikinyamakuru The New York Times cyanditse ko indege “yabuze itumanaho n’abo ku butaka ndetse n’amavuta atuma igenda akaba make”.

Bagize bati “Perezida Michel Micombero w’u Burundi yararusimbutse mu mpera z’icyumweru gishize ubwo indege yari imuvanye muri Uganda yatakagazaga itumanaho ndetse igashirirwa n’amavuta atuma igenda.”

Ambasade ya Amerika i Bujumbura ivuga ko umupilote wari utwaye iyo ndege yataye umutwe akagira ubwoba, bikaba ngombwa ko ‘Perezida Micombero ayimwambura agafata inshingano zo kuyitwarira”.

Micombero wari umaze imyaka umunani ayobora u Burundi, yari afite impamyabushobozi yo gutwara indege nto, dore ko yanabikozemo ubwo yari akiri mu gisirikare.

Ibyo byose byabaye bamaze kwinjira mu kirere cy’u Rwanda, kandi nta gahunda bari bafite yo kugwa ku Kibuga Mpuzamahanga cya Kigali.

Micombero abonye bikaze, yirwanyeho asaba ubufasha mu Rwanda, bamwoherereza kajugujugu ya gisirikare iza ikurikiye indege ye ku buryo iyo hagira ikibazo kiba, yari gutabarwa bwangu.

Ku bw’amahirwe, Micombero indege yarayitwariye ayigusha ku Kibuga cy’Indege cya Kigali. Ambasade ya Amerika i Bujumbura ivuga ko bageze i Kigali mu ndege hasigayemo ‘utujerekani nka dutanu tw’amavuta atwara indege’, mu gihe New York Times yo yanditse ko “haburaga iminota mike ngo amavuta y’indege ashiremo ikiri mu kirere’.

Kugira ngo wumve uburemere bw’ibyago byari byugarije Micombero, ku ndege nini nka Boeing 747, buri segonda inywa akajerekani kamwe k’amavuta ka litilo enye. Ntabwo ubwoko bw’indege yari itwaye Micombero bwatangajwe, ariko ntibyajya kure y’aho cyane.

Amaze kugera i Kigali igitaraganya, yafashe indi ndege akomeza urugendo rwe agera i Bujumbura, ashimira u Rwanda kuba rwamubaye hafi mu mpanuka yashobokaga umunota uwo ari wo wose.

Byabaye nk’ibizahura umubano w’ibihugu byombi nubwo byabaye iby’akanya gato kuko mu 1976, ni ukuvuga hashize imyaka ibiri, Micombero yahiritswe ku butegetsi na Jean Baptiste Bagaza.

Micombero yageze i Kigali amahoro, ahita afata indi ndege imujyana i Bujumbura
Nyuma yo kurusimbuka, Micombero yabaye inshuti ya Habyarimana nubwo bitamaze kabiri kuko yahiritswe ku butegetsi mu ntangiriro za 1976

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .