Uduce twa pulasitiki tuboneka mu mazi yo kunywa nta ngaruka dufite ku buzima

Yanditswe na Umutoni Rosine
Kuya 23 Kanama 2019 saa 11:27
Yasuwe :
0 0

Ishami ry’Umuryango w’Abibumbye ryita ku buzima (OMS) ryatangaje ko uduce duto cyane twa pulastiki tuboneka mu mazi yo kunywa hirya no hino ku isi nta kibazo dutera ku buzima bw’abantu.

Raporo nshya kuri icyo kibazo ya OMS ivuga ko yasanze uduce twa pulastiki tuboneka mu mazi yo kunywa iyo tugeze mu mubiri w’umuntu dushobora guhita kuko ari duto cyane.

Icyakora OMS yatangaje ko hakenewe ubushakashatsi bwisumbuye buzagaragaza ubukana bw’icyo kibazo.

Uduce duto cyane twa pulastiki (dupima munsi ya milimetero 5) twagiye tuboneka mu nzuzi, ibiyaga no mu mazi abantu banywa.

OMS yatangaje ko nubwo mu mazi yose abantu banywa utwo duce tubonekamo nta ngaruka dufite ku buzima.

Uwo muryango watangaje ko mu myaka ibiri ishize aribwo hatangiye ubwo bushakashatsi, gusa ngo hakenewe ubundi bwisumbuyeho kugira ngo hamenyekane izindi ngaruka z’utwo duce twa pulastiki.

Dr Bruce Gordon umwe mu bakoze ubushakashatsi yabwiye BBC ko ingano y’uduce twa pulastike tuba turi mu mazi itandukana bitewe n’icyakoreshejwe bayayungurura.

Yagize ati “Urugero hamwe ushobora gusanga muri litilo imwe y’amazi harimo uduce 1000 ahandi ugasangamo agace kamwe. Biterwa n’ingano y’akayunguruzo kakoreshejwe.”

Ubusanzwe amazi yo kunywa atunganywa hakurwamo imyanda n’indi miti yaba irimo ishobora kugira ingaruka ku buzima bwa muntu. OMS yasabye ko inganda zitunganya amazi n’abandi bajya bibuka no gukurano uduce twa pulastiki tubonekamo, tugakurwamo nibura ku kigero cya 90 %.

OMS kandi isaba aho bishoboka hose kugabanya ikoreshwa rya pulastiki.

Buri mwaka abantu miliyari ebyiri ku isi banywa amazi arimo umwanda. Bitera impfu z’abantu miliyoni imwe buri mwaka nkuko Dr Gordon yabitangaje.

OMS ivuga ko uduce twa pulasitiki tuboneka mu mazi yo kunywa nta ngaruka dufite ku buzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza