00:00:00 IGIHE NETWORK KN KINYARWANDA EN ENGLISH FR FRANCAIS

Ubuzima bugoye bw’umukobwa wabyaye ku myaka 16 akirukanwa mu muryango

Yanditswe na Claude Bazatsinda
Kuya 9 Ugushyingo 2021 saa 10:42
Yasuwe :
0 0

Nikuze (Amazina yahinduwe kuko akiri muto), utuye mu Karere ka Musanze mu Murenge wa Kinigi, avuga ko yanyuze mu buzima bushaririye nyuma yo kubyara afite imyaka 16, asambanyijwe n’abagabo barenga batatu atazi, akaza no gucibwa mu muryango we nyuma yo kubyara.

Iyi nzira Nikuze yayinyuzemo nyuma y’amakimbirane y’ababyeyi be yaje kubaviramo gutandukana, agatangira kurerwa na nyina na we wabagaburiraga ari uko avuye guca inshuro ariko uyu mukobwa akaza gutegekwa kujya yishakira icyo kurya afite imyaka 16, atangira ubuzima bumugoye gutyo.

Byabaye intandaro yo kuva mu ishuri ageze mu mwaka wa gatatu w’amashuri abanza ari na bwo yatangiye guhura n’ibibazo byamugejeje ku kubyara asambanyijwe n’abagabo atazi. Kuri ubu amaze kugira imyaka 19 y’amavuko.

Aganira na IGIHE, yavuze ko kubaho mu buzima bwo kwimenya ku kintu cyose yakeneraga ku myaka 16 gusa, byatumye yiga nabi abaho asabiriza rimwe na rimwe agasiba ishuri.

Amaze kubona imibereho imugoye, yahisemo kujya muri Uganda muri 2018 aho yumvaga ko hari agace gatuwe n’abanyarwanda kandi yahabona akazi.

Mu nzira yanyuzemo niho yahuriye n’abagabo batandatu bamwe muri bo baramusambanya bamusimburanaho kugeza ubwo yazahaye.

Ati " Naciye mu nzira zitemewe maze kwambuka ngeze muri Uganda mpura n’abagabo bagera nko muri batandatu, mbayoboje aho nari ngiye; bamwe bahise bamfata ku ngufu. Bari benshi barenga batatu.”

"Naraharaye bucya mu gitondo, haza umugabo asanga ndimo kurira, niwe wankuye aho muri ako gashyamba ambwira ko anjyanye kuri polisi kugira ngo bansubize iwacu, icyakora yangiriye neza andangira akazi nk’uko nabyifuzaga."

Uyu mukobwa akomeza avuga ko mu kazi yakoraga, yahuraga n’uburwayi atigeze asobanukurwa, gusa ngo nyuma y’amezi atandatu yatangiye kumva hari ibidasanzwe munda abajije abakuru bamubwira ko atwite.

Nyuma y’ibi byose yiyemeje gusubira iwabo, ibintu ngo bitigeze bimuhira kuko yahise acibwa mu muryango ambwirwa ko "nta bihanga bibiri mu nkono imwe", yirukanwa mu rugo atangira kujya arara ku muhanda atwite, gusa ngo nyuma y’iminsi itatu, ubuyobozi bumusubiza iwabo bamuha icyumba cye mu nzu yabanagamo na nyina na murumuna we.

Aka gahenge yahawe ngo ntikamaze kabiri, kuko akimara kubyara na bwo yasohowe mu nzu na nyina atangira kujya arara mu mbuga n’uruhinja rwe, nyuma y’iminsi itatu naho barahamwirukana, ajya kubaka ihema mu murima w’iwabo atangira kujya abamo.

Yagize ati "Maze kubyara Data yajyaga amfasha kubaho, nyuma y’amezi arindwi arapfa, Mama ahita ansohora mu nzu, namaze gatatu ndara mu mbuga n’uruhinja, nyuma na ho barahanyirukana, njya mu murima wacu ninginga abashumba bamfasha kubaka akararo ntangira kukabamo."

Nyuma y’igihe gito yaje kubona umugiraneza amukodeshereza inzu amezi abiri, ngo arangiye abura ubundi bwishyu, ari bwo nyir’inzu yatangiye kujya amusaba ko baryamana akamusonera ubukode arabyanga, uwo mugabo aramukubita amuvuna akaboko ajya mu bitaro, gusa uwabikoze kuri ubu arafunzwe.

Mu buhamya buteye agahinda bw’uyu mukobwa akomeza avuga ko muri iyi nzira yise iy’amahwa, yaje guhura n’umugiraneza wita ku bana babyariye iwabo bagahabwa akato mu miryango, bamwigisha umwuga wo kudoda ndetse banamwubakira inzu yo kubamo, ubu akaba yaratangiye gushaka uko yakwitunga n’umwana we.

Ahamya ko hamwe n’inkunga z’abagiraneza ubuzima buzahinduka, akagira inama abandi bakiri bato kujya bitwararika ndetse no kudacika intege ngo bishore mu bindi bishobora gushyira ubuzima bwabo mu kaga igihe bagize ibyago bagahura n’ibibazo.

Ati" Nyuma y’ibyo byose nabonye abagiraneza baranyubakira bampa intangiriro z’ubuzima ubu mbayeho neza. Icyo nsaba abakobwa babyariye iwabo bakiri bato n’abandi bafite ibibazo by’ubuzima, ni uko batagomba kujya bashora ubuzima bwabo mu kaga mu gihe cy’ibibazo ngo birohe mu biyobyabwenge n’izindi ngeso mbi, ahubwo bajye bitwararika bahangane n’ubuzima nyuma hamwe n’Imana bagera ku ntsinzi."

Umunyamabanga Nshingwabikorwa w’Umurenge wa Kinigi Twagirimana Innocent, yizeza abana babyariye iwabo ko ubuyobozi buzakomeza kubaba hafi no gukorana n’abaterankunga batandukanye babagenera inkunga, gusa na we abasaba kwirinda kongera gushukwa bakongera kubyara.

Yagize ati "Nibyo hari abana bagize ibyago babyara bakiri bato, harimo n’abo byaviriyemo kuva mu mashuri, twagiye tubasura ubu bariga, abandi dukorana n’abaterankunga bakorera muri uyu Murenge, bamwe biga imyuga itandukanye n’andi mahirwe abagenerwa tukabafasha kuyabona. Icyo tubasaba ni ukwirinda kongera gushukwa byabaviramo kongera kubyara abandi bana n’abo bafite badashoboye kubitaho".

Mu Murenge wa Kinigi habarirwa abakobwa 150 batewe inda bakiri bato bari kwitabwaho.

Yemeza ko yanyuze mu buzima bushaririye akimara kubyara kuko hari n'ubwo yararaga hanze n'uruhinja rwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .