U Rwanda rwihanganishije Israel nyuma y’abagera kuri 45 bapfiriye mu mubyigano

Yanditswe na Tuyishimire Raymond
Kuya 2 Gicurasi 2021 saa 09:22
Yasuwe :
0 0

Leta y’u Rwanda yihanganishije Israel nyuma y’umubyigano ukomeye waguyemo abasaga 45, abandi 150 bagakomereka.

Byabaye ku wa 29 Mata 2021 ahitwa Lag B’Omer mu Majyaruguru y’Umusozi wa Meron hari hateraniye abantu ibihumbi bo mu Idini ry’Aba- Orthodox.

Mu itangazo Minisiteri y’Ububanyi n’Amahanga y’u Rwanda yasohoye kuri iki Cyumweru ibinyujije kuri Twitter, yavuze ko yifatanyije na Israel muri ibi bihe bigoye.

Yagize iti “Guverinoma n’Abaturage b’u Rwanda yihanganishije kandi ikomeje Leta ya Israel, imiryango y’ababuze ababo, baguye ku musozi wa Meron mu ijoro ryo ku wa 29 Mata 2021 bari mu muhango w’idini.”

Minisitiri w’Intebe wa Israel, Benjamin Netanyahu, na we yari yavuze ko yashenguwe n’ibyabaye ahita yihutira kugera aho iryo sanganya ryabereye.

Uwo mubyigano wari urimo abantu babarirwa mu 10.000 bo mu Idini ry’Aba-Orthodox b’Abayahudi mu muhango ngarukamwaka uzwi nka Lag Ba ‘Omer’ ugamije kwibuka urupfu rw’uwari umwigisha ukomeye wabo, Rabbi Shimon Bar Yocha.

Leta yatangaje ko mu cyumba cyaberagamo uwo muhango hari harimo abantu 10.000 gusa hari amakuru avuga ko bari benshi kurushaho.

Ubwo uwo muhango wari uhumuje iyo mbaga nyamwinshi yabyiganiye mu muryango barwana no gusohoka ari nabwo haje kwitaba Imana bamwe muri bo.

Dviri wabonye ibyo biba yabwiye radiyo yo muri Israel ko abantu babyiganiye mu nguni imwe basohokeragamo ndetse ko na we Imana yakinze ukuboko yari aguyemo.

Nyuma y’uko hamenyekaniye amakuru ko hari umubyigano udasanzwe, abapolisi bagera ku 5000 bagiyeyo ngo harebwe uburyo barokora bamwe ndetse ihwiture abo bemeramana bari birengagije amabwiriza yo kwirinda COVID-19.

Uyu mubyigano wahitanye abagera kuri 45 abandi 150 barakomereka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .