U Rwanda rwamaganye ubukangurambaga bugamije kurusiga icyasha mu binyamakuru by’u Bubiligi

Yanditswe na IGIHE
Kuya 28 Ugushyingo 2019 saa 09:40
Yasuwe :
0 0

U Rwanda rwamaganye ubukangurambaga bw’imitwe y’iterabwoba bugamije kurusiga icyasha mu binyamakuru by’u Bubiligi.

Ambasade y’u Rwanda mu Bubiligi yamaganye ubukangurambaga bumaze iminsi bukorwa n’abatavuga rumwe n’ubutegetsi bw’u Rwanda biganje mu mitwe y’iterabwoba, bukanyuzwa mu binyamakuru byo mu Bubiligi bigamije kuruharabika.

Hashize iminsi mu binyamakuru Le Soir na De Morgen byo mu Bubiligi handikwa inkuru zigamije guhindanya isura y’u Rwanda no kwerekana ko Guverinoma y’u Rwanda iri mu bikorwa bigamije kwibasira abatavuga rumwe nayo mu Bubiligi.

Mu cyumweru gishize, ibyo binyamakuru byanditse inkuru zivuga ko ba maneko b’u Rwanda boherejwe mu Bubiligi bafite ntego yo guca intege abatavuga rumwe na Leta bahaba.

Ni ibirego u Rwanda rwamaganiye kure, ruvuga ko ari ibigamije kurwambika icyasha bikozwe n’abatavuga rumwe na rwo bafite umugambi wo guhungabanya umutekano w’igihugu n’uw’akarere k’ibiyaga bigari.

Mu itangazo ryasohowe na Ambasade y’u Rwanda, yibukije ko u Bubiligi kuva Jenoside yakorewe Abatutsi mu 1994 yahagarikwa, bwabaye igicumbi cy’abatavuga rumwe na Leta y’u Rwanda n’ihuriro ry’ibikorwa byabo bigamije guteza umutekano muke.

Rigira riti “Vuba aha ku bintu bizwi n’ubuyobozi bw’u Bubiligi, byagaragaye ko imitwe ya politiki ifite n’inyeshyamba ya P5 na MRCD ikorera mu bwami bw’u Bubiligi aho bamwe mu bayobozi b’iyo mitwe ariho baba nka Paul Rusesabagina uyobora MRCD Ubumwe , Faustin Twagiramungu na Placide Kayumba (Visi Perezida wa FDU, akaba n’umwe mu bashinze ishyirahamwe Jambo ASBL). Iyo mitwe ihateranira kenshi igamije gushakisha inkunga mu ntego imwe yo guhirika guverinoma y’u Rwanda hakoreshejwe ingufu.”

Ibikorwa by’iyo mitwe bigamije guhungabanya umutekano mu Karere, byanatangajwe birambuye muri raporo y’impuguke za Loni mu Ukuboza umwaka ushize.

Ambasade y’u Rwanda mu gukomeza kugaragaza uburyo u Bubiligi bwabaye indiri y’imitwe y’iterabwoba irwanya u Rwanda, rwatanze urugero rw’ishyirahamwe Jambo ASBL ryemewe n’amategeko y’u Bubiligi, rikaba rigizwe na benshi mu bakomoka ku bakoze Jenoside yakorewe Abatutsi n’ibyo bakora bikaba biri mu mugambi w’ingengabitekerezo ya Jenoside.

Iti “Nyamara nubwo bakora ibi byaha, abagize ASBL bemewe n’amategeko y’u Bubiligi mu izina “Jambo ASBL” binjiye mu bukangurambaga bugamije guharabika u Rwanda, bagiye bakora ingendo zihoraho mu burasirazuba bwa Congo kuhahurira n’abagize FDLR.”

Ibi bikorwa bizwi na Leta y’u Bubiligi kandi izi neza ko abagize FDLR barimo abasize bakoze Jenoside yakorewe Abatutsi, bakaba n’intandaro y’ubugizi bwa nabi mu Burasirazuba bwa Congo burimo ibikorwa byo kwica abasivili n’ihohotera.

Kuba inkuru nk’izo zitambuka mu binyamakuru bikomeye mu Bubiligi, u Rwanda rusanga biteye inkeke byongeye ntiruhabwe umwanya wo kugira icyo ruvuga ku byo rushinjwa.

Ati “U Rwanda rutangajwe nuko ku ngingo nk’izo zikomeye byongeye muri iki gihe cy’amakuru menshi y’ibihuha, ibinyamakuru bikomeye bitigeze bifata umwanya wo kuvugisha abahagarariye Guverinoma y’u Rwanda ku birego byahimbwe bikanyuzwa mu nkuru zabyo, bihabanye n’amahame agenga abanyamakuru mu Bubiligi.”

Bakomeje bagira bati “Inkuru zatambutse mu binyamakuru Le Soir na De Morgen cyangwa se Nieuwsblad, ni bimwe mu bigize ubwo bukangurambaga bwateguwe bugamije kuyobya ngo ibikorwa by’iterabwoba bikorwa n’iyo mitwe bititabwaho.”

U Rwanda rwakunze kwinubira uburyo u Bubiligi buha rugari ibikorwa by’abashaka kuruhungabanyiriza umutekano. Nko mu kwezi gushize, hari ibiganiro byateguwe n’abahakana bakanapfobya Jenoside yakorewe Abatutsi byateguwe muri Kaminuza zikomeye muri icyo gihugu nka Kaminuza Gatolika ya Leuven no muri muri Vrije Universiteit Brussel (VUB).

Iki gihugu kandi muri Mata cyatoye itegeko rihana abapfobya n’abahakana Jenoside yakorewe Abatutsi ariko ntawe urafatwa ngo abihanirwe kandi ibikorwa bigamije kuyipfobya biba kenshi.

Faustin Twagiramungu umwe mu bayobora MRCD nawe amaze igihe kinini aba mu Bubiligi akanitabira ibikorwa byiga ku guhungabanya u Rwanda
Paul Rusesabagina uyobora MRCD ni umwe mu baba mu Bubiligi bakahakorera n'ibikorwa byabo bigamije guhungabanya u Rwanda
Bamwe mu bagize Jambo ASBL batemberera kenshi muri Congo guhura n'abagize umutwe w'iterabwoba wa FDLR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza