00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza bwemeje ikoreshwa ry’ibinini bivura Covid-19

Yanditswe na Bukuru JC
Kuya 4 Ugushyingo 2021 saa 02:32
Yasuwe :
0 0

Ibinini bya Molnupiravir byagaragaje ubushobozi bwo kuvura Covid-19 byemerewe gukoreshwa n’abarwaye icyo cyorezo mu Bwongereza.

Ibi binini bizajya bihabwa abarwayi bazahajwe na Covid-19, umurwayi abihabwe inshuro ebyiri ku munsi, kandi yemerewe kubifata ari mu rugo.

BBC yatangaje ko ubushakashatsi bwakorewe kuri ibi binini, bwagaragaje ko bivura ibicurane, bikagabanyiriza uwarwaye Covid-19 n’izindi ndwara zisa nayo ibyago byo kujya mu bitaro cyangwa gupfa.

Minisitiri w’Ubuzima mu Bwongereza, Sajid Javid, yavuze ko ari inkuru nziza kuba igihugu cye aricyo cya mbere cyemeye ikoreshwa ry’ibyo binini ku barwariye Covid-19 mu ngo.

Ibinini bya Molnupiravir byakozwe n’Ibigo by’Abanyamerika birimo Merck, Sharp and Dohme (MSD) na Ridgeback Biotherapeutics. Ni byo binini bya mbere bivura Covid-19 byagiye hanze, aho kuba imiti isanzwe iterwa binyuze mu nshinge.

Uwo muti akamaro kawo ni uko winjira mu ntimatima ya virusi za Covid-19, ukazibuza kororoka binyuze mu guhindura imikorere yazo ku buryo ingano ya virusi ziba ziri mu mubiri ikomeza kuba nto, indwara igatakaza ubukana.

Merck yatangaje ko hagikorwa ubushakashatsi kugira ngo uyu muti uzanagire ubushobozi bwo guhangana n’ubwoko bushya bwa Covid-19.

Ibi binini byemerewe gukoreshwa mu Bwongereza ku bantu bafite ibyago byo kuremba nk’abafite umubyibuho ukabije, izabukuru, diabète, umutima n’izindi.

U Bwongereza bwatumije ibinini 480 000 bya molnupiravir. Ntabwo amafaranga byatanzweho yatangajwe.

Ibindi bihugu birimo Australia, Singapore na Koreya y’Epfo nabyo byamaze gutumiza ibi binini.

Ibi binini bifite ubushobozi bwo kubuza virusi ya Corona kororoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .