Twatuza dute hari abangavu bari guterwa inda?-Madamu Jeannette Kagame

Yanditswe na Ferdinand Maniraguha
Kuya 10 Gashyantare 2020 saa 03:42
Yasuwe :
0 0

Madamu Jeannette Kagame yibukije abafasha b’abakuru b’ibihugu bya Afurika ndetse n’abafatanyabikorwa ko ntawe ukwiriye gutuza mu gihe Afurika y’Iburasirazuba no muri Afurika y’Amajyepfo, hafi umwe mu bangavu batanu baterwa inda buri mwaka.

Yabitangaje kuri uyu wa Mbere tariki 10 Gashyantare mu nteko rusange ya 24 y’ Umuryango uhuza abadamu b’abakuru b’ibihugu bya Afurika, OAFLAD yabereye Addis Abeba muri Ethiopia ahari kubera inama ya 33 y’abakuru b’ibihugu na Guverinoma bigize Umuryango wa Afurika Yunze Ubumwe (AU).

Madamu Jeannette Kagame, umwe mu batanze ikiganiro kivuga ku “Uburinganire no kongerera abagore ubushobozi, inzira igana kuri Afurika twifuza’, yavuze ko muri Afurika hakiri ibibazo byinshi byugarije umuryango bituma iterambere ry’umwana w’umukobwa n’umugore ritagerwaho uko bikwiriye.

Yagarutse ku nyingo zagize zikorwa n’Umuryango Mpuzamahanga wita ku bikorwa by’abaturage (UNFPA), zerekanye ko mu bikibangamiye umuryango harimo ibibazo byo gushyingira abana bakiri bato, ruswa ishingiye ku gitsina, ibiyobyabwenge n’ihohoterwa rishingiye ku gitsina.

Madamu Jeannette Kagame yavuze ko akenshi ibijyanye n’ubuzima bw’imyororokere, bifatwa nk’icyizira mu miryango y’Abanyafurika ntibiganirizwe urubyiruko ari nacyo cyuho gituma ibibazo bishingiye kuri uko kutamenya bikomeza kwiyongera.

Yagize ati “Turabizi ko ibi ari ibintu bitavugwaho mu miryango yacu. Dukwiriye kugira impungenge ko icyuho cyo kuba umwana n’umubyeyi bataganira bihagije, n’ubushobozi buke bwo kubona amakuru kuri serivizi z’ubuzima bw’imyororokere, ari imbogamizi ziri gutuma tutagera kuri Afurika twifuza kandi urubyiruko rwacu aribyo rukeneye.”

Yavuze ko ari umukoro ku bitabiriye iyo nteko rusange, gukoresha imbaraga zabo zose bagakuraho izo mbogamizi zituma abangavu benshi bagiterwa inda muri Afurika yo munsi y’Ubutayu bwa Sahara.

Ati “Ese twatuza dute tuzi ko muri Afurika y’Iburasirazuba no muri Afurika y’Amajyepfo, hafi umwe mu bangavu batanu baterwa inda? Nta gushidikanya, ntitugomba kuruhuka mu gihe muri Afurika yo munsi y’Ubutayu bwa Sahara , nibura kimwe cya gatatu cy’inda ziterwa abakobwa ziba zitifuzwa, bigatuma haba ibibazo mu gutwita izo nda no kuzibyara, bishobora gutera urupfu mu bakobwa bari hagati y’imyaka 15 na 19.”

Imibare ya OMS igaragaza ko nibura abakobwa miliyoni icumi buri mwaka bari hagati y’imyaka 15 na 19 baterwa inda zitifuzwa mu bihugu biri mu nzira y’Amajyambere.

Nibura miliyoni 5.6 z’abo bakobwa batewe inda ari abangavu, muri bo miliyoni 3.9 bazikuramo mu buryo butizewe bikabaviramo impfu cyangwa ibindi bibazo bijyanye n’ubuzima.

Madamu Jeannette Kagame yavuze ko u Rwanda rwiyemeje kugera ku Ntego z’Iterambere rirambye mu mwaka wa 2030, ruhereye ku kwita ku bibazo bishingiye ku buzima bw’imyororokere mu rubyiruko kuko ari wo musingi w’iterambere ry’imibereho myiza n’ubukungu.

Yatanze ingero z’ibyakozwe birimo kuvugurura amategeko, gushyiraho ingamba urubyiruko rubigizemo uruhare n’imikoranire y’inzego mu gushimangira uburenganzira ku buzima bw’imyororokere.

Yagarutse ku byakozwe n’umuryango yashinze, Imbuto Foundation wagiye utangiza gahunda zitandukanye zigamije kugeza ku rubyiruko amakuru ku buzima bw’imyororokere, gufasha abangavu bagiye baterwa inda n’ibindi.

Ati “Binyuze mu mushinga uhuriweho wa Baho Neza, ubu turi mu bukangurambaga buzenguruka igihugu cyose ku buzima bw’imyororokere, kuboneza urubyaro no kwirinda inda ziterwa abangavu ari nako dutanga imfashanyigisho zifasha ababyeyi kuganira n’abana babo”

“Turi gufasha ababyaye bakiri bato bari hagati y’imyaka 10 na 19 baturuka mu miryango itishoboye kubona serivisi zijyanye no kubyara ndetse no kurera, bahabwa ubujyanama no kongera kwibona mu muryango kuko basa nk’abahabwa akato.”

Madamu Jeannette Kagame ashingiye ku bunararibonye u Rwanda rufite bitewe n’ibyo rwanyuzemo, igikenewe ngo ibibazo by’urubyiruko cyane cyane abangavu ku buzima bw’imyororokere bikemuke ari uko “kuvugurura amategeko, gukemura ikibazo cy’imyaka yo gushyingirirwaho, kubona amakuru na serivisi bijyanye n’ubuzima bw’imyororokere bikwiriye gufatwa nk’ikibazo cyihutirwa.”

Yavuze ko ikindi kigombwa kwitawaho ari uruhare rw’urubyiruko haba mu igenamigambi n’ishyirwa mu bikorwa rya serivisi zijyanye n’uburenganzira ku buzima bw’imyororokere.

Yagize ati “Mureke dukoresha urubuga dufite , dusangire ubunararibonye dufite mu guteza imbere imiryango yacu.”

OMS igaragaza ko nibura buri mwaka, abakobwa bafite imyaka iri hagati ya 15 na 19 bagera kuri miliyoni 12 ku Isi hose baterwa inda, barimo abakobwa ibihumbi 777 baterwa inda bari munsi y’imyaka 15 mu bihugu biri mu nzira y’Amajyambere.

Madamu Jeannette Kagame yagaragaje ko intego z'iterambere rirambye zitagerwaho ubuzima bw'imyororokere mu rubyiruko butitaweho, by'umwihariko ku bana b'abakobwa
Madamu Jeannette Kagame yasabye abafasha b'abakuru b'ibihugu muri Afurika guhuza imbaraga bagahashya ibibazo bibangamiye iterambere ry'abana b'abakobwa
Madamu Jeannette Kagame (hagati) yagaragaje ko nta kuruhuka mu gihe hakiri umubare munini w'abangavu bagiterwa inda
Abitabiriye basabwe kuba umusemburo w'impinduka mu guteza imbere uburenganzira ku buzima bw'imyororokere ku bangavu muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza