SP Kanamugire yaburiye abakerensa COVID-19, agaruka ku biroshye mu mihanda ubwo Amavubi yatsindaga

Yanditswe na Prudence Kwizera
Kuya 31 Mutarama 2021 saa 06:44
Yasuwe :
0 0

Umuvugizi wa Polisi y’u Rwanda mu Ntara y’Amajyepfo, SP Kanamugire Théobald, yavuze ko umubare munini w’abafatwa barenze ku mabwiriza yo kwirinda icyorezo cya Coronavirus ari urubyiruko kandi abenshi baba nta mpamvu igaragara bafite yatumye bayarengaho.

Yabigarutseho mu kiganiro yatanze kuri Radio Salus kuri uyu wa Gatandatu kigamije kwibutsa abaturage ko ubwo birohaga mu mihanda bishimira intsinzi y’Ikipe y’Igihugu Amavubi bakoze icyaha abasaba kutazabyongera.

Yavuze ko kuva ku itariki 18 Mutarama 2021 ubwo Inama y’Abaminisitiri yavugururaga amabwiriza yo kwirinda icyorezo cya Coronavirus, Umujyi wa Kigali ugashyirwa muri Guma mu rugo naho abatuye mu tundi turere bagasabwa kuguma mu turere twabo ndetse saa Kumi n’ebyiri z’umugoroba bose bakaba bari mu ngo zabo, bukeye bwaho mu Ntara y’Amajyepfo hagaragaye umubare munini w’abayarenzeho.

Ati “Uhereye nko ku itariki 19 Mutarama ubona imibare y’abo dufata barenze ku mabwiriza igenda igabanuka. Ku itariki 19 hafashwe abantu 580 barenze ku mabwiriza mu Ntara y’Amajyepfo yose, ku wa 20 Mutarama babaye 380 naho ku wa 21 Mutarama baba 260. Urumva ko bagenda bagabanuka mu by’ukuri ari nabyo dushimira abaturage ko bagenda bubahirza amabwiriza kugira ngo birinde.”

Yibukije ko kubahiriza amabwiriza bidakwiye kuba nko kugaragaza ko umuntu yubashye Polisi cyangwa ayitinye ahubwo bigomba kuba mu rwego rwo kurinda ubuzima bwabo.

SP Kanamugire yavuze ko abafatwa barenze ku mabwiriza yo kwirinda Coronavirus ari urubyiruko ruri hagati y’imyaka 18 na 30 kandi abenshi nta mpamvu ifatika baba bafite yatumye babikora.

Ati “Abo dufata akenshi n’ubu wanyarukira muri stade ukareba abariyo, usanga ari urubyiruko kuko nta muntu turafata uri hejuru y’imyaka 50 yarenze ku mabwiriza, abenshi usanga bari mu myaka iri hagati ya 18 na 30 bigaragara ko ari urubyiruko kandi bikagaragara ko nta hantu mu by’ukuri bavuye hafatika.”

“Niyo umubajije wenda kugira ngo unamufashe usanga nta hantu avuye hafatika, usanga nta na gahunda afite. Ngira ngo 98% usanga ari urubyiruko, wenda n’abakuru baba bayarenzeho usanga hari ahantu avuye mu by’ukuri ntako atagize kugira ngo yubahirize ya masaha ariko bikamwangira bitewe n’aho aba avuye.”

Yagiriye inama urubyiruko rwumva ko nta cyaruhangara, arwibutsa ko Coronavirus ari icyorezo kidasanzwe kandi byagaragaye ko cyica buri wese kititaye ku myaka afite cyangwa igihagararo.

Yagarutse ku bihano bihabwa abafatwa barenze ku mabwiriza avuga ko ikigamijwe ari ukwigisha.

Ati “Burya igihano kirigisha, kigisha wowe ubwawe kikanigisha n’undi wakubonye uhanwa cyangwa se wamenye ko wahanwe.”

Biriya ni imyigaragambyo itemewe

SP Kanamugire yagarutse ku byagaragaye mu ijoro ryo ku wa 26 rishyira ku wa 27 Mutarama 2021 ubwo bamwe mu Banyarwanda birohaga mu mihanda basakuza bishimira intsinzi y’Ikipe y’Igihugu Amavubi, avuga ko ibyo bakoze ari imyigaragambyo itemewe kandi bihanwa n’amategeko.

Icyo gihe ikipe y’u Rwanda yatsinze iya Togo ibitego 3-2, ibona itike yo gukomeza muri ¼ cya Shampiyona Nyafurika ihuza abakinnyi bakina imbere mu bihugu byabo (CHAN 2020) iri kubera muri Cameroun.

Yavuze ko no mu Ntara y’Amajyepfo byabaye ariko ku rwego rudakabije kuko hari abavuye mu ngo zabo bavuza induru.

Ati “Mu Ntara y’Amajyepfo ntabwo byabaye cyane usibye ko abantu wumvaga ko bavuza induru bari nko hanze, naho byarabaye ariko ntabwo ari benshi cyane, cyane bari mu rugo ukumva barasakuza cyane bigaragara ko harimo wenda abantu bo ku ruhande, ukumva ntabwo ari umuryango umwe ni abantu benshi.”

Yakomeje avuga ko ibyabaye i Kigali aho abantu basohotse bakirukanka ari icyaha gihanwa n’amategeko.

“Ariko nk’ibyo twabonye i Kigali aho abantu basohotse bakirukanka, ubundi biriya ntabwo byemewe, ubundi ni icyaha gihanwa n’amategeko, ni imyigaragambyo itemewe, biriya ni nko kwigaragambya.”

Yasabye abaturage kurushaho kwitwararika bakishimira intsinzi bari mu ngo zabo hamwe n’imiryango yabo kandi bazirikana ko icyorezo cya Coronavirus ntaho cyagiye.

Yashimangiye ko uzongera kugaragara mu bikorwa nk’ibyabaye mu Mujyi wa Kigali azakurikiranwa n’ubutabera kuko azaba akoze icyaha.

Ati “Uzaramuka abigaragayemo azakurikiranwa n’ubutabera kuko ni icyaha cyo gukora imyigaragambyo itemewe. Umuntu agomba kurebera uwo mupira mu rugo akishimana n’abo mu rugo.”

Bamwe mu baherutse kurazwa muri Stade Huye barenze ku mabwiriza yo kwirinda Coronavirus
Mu Ntara y'Amajyepfo umubare munini w’abafatwa barenze ku mabwiriza yo kwirinda Coronavirus ni urubyiruko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .