Ruswa n’icyenewabo byamunze inzego za Komisiyo ya AU, Dr Nsanzabaganwa ahanzwe amaso

Yanditswe na Ishimwe Israel
Kuya 20 Gashyantare 2021 saa 01:25
Yasuwe :
0 0

Igenzura ryakozwe mu mwaka ushize ryagaragaje ibibazo birimo icyenewabo, ubushobozi buke mu kazi n’ibyuho mu masezerano byamunze inzego zitandukanye muri Komisiyo y’Umuryango wa Afurika Yunze Ubumwe (AUC).

Muri iyi raporo yabonywe n’ikinyamakuru Devex, hanavuzwemo amanyanga mu mishahara y’abakozi n’ibindi bibafasha mu kazi, birimo gutera inkunga abafasha b’abakozi batabarutse bakorera AUC ndetse n’imiryango yahawe inzu ebyiri [yari yemerewe imwe].

Igenzura ryatangijwe n’Akanama Nshingwabikorwa k’Umuryango wa Afurika Yunze Ubumwe (AU), ryakozwe na Sosiyete PricewaterhouseCoopers yakoze iperereza ‘isanga hari ibitagenda neza, ikoreshwa nabi ry’umutungo wa Komisiyo ya AU’, mu nzego zose zirimo ibijyanye no kwinjiza abakozi bashya no kuvugurura amasezerano mashya.

Raporo yatangajwe yemeje n’ibirego bijyanye n’icyenewabo, ruswa, gukoresha nabi umutungo n’ihohoterwa rishingiye ku gitsina byaranze AUC.

Perezida w’Ihuriro ry’Abakozi ba AU, Sabelo Mbokazi, yemeje ko iyo raporo yaganiriweho n’inzego za AU, anavuga ko icyemezo cyafatiwe mu Nama ya AU yabaye muri uku kwezi, asaba ko hafatwa ingamba zikakaye ku biyirimo.

Yagize ati “Twe nka Komite Nshingwabikorwa y’Ihuriro ry’Abakozi ba AU ntituzashyigikira abakozi bacu bagize uruhare mu bikorwa byose bifitanye isano na ruswa.’’

Abakoze igenzura basanze abakozi benshi bari bafite amasezerano y’igihe gito ndetse babona ko ashobora kuba intandaro yo guhohoterwa by’umwihariko ku bategera amaboko abandi ngo bahabwe akazi.

Mu myaka itandatu yakorewe igenzura hagati ya 2012-2018, byagaragaye ko 71% by’abakozi 3,328 bari bafite amasezerano y’igihe gito ndetse amasezerano amara umwaka umwe cyangwa ibiri yemewe y’abakozi 382 avugururwa inshuro eshatu, yavuguruwe nibura inshuro imwe nyuma y’igihe cyagenewe kubahirizwa.

Ibi byiyongeraho ko abakozi 212 bakoraga muri AUC bari barengeje imyaka 62, nyamara bakwiye kuba baragiye mu kiruhuko cy’izabukuru.

Inararibonye muri Politiki akaba yaranabaye Umuyobozi wa UNFPA na Oxfam muri AU, Désiré Assogbavi, yavuze ko ibi bibazo bishobora guha icyuho ihohoterwa.

Ati “Aha ni ho hashobora kuboneka ihohoterwa rishingiye ku gitsina, aha ni ho ihohoterwa rishobora kuboneka. Kuko iyo uzi ko amasezerano yawe ari amezi atatu uzaba usabiriza ku muntu ukugenzura kandi uba witeguye gutanga buri cyose kugira ngo amasezerano yawe avugururwe.’’

Mu 2018, iperereza ryakozwe mu nzego za AU ryasanze hari ibibazo bijyanye n’ihohoterwa rishingiye ku gitsina muri komisiyo.

Raporo yerekanye ko iryo hohoterwa ahanini ryatijwe umurindi n’abagenzuzi bakurikiranaga abakozi b’igitsina gore mu nshingano zabo ndetse abakozi bafite amasezerano y’igihe gito, urubyiruko rw’abakorerabushake n’abimenyereza umwuga ni bo bagizweho ingaruka cyane. Muri ibyo birego, abayobozi bakuru mu mashami atandukanye ni bo batunzwe agatoki muri ibyo bikorwa.

Muri icyo gihe, Perezida wa Komisiyo ya AU, Moussa Faki Mahamat, yijeje ko hagiye kugira igikorwa kuri ibyo bibazo ariko bisa nk’aho kugeza ubu nta mpinduka zifatika zagaragaye.

Sabelo Mbokazi yakomeje ati “Uko tubibona ni uko hakozwe ibintu bike.’’

Igenzura riheruka gukorwa ryerekanye ko habayeho amanyanga mu kwinjiza abakozi bashya mu kazi, abemererwa gukora ibizamini byo kuvuga, abagashyirwamo batagasabye, abagahabwa nta bushobozi no kunanirwa gushyiraho abakwiye.

Abakoze igenzura kandi basanze abakozi barenga 100 muri Komisiyo ya AU bari bafite abandi bantu babinjijemo ndetse bamwe mu bakozi byaragoranye gusuzuma urwego rw’ubushobozi bafite mu kazi.

Assogbavi ati “Usanga abantu badashobora kwerekana ko bakwiye kuba bari mu myanya runaka. Ibintu nk’ibi bibaho muri komisiyo.’’

-  Icyizere cyo gukorera mu mucyo gihanzwe Dr Nsanzabaganwa

Muri Nyakanga 2016 nibwo Perezida Kagame yahawe inshingano zo gutegura no gukurikirana amavugurura akenewe muri AU ngo ibashe kugeza Afurika ku cyerekezo yihaye cya 2063.

Muri aya mavugurura biteganywa ko ibihugu by’ibinyamuryango muri AU bitora Perezida na visi Perezida ba komisiyo ya AU ndetse n’abakomiseri muri komisiyo zitandukanye. Ibi byakuyeho kuba perezida yakwishyiriraho komiseri ashaka hatabayeho amatora.

Nyuma y’ibibazo byaranze uyu muryango, ubu amaso ahanzwe Dr Nsanzabaganwa Monique watorewe kuba Umuyobozi wungirije wa Komisiyo y’Umuryango w’Ubumwe bwa Afurika ko ashobora kugarura umucyo mu mikorere yawo.

Umushakashatsi muri Institute for Security Studies, Shewit Woldemichael, yavuze ko mu nshingano ze, Dr Nsanzabaganwa azita ku ‘gukuraho no gushyira abakozi benshi mu kiruhuko cy’isabukuru’ ndetse agahangana ‘n’ibirego byisukiranya bijyanye n’icyenewabo, ruswa, gukoresha nabi umutungo, gukoresha imbaraga z’ubuyobozi nabi n’ihohoterwa rishingiye ku gitsina.’

Abakozi bo muri AUC n’abasesenguzi bafite icyizere ko Dr Nsanzabaganwa ashobora guhindura no kunoza imikorere ya komisiyo.

Mbokazi yagize ati “Twamenyeshejwe ko Umuyobozi wungirije ugiye kujyaho ni umuntu uzwi mu miyoborere myiza, ni umuntu ufite iyo miterere, afite indangagaciro kandi aha agaciro imiyoborere. Twizeye ko mu gukoresha inshingano ze azashobora kwerekana ikinyuranyo.’’

Yavuze ko kugira ngo Dr Nsanzabaganwa agere ku ntsinzi, nta kintu kigomba kwivanga mu bikorwa bye.

Akomeza ati “Twumva ko ibiro by’Umuyobozi n’Umwungirije byahawe inshingano zitandukanye n’iteka rya AU. Niba buri wese agomba kuzuza inshingano ze uko bikwiye ndetse iteka ryashyizweho rikubahirizwa nta kibazo cyavukamo.’’

Assogbavi we yanavuze ko usibye ubumenyi afite, Dr Nsanzabaganwa ni Umunyarwanda ugomba gukomeza kubahiriza amavugurura yayobowe na Perezida we, Paul Kagame.

Ati “Perezida we ni we wayoboye amavugurura yibanze ku gukorera mu mucyo muri Komisiyo ya AUC.’’

Dr Nsanzabaganwa aheruka kubwira RBA ko afite inshingano yiteguye kuzuza neza zijyanye n’imari, imiyoborere, imicungire y’abakozi, n’ibijyanye n’imigendekere myiza y’ibikorwa bya AUC muri rusange.

Yagize ati “Aho rero ni ahantu twumva nk’igihugu hari inararibonye dufite twifuza kuba twasangiza abandi, nkaba nagira ngo mbwire Abanyarwanda n’inshuti zacu n’ibindi bihugu gukomeza gushyigikira uyu muryango n’ibikorwa byawo. Ndabyiteguye ariko kandi bizasaba kugira ubufatanye n’izindi nzego ndabyizeye rero nzabishobora.”

Mu cyiciro cya mbere cyo kunoza imikorere muri AUC biteganyijwe ko abayobozi bakuru bazakoreshwa isuzuma mu kureba ubumenyi no gusesengura ubumenyi bafite kandi rikoreshwe n’ikigo cyigenga.

Dr Nsanzabaganwa Monique watorewe kuba Umuyobozi wungirije wa Komisiyo y’Umuryango w’Ubumwe bwa Afurika yitezweho kwinjiza impinduka mu nshingano nshya yahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .