Rubingisa yatangiye gutera ubwoba Dr Martin nyuma yo gushyira hanze imigambi mibisha ye na Rusesabagina

Yanditswe na Musangwa Arthur
Kuya 25 Werurwe 2021 saa 05:35
Yasuwe :
0 0

Rubingisa Providence, Umunyarwanda wahungiye muri Leta Zunze Ubumwe za Amerika yumvikanye atera ubwoba Dr Martin Michelle washyize hanze imigambi mibisha yagiranaga na Paul Rusesabagina ukurikiranyweho iterabwoba n’inkiko zo mu Rwanda.

Ku wa Gatatu, tariki ya 24 Werurwe 2021, ni bwo Urukiko rukuru ruburanisha Ibyaha Mpuzamahanga n’ibyambukiranya Imipaka rwumvise ubuhamya bwa Dr Martin mu rubanza ruregwamo Paul Rusesabagina n’abandi bagera kuri 20, ku byaha by’iterabwoba birimo ibishingiye ku bitero byakozwe n’Umutwe wa FLN mu myaka ya 2018 na 2019.

Dr Martin usanzwe ari umwarimu muri Kaminuza muri Amerika, yavuze ko yatangiye kumenyana na Rubingisa mu mwaka wa 2009, ari nabwo yazaga kuvumbura imikoranire ye na Rusesabagina mu muryango Hotel Rwanda Rusesabagina Foundation.

Uyu Munyamerikakazi yari umukorerabushake muri uwo muryango yinjiyemo ku busabe bwa Rubingisa, nyuma y’uko abo bombi bahujwe n’inshuti ubwo Dr Martin yashakaga impunzi yatanga ubuhamya mu ishuri yigishagamo, bakamurangira Rubingisa.

Dr Martin yavuze uburyo yabanje gukeka ko umuryango Hotel Rwanda Rusesabagina Foundation ugamije ibikorwa by’ubugiraneza ariko nyuma akaza kuvumbura ko ari umurongo wo kunyuzamo inkunga zigamije guhungabanya umutekano w’u Rwanda ndetse no gufasha abahakana bagapfobya Jenoside yakorewe Abatutsi.

Ibyinshi yavuze ko yagiye abivumbura abibonye muri email Rubingisa yajyaga amusaba kumusubiriza kuko atumvaga neza Icyongereza ndetse n’inama zitandukanye uwo mugabo yagiye yitabira.

Mu byo Martin yagaragaje kandi harimo imikoranire ya Rusesabagina na Rubingisa n’ishyaka bari bahuriyemo rya PDR Ihumure, ndetse n’umutwe wa FDLR wiganjemo abasize bakoze Jenoside mu Rwanda.

Yavuze kandi uburyo Rusesabagina na PDR Ihumure bafashije mu ishingwa rya PS Imberakuri ubwo yari ikiyobowe na Me Ntaganda Bernard, bashaka ko Ntaganda ahangana na Perezida Kagame mu matora ya 2010 hanyuma yatsinda Rusesabagina akaba ari we uba Perezida.

Ubuhamya bwose Dr Martin yatanze, yavuze ko abufitiye ibimenyetso simusiga bishingiye ku nyandiko na emails z’umwimerere zabaga zoherejwe cyangwa zohererejwe Rubingisa kuko yageze aho amwizera akamuha ijambo ry’ibanga (Password) yakoreshaga, mbere yo gucana umubano na we mu 2012 ubwo yabonaga ko ibikorwa barimo ari bibi.

Rubingisa yatangiye kumutera ubwoba

Dr Rubingisa aracyaba muri Leta Zunze Ubumwe za Amerika, igihugu cy’amavuko cya Dr Martin.

Nyuma yo kumenya ko ibikorwa bye na Rusesabagina byashyizwe hanze, ibinyamakuru by’abatavuga rumwe na Leta y’u Rwanda byatangiye gushakisha Rubingisa ngo agire icyo avuga ku byamuvuzweho.

Ku isonga yahise atumirwa na Radio Itahuka y’Umutwe w’Iterabwoba wa RNC, ku mugoroba wo kuri uyu wa Gatatu. Rubingisa yabajijwe ibibazo bitandukanye mu gihe cy’amasaha arenze abiri ariko nta na hamwe yigeze avuga ko Dr Martin ibyo yagaragaje amubeshyera.

Yagize ati “Ikintu cyanshimishije, ni uko uriya mudamu ntaho yavuze ko buriya butegetsi ntaburwanya cyangwa se amahirwe nagize ni uko atigeze ahimba email wenda ndimo kugambanira abantu barwanya ubutegetsi. Ibyo bintu mbifitiye ishema.”

Kuba yarakoranaga na FDLR, umutwe ushinjwa kubamo abasize bakoze Jenoside yahitanye Abatutsi basaga miliyoni, Rubingisa yavuze ko ntacyo abyicuzaho. Hejuru ya Jenoside, FDLR yagiye igaba ibitero bitandukanye ku Rwanda ikica abaturage b’inzirakarengane ndetse no mu mashyamba ya Congo aho ibarizwa, yishe ibihumbi by’abaturage ba Congo bazira ubusa.

Dr Martin mu buhamya yatanze, yavuze ko ku wa 17 Ukwakira 2007, Rubingisa yanditse ibaruwa avuga ko Ignace Murwanashyaka wayoboraga FDLR ari kuzarira mu ishyirwa mu bikorwa ry’ibyo yemeye, ariko Rusesabagina asaba ko bahurira iwe mu Mujyi wa Bruxelles.

Muri iyo baruwa havugwamo ko hari abantu bazanyuzwaho amafaranga bo mu Mujyi wa Goma muri Repubulika Iharanira Demokarasi ya Congo.

Murwanashyaka yatangiye gushakishwa n’u Rwanda mu 2005 kubera ibyaha bya Jenoside akekwaho ndetse afatirwa ibihano bitandukanye n’Umuryango w’Abibumbye.

Yafatiwe mu Budage mu Ugushyingo 2009 akurikiranyweho ibyaha 26 byibasiye inyokomuntu n’ibindi 39 by’intambara, byakorewe mu Burasirazuba bwa Repubulika Iharanira Demokarasi ya Congo. Mu 2015 yakatiwe igifungo cy’imyaka 13 ageza mu 2019 ubwo yapfiraga muri gereza atarangije igihano.

Rubingisa mu magambo atarimo kwicuza, yavuze ko umuntu wese urwanya ubutegetsi bw’u Rwanda uko yaba ameze kose bakorana.

Ati “Umuntu wese urwanya buriya butegetsi yaba FDLR, yaba FLN […] abantu bose, umuntu wese urwanya buriya butegetsi njyewe namuvugisha. Sinahakana ngo ntabwo navugishije FDLR […] abantu bo muri FDLR n’uyu munsi hari uwo twavuganye. Mbavugisha buri munsi.”

Yabajijwe niba atazajya kurega Dr Martin ko yamwinjiriye muri emails, asa nk’ujijinganyije ageze aho avuga ko azabanza kureba niba nta bo bavuganye nyuma bakaza gupfa, ngo kuko byashoboka ko Dr Martin ari we wabatanze.

Rubingisa mu buryo bw’iterabwoba, yavuze ko azihorera nyuma y’uko Dr Martin amushyize hanze.

Ati “Arabizi ko nanjye ndi umurwanyi ntapfa kuyamanika. Ikintu cyo cyizewe ni uko hari ibintu bizakorwa kandi bikaba hari umusaruro byatanga cyangwa hari ingaruka byamugiraho. Ntabwo Umunyamerika agambana kuriya cyangwa se ajya kuvuga amahomvu nk’ariya ashobora kwicisha abantu ngo bigende gutyo , agomba kubyishyura mu buryo bumwe cyangwa ubundi.”

Iterabwoba ryifashishije ibikangisho ni icyaha gihanirwa mu bice bitandukanye bya Amerika harimo no muri Illinois aho Rubingisa abarizwa.

Amategeko ahana ibyaha muri iyo Leta avuga ko ubikoze ahanishwa igifungo kiri hagati y’imyaka ibiri n’icumi, n’amande ashobora kugera ku bihumbi 25 by’amadolari.

Rubingisa aba mu Mujyi wa Chicago, aho yageze mu mwaka wa 2002 ubwo yavaga mu Rwanda avuga ko ahunze, ndetse akagenda abeshya ko yarokotse Jenoside yakorewe Abatutsi.

Dr Michelle Martin wabaye umukorerabushake muri Hotel Rwanda Rusesabagina Foundation yavuze ku mugambi wa Rusesabagina wo gutera inkunga ibikorwa by'iterabwoba
Rubingisa Providence ari mu bayobozi b'Ishyaka PDR Ihumure ryayoborwaga na Rusesabagina Paul
Paul Rusesabagina akurikiranyweho uruhare mu byaha icyenda bifitanye isano n'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .