Rubavu: Abaturage bagaragaje ko hari abayobozi babaka amafaranga mbere yo kubaha serivisi

Yanditswe na Mukwaya Olivier
Kuya 11 Kamena 2018 saa 08:49
Yasuwe :
0 0

Bamwe mu baturage bo mu Murenge wa Gisenyi mu Karere ka Rubavu bavuga ko bacibwa amafaranga adakwiye mbere y’uko basinyirwa ibyemezo bimwe na bimwe basaba mu nzego z’ibanze.

Ayo mafaranga ngo atuma binubira serivisi bahabwa kandi bitari bikwiye ko bayasabwa ari uko bagannye ubuyobozi hari icyo babukeneyeho.

Abimana Jean de la Paix wo mu Murenge wa Gisenyi yagize ati ‘‘Ujya mu nzego z’ibanze wahagera ngo ishyura amafaranga y’umutekano, ukayatanga, kandi ngo wagiye gusaba icyemezo gisimbura indangamuntu kubera ko wayitaye, bakagusaba amafaranga y’umutekano ngo ni 1000, wajya mu wundi mudugudu ngo ni 2000 Frw, uri kumva ko ntakuri kurimo’’.

Bahati Jean we yagize ati “Ashobora kukubwira ngo ngurira ikarita ya telefoni cyangwa ngurira Fanta, urumva ko atari iriya fanta igura 500, ni Fanta yumvikana kugira ngo aguhe serivisi nziza’’.

Umunyamabanga Nshingwabikorwa w’Umurenge wa Gisenyi, Uwimana Védaste, avuga ko kuba hari bamwe mu bayobozi baca abaturage amafaranga bitwaje serivisi zimwe na zimwe ari ibintu bidakwiye.

Yagize ati “Ubundi kuva aho serivisi zegererejwe abaturage, serivisi ni ubuntu. Ni ukuvuga ngo niba ukeneye icyangombwa cy’amavuko gitangirwa ku Murenge, uretse amafaranga 500 wishyura ku Irembo nta yandi mafaranga duca umuturage.”

Yakomeje agira ati “Hari umusanzu w’irondo abaturage bagomba gutanga, amafaranga rimwe na rimwe abaturage batanga ku bw’imihigo, dufate nk’urugero kugura imodoka y’umutekano, kwishyura amafaranga y’isuku, ubwisungane mu kwivuza n’ibindi. Ibyo ni ubukangurambaga bukorwa, ariko ntutegera umuntu kuri serivisi ngo ubone kumwishyuza cya kindi’’.

Uyu muyobozi yashimangiye ko bagiye gukurikirana ikibazo cy’abo baturage bacibwa amafaranga mbere yo kubaha serivisi kandi ubikora abihanirwe.

Yakomeje agira ati “Namenye amakuru ko hari ahandi bishobora kuba bikiri, ibi byo turanabihanirwa iyo tubikora gutyo. Turaza kubikurikirana. Abaturage rero bamenye uburenganzira bwabo, nta muntu ukubaza ikintu runaka ngo ubwo utakoze iki nanjye singuha iki.”

Uwimana yavuze ko ku biro bya buri mukozi hariho ifoto ye na nimero ye ya telefoni n’icyo ashinzwe, ku buryo abaturage bakwiye kujya batanga amakuru igihe ikibazo nk’icyo kigaragaye.

Abaturage bamwe bo muri uyu Murenge wa Gisenyi bagaragaza ko hari amafaranga basabwa ari uko bagiye gusaba serivisi mu buyobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza