RSSB yakiriye arenga miliyari 10 Frw yunganira imisanzu ya mutuelle de santé

Yanditswe na Muhonzire Sylvine
Kuya 25 Mutarama 2021 saa 12:59
Yasuwe :
0 0

Ikigo cy’Igihugu cy’Ubwiteganyirize mu Rwanda, kivuga ko hagati y’ukwezi kwa Nyakanga n’Ukuboza 2020, cyakiriye inkunga ingana n’amafaranga y’u Rwanda miliyari 11.5 Frw yo kongerera ubushobozi atangwa mu bwisungane mu kwivuza ’mutuelle de santé’.

Ubusanzwe amafaranga ava mu misanzu y’abanyamuryango ba ’mutuelle de santé’ ntabwo aba ahagije kugira ngo hishyurwe imiti n’ibindi bijyanye n’ubuvuzi bikenerwa n’abarwayi bayikoresha, akaba ariyo mpamvu RSSB ikenera ubufasha buturutse muri leta no mu zindi nzego zitandukanye kugira ngo izibe icyuho cy’ayo mafaranga aba adahagije.

The New Times dukesha iyi nkuru yanditse ko mu mwaka ushize wa 2020, iki kigo cyakiriye miliyari 11.5 hagati y’ukwezi kwa Nyakanga n’Ukuboza, angana na 42. 6% muri miliyari 27 zari zikenewe.

Umuyobozi Mukuru wa RSSB, Regis Rugemanshuro, yavuze ko aya mafaranga yabafashije gukemura ibibazo bimwe na bimwe bya mutuelle de santé.

Muri Gicurasi 2020, ubwo imbanzirizamushinga y’ingengo y’imari izakoreshwa mu mwaka wa 2020/2021 yagezwaga ku bagize Inteko Ishinga Amategeko, RSSB yagaragaje ko impamvu itinda kwishyura amafaranga yakoreshejwe mu buvuzi bw’abakoresha mutuelle ari ukubera ikibazo cy’imisanzu idahagije yakirwa.

Ibintu bituma rimwe na rimwe abakoresha ubu bwishingizi hari imiti batabasha kubona.

Rugemanshuro yavuze ko amwe mu mafaranga bakiriye yavuye muri guverinoma mu gihe andi batarayabona kubera icyorezo cya Coronavirus cyakomye mu nkokora imikorere ya bamwe.

Ati “Tuvugana n’abo batarishyura, twizeye ko iki kibazo kizakemuka vuba kugira ngo twirinde ibyuho bishobora gutinza kwishyura amafaranga akoreshwa mu buvuzi.”

Mutuelles de Santé ifasha mu buvuzi abangana na 80% bagize hafi miliyoni 12 z’abaturage batuye mu Rwanda.

Hagendewe ku mibare itangwa n’iki kigo, mu mwaka wa 2019/2020, RSSB cyagize icyuho cy’amafaranga aturuka mu baterankunga ba Mutuelle angana na miliyari 20 Frw.

Ahaturuka ubwiganizi bwa Mutuelle

Iteka rya Minisitiri w’Intebe no 034/01 ryo ku wa 13/02/2020 ryerekeye inkunga z’ubwisungane mu kwivuza riteganya ahantu hatandukanye hagiye kujya hava amafaranga yo kunganira ubwisungane mu kwivuza harimo na 0,5 % akatwa ku mushahara w’abakozi baba abakorera Leta n’abakora mu nzego zigenga.

Iteka rivuga ko ku mafaranga azajya aturuka muri Leta, arimo miliyari 6 Frw azajya aturuka mu ngengo y’imari y’umwaka, yishyurwa na Minisiteri ifite imari mu nshingano zayo.

Iri teka risobanura ko buri mwaka Minisiteri ifite imari mu nshingano zayo izajya itangira 3 000 Frw buri muntu utishoboye uri mu cyiciro cya mbere cy’Ubudehe.

Ku mafaranga yishyurwa ku iyandikwa ry’imiti n’ibikoresho byo mu buvuzi, yishyurwa na Minisiteri ifite ubuzima mu nshingano zayo, 50% azajya nayo agenerwa kunganira Mutuelle de Santé mu gihe amafaranga yose (100%) yishyurwa n’abakora ubushakashatsi mu rwego rw’ubuzima nayo azajya agenerwa kuyunganira.

Iri teka rigaragaza kandi ko 10% by’amafaranga acibwa kuri serivisi zihabwa amasosiyete y’ubucuruzi akora ibikorwa by’imikino y’amahirwe izwi nka Betting, yishyurwa Minisiteri ifite ubucuruzi mu nshingano nayo azajya agenerwa kunganira ubu bwishingizi.

Iri teka risobanura ko 50% by’amafaranga yose atangwa mu kugenzura imiterere y’ibinyabiziga ‘Contrôle Technique’ ndetse na 10% acibwa abakoze amakosa mu muhanda, asanzwe yishyurwa Polisi y’igihugu nayo agiye kujya agenerwa kunganira Mutuelle de Santé.

Hari kandi amafaranga asanzwe acibwa abacuruza ibintu bitujuje ubuziranenge, yishyurwa ikigo cya Leta gifite ubuziranenge mu nshingano zacyo iri teka risobanura ko yose(100%) agiye kujya yunganira ubu bwishingizi ndetse n’amafaranga 100Frw ava ku mahoro yakwa kuri parikingi z’ibinyabiziga kuri buri saha imwe bihagaze, yishyurwa n’Umujyi wa Kigali.

Iri teka rigaragaza ko 10% by’amafaranga ava mu bukerarugendo agenewe uturere bireba, yishyurwa n’Urwego rushinzwe Iterambere mu Rwanda (RDB) agiye kugenerwa ubu bwishingizi.

Hari kandi ibihumbi 20Frw asanzwe ava mu ihererekanywa ry’imodoka yaguzwe n’ibihumbi 10 Frw kuri moto asanzwe yishyurwa ikigo cy’imisoro n’amahoro nayo agiye kuzajya yunganira ubu bwishingizi.

Rivuga ko 4.000 Frw kuri hegitari imwe y’ubutaka bw’igishanga na 5.000 Frw kuri hegitari imwe y’ubutaka bw’imusozi na 2.000 Frw kuri hegitari imwe y’amaterasi y’indinganire, yishyurwa n’Akarere bireba azajya agenerwa kunganira ubu bwishingizi.

Iri teka rivuga ko uretse inkunga ya Leta igenewe abatishoboye itangwa bitarenze tariki ya 30 Nzeri buri mwaka, inkunga ya Leta ivugwa muri iyi ngingo itangwa buri gihembwe.

Iri teka rigaragaza ko hari n’inkunga izajya itangwa na sosiyete z’ubucuruzi bw’itumanaho n’zi’ubw’ibikomoka kuri peteroli izajya igenerwa kunganira Mutuelle de Santé.

Buri sosiyete y’ubucuruzi bw’ibikomoka kuri peteroli yishyura inkunga mu bwisungane mu kwivuza ingana n’amafaranga 20 Frw kuri buri litiro y’ibikomoka kuri peteroli igurishije nayo azajya yunganira ubu bwisungane mu kwivuza.

RSSB ivuga ko yakiriye arenga miliyari icumi yabafashije mu kuziba icyuho cya mutuelle de sante

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .