Perezida Kagame yageze muri Angola mu nama yiga ku mutekano muri Centrafrique

Yanditswe na IGIHE
Kuya 20 Mata 2021 saa 11:39
Yasuwe :
0 0

Perezida Paul Kagame yagiriye uruzinduko muri Angola, aho yitabiriye inama ya kabiri y’Umuryango w’Inama Mpuzamahanga ku Karere k’Ibiyaga Bigari (ICGLR) yiga ku mutekano na politiki byo muri Repubulika ya Centrafrique.

Mbere y’iyo nama, Perezida Kagame yabanje kugirana ibiganiro na mugenzi we wa Angola, Perezida João Lourenço.

Inama nk’iyi yaherukaga guhuza abakuru b’ibihugu byo mu Karere k’Ibiyaga Bigari muri Mutarama uyu mwaka. Icyo gihe Perezida Kagame yari ahagarariwe na Minisitiri w’Ububanyi n’Amahanga, Dr Vincent Biruta.

Ni inama ifite icyo ivuze gikomeye k’u Rwanda kuko rumaze imyaka myinshi rwariyemeje gutanga umusanzu mu bikorwa byo kugarura amahoro muri Repubulika ya Centrafrique binyuze mu koherezayo ingabo yaba izagiyeyo binyuze mu Muryango w’Afurika yunze Ubumwe, iziri mu Butumwa bwa Loni n’izindi zoherejweyo mu mpera z’umwaka ushize binyuze mu masezerano y’imikoranire hagati y’ibihugu byombi.

Kuri uyu munsi abakuru b’ibihugu bya Centrafrique, Congo, Sudani, u Rwanda na Angola nibo baza kuyitabira. Hategerejwe kandi intumwa ziturutse muri Tchad, Cameroun ndetse na RDC.

Ibibazo by’umutekano muke muri Centrafrique ni kimwe mu bihangayikishije akarere kuko kugera nko mu Ukuboza umwaka ushize, habarwaga abantu ibihumbi 60 b’abasivile bavuye mu byabo bahunze imvururu zimaze igihe zadutse.

Perezida Faustin-Archange Touadéra, uherutse kongera gutorerwa kuyobora iki gihugu n’amajwi 53,16 % mu matora yabaye ku wa 27 Ukuboza, yitezweho gushyira iherezo kuri ibi bibazo bimaze igihe mu gihugu cye.

ICGLR ni umuryango washinzwe mu 1994 ugamije gushakira hamwe igisubizo cy’ibibazo by’umutekano muke n’amahoro adahagije mu karere. Ugizwe na Angola, Burundi, RDC, Congo, Centrafrique, u Rwanda, Sudani, Sudani y’Epfo, Tanzania, Uganda na Zambia.

Perezida Kagame yaherukaga gukorera urugendo hanze y’igihugu ku wa 11 Gashyantare 2020, icyo gihe yari muri Kenya aho yari yitabiriye umuhango wo gushyingura Daniel Arap Moi wayoboye icyo gihugu kuva mu 1978 kugera mu 2002.

Urwo rugendo rwari rukurikiye urwo yari yagiriye muri Ethiopia ku munsi wari wabanje aho icyo gihe yakiriwe na Minisitiri w’Intebe w’iki gihugu, Abiy Ahmed Ali.

Nubwo ingendo zo mu mahanga zimaze igihe zarakomwe mu nkokora n’icyorezo cya Covid-19, mu mezi 14 ashize, Umukuru w’Igihugu yitabiriye ndetse anayobora inama zireba u Rwanda n’izindi nyinshi mpuzamahanga hifashishijwe ikoranabuhanga.

Nko kuva muri Werurwe umwaka ushize icyorezo cya Coronavirus cyagera mu Rwanda, Perezida Kagame yakiriye mu biro bye inshuro 12 abayobozi batandukanye bo hanze y’u Rwanda uhereye kuri Perezida wa Ethiopia, Sahle-Work Zewde, yakiriye ku wa 16 Werurwe 2020; Perezida wa FIFA, Gianni Infantino yakiriye ku wa 26 Gashyantare 2021 kugera kuri Vincent Duclert wakoze Raporo y’Uruhare rw’u Bufaransa muri Jenoside yakorewe Abatutsi wakiriwe ku wa 09 Werurwe 2021.

Usibye abo bayobozi Umukuru w’Igihugu yabonanye nabo, yitabiriye hifashishijwe ikoranabuhanga inama mpuzamahanga zirenga 30 ziganjemo izareberaga hamwe uburyo bwo guhashya icyorezo cya Covid-19, iz’ibikorwa by’Umuryango wa Afurika Yunze Ubumwe, iza EAC n’indi miryango mpuzamahanga.

Kuva muri Mata umwaka ushize, Perezida Kagame amaze kuyobora Inama z’Abaminisitiri 19 zirimo n’izabaye hifashishijwe ikoranabuhanga mu bihe bitandukanye, ndetse yitabiriye ibindi bikorwa birimo nk’ibyo Kwibuka Jenoside yakorewe Abatutsi muri iyo myaka yombi, yakira indahiro z’abayobozi bashya inshuro eshanu kuva muri Gashyantare umwaka ushize.

Yitabiriye anayobora Inama zirimo iy’Umuryango wa FPR Inkotanyi zabaye muri Kamena na Nzeri umwaka ushize, ahura n’abayobozi bakuru mu gisirikare inshuro ebyiri muri Gicurasi na Ukuboza n’ibindi binyuranye.

Muri make nubwo Covid-19 yahagaritse ibintu byinshi, ntibyabujije ko inama z’ingenzi ziba, ubutumwa bwagombaga gutangirwamo butangwa nta gisibya hifashishije ikoranabuhanga.

Perezida Kagame ubwo yakirwaga muri Angola aho yitabiriye inama ya ICGLR
Perezida Kagame yabanje kugirana ibiganiro na mugenzi we wa Angola, Perezida João Lourenço

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .