Nyamasheke: Hatwitswe urumogi n’imiti yinjijwe bitemewe n’amategeko

Yanditswe na Sitio Ndoli
Kuya 18 Gashyantare 2021 saa 08:19
Yasuwe :
0 0

Polisi y’u Rwanda ikorera mu Karere Nyamasheke ku bufatanye n’ubuyobozi bw’aka Karere ka Nyamasheke batwitse urumogi n’imiti yo kwa muganga n’amavuta yangiza uruhu (mukorogo) byinjiye mu buryo bunyuranyije n’amategeko, ibyinshi bikaba byaraturutse muri Repubulika iharanira Demokarasi ya Congo.

Ni igikorwa cyakozwe kuwa Kabiri tariki ya 16 Gashyantare i Ntendezi ku cyicaro cya polisi mu karere ka Nyamasheke. Imiti n’amavuta atukuza byatwikiwe ku bitaro bya Bushenge.

Ibiro 200 by’urumogi, ibiro ijana by’imiti yo kwa muganga n’ibiro ijana by’amavuta yangiza uruhu (mukorogo) nibyo byatwitswe mu rwego rwo kurwanya ibiyobyabwenge na magendu akenshi ituruka muri Congo.

Umuyobozi w’Akarere ka Nyamasheke wungirije ushinzwe imibereho, Mukamana Claudette yavuze ko ibyinshi bituruka mu gihugu cy’abaturanyi byerekeza i Kigali binyuze mu muhanda Rusizi - Nyamasheke.

Ati “Byafatiwe mu muhanda wa Rusizi Nyamasheke ibindi bifatwa byambuka bivuye mu gihugu cy’abaturanyi (RDC), bifashwe na polisi byerekeza i Kigali.”

Mukamana Claudette yakomeje asaba ababikora kubireka bagashaka ikindi bakora kuko biteza igihombo.

Ati “icyo twabwira abaturage ni uko kubicuruza ari icyaha kandi biba byabatwaye amafaranga menshi ariko iyo bifashwe barahanwa kandi na none n’aya mafaranga bakayahomba. Akazi ko gukora ibindi karahari bagomba kugakora bakareka iyi mirimo igayitse.”

Ibi byose ngo byafashwe kuva muri 2018, birimo ibinini n’imiti bashyira mu nshinge, urumogi rwonyine rukaba rufite agaciro k’amafaranga arenga miliyoni 20.

Abagera kuri 80 bafatanywe ibyo biyobyabwenge n’imiti itemewe bakatiwe n’inkiko.

Amavuta atukuza aturuka muri RDC nayo yatwikiwe mu bitaro bya Bushenge
Urumogi rufite agaciro k'arenga miliyoni 20 Frw rwatwitswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .