Ni igihe cyo gufasha Centrafrique kubaka amahoro n’Ubukungu-Mushikiwabo

Yanditswe na Kanamugire Emmanuel
Kuya 20 Ugushyingo 2016 saa 10:18
43 29

Minsitiri w’Ububanyi n’Amahanga w’u Rwanda, Mushikiwabo Louise yagaragaje ko iki ari cyo gihe cyo gufasha Repubulika ya Centrafrique mu rugendo rwo kubaka amahoro n’ubukungu.

Ibi Mushikiwabo yabitangeje yifashishije urubuga rwe rwa Twitter nyuma yo kwitabira inama yiga ku bibazo bya Centrafrique yabereye i Bruxelles mu Bubiligi ku itariki ya 17 Ugushyingo 2016

Mushikiwabo wifurije Abaturage ba Centrafrique kugira ihirwe yanavuze ko muri iyi nama, hakusanyije miliyari ebyiri z’amadorali agamije gufasha iki gihugu kongera kwiiyubaka.

Aya mafaranga arimo azatangwa n’Umuryango w’Ubumwe bw’u Burayi ndetse n’ibihugu biwugize, azakoreshwa mu bikorwa birimo kongera kugarura amahoro, umutekano n’ubwiyunge ndetse no gushyigikira iterambere n’izahuka ry’ubukungu.

Visi Perezida wa komisiyo ya EU, Federica Mogherini yavuze ko Centrafrique yanyuze mu bihe bitoroshye muri iyi myaka itatu ishize ariko nubwo byari bikomeye abaturage bagaragaje ubushake bwo kubirenga no gutangira bushya, ndetse ko iyi inkunga izagira uruhare mu gufasha guverinoma kugera ku byo yiyemeje.

Perezida wa Centrafrique, Faustin Archange Touadéra yavuze ko iyi nama yari umwanya mwiza wo kugera ku ntego eshatu z’ingenzi arizo kugaragaza gahunda z’igihugu zigamije kongera kwiyubaka no kugarura amahoro, gushyiraho urubuga abafatanyabikorwa ba Centrafrique bagaragarizamo ubushake bwo kongera gutanga inkunga zirebana n’amafaranga ndetse no kugaragaza ko iki gihugu gikwiye kwitabwaho by’umwihariko.

Iyi nama yateguwe na EU ku bufatanye na Centrafrique yitabiriwe n’intuma ziturutse mu bihugu bisaga 80 n’imiryango mupuzamahanga itandukanye.

Ibibazo Centrafrique irimo bifitanye isano n’imvururu z’imitwe yitwaje intwaro yakunze kwibasira iki gihugu mu myaka myinshi itambutse.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE