Musenyeri Rucyahana yagaragaje impamvu amadini akwiye kwerura akajya muri politiki

Yanditswe na Jean Pierre Tuyisenge
Kuya 11 Kanama 2017 saa 08:28
Yasuwe :
0 0

Umuyobozi uhagarariye Ihuriro ry’Amadini n’amatorero mu Rwanda, Musenyeri John Rucyahana, yavuze ko atabona impamvu amadini atajya muri politiki kandi ari bumwe mu butumwa bahamagarirwa.

Ubwo abanyarwanda basabaga Inteko Ishinga Amategeko kuvugurura Itegeko Nshinga ryazitiraga Perezida Kagame kongera kwiyamamaza amadini n’amatorero na yo yabigizemo uruhare kuko ku wa 4 Gicurasi 2015 arenga 40 yasinye ibaruwa y’ubu busabe.

Mu matora kandi iryo huriro na ryo ryiyemeje kohereza indorerezi zigera kuri 94 hirya no hino mu turere ngo zikurikirane imigendekere y’amatora, byatumye hagira abibaza impamvu amadini yivanga mu bya politiki.

Ubwo iryo huriro Rucyahana ahagarariye ryamurikaga raporo y’agateganyo ku migendekere y’amatora y’umukuru w’igihugu ku wa 7 Kanama 2017, Musenyeri John Rucyahana yavuze ko mu nshingano abakirisitu bafite ari ugukora ku buryo abantu babaho neza, akavuga ko bidatandukanye n’igisobanuro nyakuri cya politiki.

Yagize ati “ Politiki ni inshingano ku ruhande rw’abemeramana, hari ibyo twagombaga gukora. Iyo usomye Bibiliya, ukareba umuhamagaro w’abizera, ni uguhesha abantu umugisha. Kimwe mu byatuma umuntu atanga umugisha ni uko agomba kuba afite icyatuma umuntu agubwa neza, kimwe mu bituma umuntu agubwa neza ni ubukungu, umutekano no kumenya kubana n’Imana n’abantu.”

Yongeyeho ati “ Ibyo ni ibyo usanga mu masezerano n’inshingano by’abizera, ntibitandukanye rero na politiki kuko politiki bivuga kurinda, no guteza imbere abantu n’ibyabo kandi abanyamadini ni byo dushinzwe.”

Musenyeri Rucyahana abona nta mpamvu amadini afite yo kutajya muri politiki

Musenyeri Rucyahana yavuze ko nk’amadini bakwiye kwikuramo imitekerereze ya gikoloni, kuko ngo abakoloni bavugaga ku kujya mu ijuru gusa, ariko ntawajya mu ijuru adafite agakiza kuzuye; ako kakaba kajyana n’ubukungu n’imibereho myiza, bikajyana n’imiyoborere. Ati “ Ni ukuvuga ngo twebwe nk’abakirisitu nituramuka tutagiye muri ibyo bintu, tuzaba dutakaje igice kinini cy’icyo duhamagarirwa gukora.”

Hari abanyamadini badakozwa ibyo kujya muri politiki

Musenyeri Rucyahana yavuze ko hari abanyamadini badakozwa ibya politiki na gato yewe ntibanagire uruhare mu gutora abazabayobora, avuga ko ari inshingano bafite zo kubigisha nabo bakazamenya akamaro kabyo.

Ati “ ...ariko abantu bose ntabwo bagira imyumvure imwe, tugomba kumenya ko hari abantu baba barayobye bagomba gusubizwa mu buzima, n’abo badatora ntibagire n’ibindi bikorwa bya politiki bakora tuzakomeza kubibutsa.”

Usibye aba, hagiye hagaragara n’abihayimana bashatse kwiyamamaza ngo bayobore ndetse mu minsi ishize muri Repubulika Iharanira Demokarasi ya Congo, ku wa 31 Ukuboza, hasojwe ibiganiro bya politiki byari biyobowe n’Inama Nkuru y’Abepisikopi Gatolika (CENCO).

Izinzi nkuru wasoma:

- Kwivanga muri Politiki y’ibihugu Kiliziya Gatolika ibikura kuki?

- Idini na Politiki: Abakuriye amadini barasobanya mu mashyi no mu mudiho

- Ihuriro ry’amadini ryashimiye Kagame wemeye ubusabe bwo gukomeza kuyobora akanegukana intsinzi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza