Minisitiri Busingye yakebuye Dr Kayumba wibasiye Fiona umushinja ihohotera rishingiye ku gitsina

Yanditswe na Mutangana Gaspard
Kuya 28 Werurwe 2021 saa 03:49
Yasuwe :
0 0

Minisitiri w’Ubutabera akaba n’Intumwa Nkuru ya Leta, Busingye Johnston yagiriye inama Dr Kayumba Christopher yo kudakomeza kwibasira umunyamakuru Fiona Ntarindwa Muthoni umushinja ihohotera rishingiye ku gitsina.

Kuri uyu wa Gatandatu nibwo Muthoni ukorera Televiziyo ya CNBC, yifashishije urukuta rwe rwa Twitter avuga ko ubwo yigishwaga na Dr Kayumba muri Kaminuza y’u Rwanda, yamukoreye ihohoterwa rishingiye ku gitsina.

Kayumba ushinjwa na we yahise ajya kuri Twitter, avuga ko ibyo ashinjwa ari ikinyoma no gushaka kumuharabika.

Mu butumwa bwe yamenyesheje Urwego rw’Igihugu rw’Ubugenzacyaha, RIB, buri gukora iperereza kuri iyi dosiye ko nubwo Ntarindwa avuga ko yari agiye gufatwa ku ngufu mu 2017, “yakomeje kuntumira mu biganiro bye kuri televiziyo mu 2018 na 2019”.

Yavuze ko Ntarindwa yamusabaga ko bahura bari bonyine ariko undi akabyanga.
Ati “Oya ntabwo nigeze nguhohotera. Mu myaka myinshi, buri gihe ubwo nabaga nsohotse mu ishuri, wanyingingiraga kugushyira mu itsinda ryanjye ry’abashakashatsi cyangwa se ko waba umwe mu bagize ikinyamakuru cyacu. Narabyanze kuko nari narumvise ko ukoresha umubiri wawe kugira ngo ubone ubufasha ukeneye.”

Minisitiri Busingye kuri iki Cyumweru na we yifashishije Twitter, yabwiye Kayumba ko gukomeza kwibasira umuntu wagaragaje ko yakorewe ihohoterwa ari ugushaka kumucecekesha.

Ati "Kwibasira umuntu watangaje ko yakorewe ihohotera rishingiye ku gitsina ni ukumucecekesha, no guca intege abandi bahohotewe bashaka gutanga ubuhamya. Ni ugutiza umurindi abakora ihohotera rishingiye ku gitsina."

Minisitiri Busingye yasabye Dr Kayumba kwita ku byo ashinjwa ariko akirinda gusagarira umushinja.

Dr Kayumba yahise yongera kwandika, avuga ko na we kuba Ntarindwa yarajyanye ikibazo cye ku mbuga nkoranyambaga kandi inzego zibishinzwe ziri kugikoraho iperereza, ari ukumuharabika.

Ati “Nyakubahwa Minisitiri, niba wakurikiye neza iyi nkuru, ni uriya muntu ubogamiyeho wanyandagaje mu ruhame, antera ubwoba kandi yaramaze gutanga ikirego cye ku bagenzacyaha. Nk’umunyamategeko mukuru mu gihugu cyacu, biriya byemewe n’amategeko? Bihanwa n’ingingo 256 mu gitabo cy’amategeko ahana ibyaha.”

Uwari Umuyobozi w’Ishami ry’Itangazamakuru n’Itumanaho muri Kaminuza y’u Rwanda, Njuguna Joseph, aherutse kubwira IGIHE ko ubwo yari akiri muri iyo Kaminuza yakiriye ikirego cy’umukobwa wamubwiye ko Kayumba yamuhohoteye.

Ati “Yego yaje mu biro byanjye ambwira ko hari umwarimu wagerageje kumuhohotera, namusezeranyije ko nzavugana n’uwo muntu (Kayumba) ariko igihe kinini ntiyazaga ku ishuri.”

Kuva muri Gicurasi 2018, Fiona Muthoni Ntarindwa akorera Televiziyo ya CNBC ifite studio mu Mujyi wa Kigali. Yatangiye amasomo ye ya Kaminuza mu Itangazamakuru n’Itumanaho muri Kaminuza y’u Rwanda mu 2014 ayasoza mu 2018.

Mbere yo kujya gukorera CNBC, yakoreye TV10 mu ishami ry’amakuru y’icyongereza.

Dr Kayumba Christopher icyaha cy'ihohotera rishingiye ku gitsina ashinjwa bivugwa ko cyakozwe ubwo yigishaga muri Kaminuza y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .