Minisitiri Biruta yagaragaje ibyo kwitega mu nama ya CHOGM izabera i Kigali

Yanditswe na Ferdinand Maniraguha
Kuya 2 Gashyantare 2021 saa 12:06
Yasuwe :
0 0

Minisitiri w’Ububanyi n’Amahanga, Dr Vincent Biruta, yatangaje ko u Rwanda rwiteguye neza kwakira Inama ya 26 y’Umuryango w’Ibihugu bikoresha Ururimi rw’Icyongereza, Commonwealth, nubwo Isi igikomeje guhangana n’icyorezo cya Covid-19.

Biteganyijwe ko iyi nama izwi nka CHOGM izabera i Kigali mu Cyumweru cya tariki ya 21 Kamena 2021.

Mu nyandiko yanyujije mu kinyamakuru Commonwealth Voices, Minisitiri Biruta yagaragaje ko u Rwanda rwiteguye neza iyo nama, kandi ko rukomeje kubaka ubushobozi no gukurikiza ingamba zo kwirinda Covid-19 zashyizweho n’Umuryango Mpuzamahanga wita ku buzima (OMS).

Ati “Mu gihe twizeye ko ikibazo cy’ubuzima cyugarije Isi kizagenda gikemuka mu mezi ari imbere, u Rwanda nk’igihugu gishya mu muryango wa Commonwealth rwishimiye kubaha ikaze mwese. Gahunda yacu yo kurwanya Covid-19 yubakiye ku bufatanye bw’inzego zitandukanye kandi byubakiye ku mbaraga z’akarere na mpuzamahanga.”

Dr Biruta yavuze ko u Rwanda nk’igihugu kidakora ku nyanja, kizi neza agaciro k’ubufatanye mpuzamahanga. Yavuze ko akamaro k’ubwo bufatanye kagaragaye cyane muri ibi bihe Isi ihanganye na Covid-19.

Ati “Imbagara n’ubufatanye mpuzamahanga mu guhangana n’iki kibazo gihangayikishije cy’ubuzima, ni ikimenyetso ko iyo duhuje imbaraga tugira ubushobozi bwo kwitegura ibishobora kuduhungabanya mu bihe bizaza ari nako duhangana n’ibibazo bitwugarije ubu.”

Commonwealth, ni umuryango wagiye ugaragara cyane mu bikorwa bikomeye birimo imyanzuro n’ingamba zo kurengera ibidukikije no kurwanya imihindagurikire y’ibihe.

Dr Biruta yavuze ko hashingiwe ku musaruro ubwo bufatanye bwagaragaje, uwo muryango ukwiriye no kwigaragaza birushijeho muri iki gihe, inkingo za Coronavirus zikagera kuri bose.

Yagize ati “Commonwealth ihora ku ruhembe rw’imbere mu kurengera ibidukikije no kurwanya imihindagurikire y’ibihe kandi bikomeje gutanga umusaruro ku miryango myinshi hirya no hino ku Isi, ikwiriye no kugira uruhare runini mu guharanira ko inkingo za Covid-19 zigera kuri bose kandi ku giciro cyiza.”

Muri iyi nama ya CHOGM hazigwa ku ngingo zitandukanye zigamije iterambere rusange ry’ibihugu bigize uwo muryango.

Dr Biruta yavuze ko ibyakwitegwa muri iyo nama harimo guhuza ijwi ku bindi bikorwa bikomeye bizaba mu minsi iri imbere, nk’inama ya 26 ya Loni yiga ku mihindagurikire y’ibihe, UN Climate Change Conference of the Parties (COP26) iteganyijwe mu Ugushyingo 2021 i Glasgow mu Bwongereza.

Ati “Ni ngombwa rero ko ibintu biva mu magambo bikajya mu bikorwa, imiyoborere yacu ikaba idaheza, ubuvuzi bwacu bukaba ububasha guhangana n’ibibazo bihari, duharanira ko ubukungu bwacu n’ubucuruzi bigera ku iterambere rirambye, twongerera ingufu uburyo bwo kwita ku batishoboye, tugira icyo dukora kigaragara ku mihindagurikire y’ibihe kandi tukabyaza umusaruro ikoranabuhanga rigamije iterambere.”

Yavuze ko gahunda z’ibihugu bigize uwo muryango zikwiriye kuba zisubiza ibibazo biriho, kandi urubyiruko rugahabwa umwanya wo kubigiramo uruhare nk’abazabisigarana mu bihe biri imbere.

Inama ya 26 y’abakuru b’ibihugu na Guverinoma zigize Commonwealth (CHOGM) izaba ifite insanganyamatsiko igira iti “Twese hamwe duharanire ejo heza: Twihuze, duhange udushya, tuzane impinduka”.

Dr Biruta yavuze ko bizaba ari umwanya mwiza ku bayobozi ba Commonwealth wo kugaruka ku buryo bushya bw’imiyoborere y’Isi “ari nako tugaruka ku myanzuro y’ingenzi yafatiwe muri CHOGM 2018.”

CHOGM ni inama yitabirwa n’abantu bari hagati ya 5000 na 8000. Kuyakira bisaba ko igihugu cyerekana ubushake hakabaho kureba ko igihugu gifite ubushobozi. Mu kureba ubwo bushobozi harebwa ibintu bitandukanye, birimo aho inama izakirirwa, indege zigana aho hantu, uko bantu babona Visa, umutekano, imiyoborere n’ibindi.

Muri Mata 2018 nibwo byemejwe ko u Rwanda ruzakira iyi nama nyuma y’imyaka icyenda rwinjiye muri uyu muryango. Ni iya mbere izabera mu gihugu kitakolonijwe n’u Bwongereza.

Dr Vincent Biruta yavuze ko icyorezo cya Covid-19 cyagaragaje ko kwishyira hamwe kw'ibihugu n'ubufatanye ari ingenzi cyane ku batuye isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .