Kwibuka24: Itorero ry’Abadiventisiti ryasabye abakirisito kwegera abagifite imitima yinangiye

Yanditswe na Tombola Felicie
Kuya 9 Mata 2018 saa 12:39
Yasuwe :
0 0

Umuyobozi w’Itorero ry’Abadiventisiti b’Umunsi wa Karindwi mu Rwanda, Byilingiro Hesron, yasabye abakirisito baryo kwegera abagifite imitima yinangiye bakaganirizwa uko bakwiye kwitwara muri ibi bihe byo kwibuka ku nshuro ya 24 Jenoside yakorewe Abatutsi.

Ibyo yabitangaje ubwo yagezaga ijambo ku bakirisito b’itorero ry’Abadiventisiti basengera muri Kigali Bilingual Church, i Remera tariki ya 7 Mata 2018, ubwo bibukaga ku nshuro ya 24 Jenoside yakorewe Abatutsi.

Hatanzwe ibiganiro bitandukanye, ubuhamya n’ubutumwa bwo guhumuriza abayirokotse n’abafite ihungabana ryakomotse kuri yo hanagaragazwa ko impamvu usanga abantu bacyifitemo urwango ari uko babitojwe igihe kinini.

Umuyobozi w’Itorero ry’Abadiventisiti b’Umunsi wa Karindwi mu Rwanda, Byilingiro Hesron, yasabye abakirisito kwegera no kuganiriza abagifite imitima igambirira ikibi kuko n’abakoze jenoside ari uko byatangiye bumva ko hari abantu badakwiye kubaho.

Yagize ati “Ibyakozwe muri Jenoside yakorewe Abatutsi mu 1994 habayeho imyitozo itwaye igihe kirekire cyane, bigomba gutwara na none igihe kugira ngo ubikure mu bantu.”

Yatanze urugero rwo muri Bibiliya mu gitabo cy’itangiriro agaragaza uburyo Kayini yishe umuvandimwe we Abel, amuziza ko amurusha umugisha mu byo akora.

Ati “ Burya n’abakoze Jenoside hano mu gihugu babikoze bagira ngo barabonamo inyungu ariko mu by’ukuri nta nyungu n’imwe yigeze iboneka.”

Yavuze ko umuntu ugifite ibitekerezo by’urwango mu mutima we Bibiliya ivuga ko bene uwo aba ari umupfapfa kandi ko nta wundi wamufasha uretse abafite ubuzima.

Ati “ Ushobora kuba utabaye muri bamwe bakoze ibikorwa bigaragara ariko mu mutima wawe ukaba udatandukanye na w’uwafashe imisumari akayikubita mu mavi y’uriya mubyeyi waduhaye ubuhamya.Uwakwishimira ko undi apfa, nta buzima aba agifite ,abari n’umupfapfa, nta mpuhwe, nta rukundo, imbuto zose za Mwuka dusoma mu Bagalatiya 5:23 , nta n’imwe aba afite."

Aho ni ho yasabye abakirisito gutabara bene abo bantu bakimunzwe n’urwango ndetse n’abandi bagifite guhembera ikibi muri bo.

Ati “Niba uzi ko wowe ufite ubuzima tabara utabufite,niba uziko umuntu ari umupfapfa mugaruremo ubuzima kuko muri ubu buzima umupfapfa aba akeneye ubufasha, ntukwiriye kumurebera, nta kindi yakwimarira usibye gutabarwa n’abafite ubuzima.”

Kwitandukanya n’ikibi ni byo byabuze muri Jenoside yakorewe Abatutsi

Byiringiro Hesron yavuze ko abakirisito bakwiye kuba abantu bagaragaza Imana aho bari hose ndetse bakitandukanya n’ikibi kuko ari byo byabuze mu itorero ayoboye ubwo Jenoside yabaga.

Yatanze urugero agira ati “Umuntu yigeze kumbwira ngo ‘Byiringiro’ iyo muri jenoside nibura itorero rimwe ry’abadiventisiti rihagarara, rikavuga riti ‘twebwe ntabwo dushobora gufatanya n’abicanyi’, ubu aya materaniro y’ivugabutumwa ayoborwa n’abapasitoro ntabwo yari kuba agikenewe, abo ngabo baba baratwigishije kubera kwitandukanya n’ikibi.”

Abakirisito b’itorero rya Kigali Bilingual Church basabwe ko ntawe ukwiriye kwigira nyoninyinshi, ngo agaragare nk’umukirisito ariko ibikorwa bye bibe bibi.

Basabwe kandi no kwegera abarokotse Jenoside yakorewe Abatutsi mu 1994 bakabafasha mu bishoboka byose haba mu kubagarurira ihumure ndetse no kubafasha gukomeza kwiyubaka.

Abakirisito basabwe kuganiriza buri wese ugifite ibitekerezo byinangiye
Abasengera muri Kigali Bilingual Church i Remera mu muhango wo kwibuka ku nshuro ya 24 Jenoside yakorewe Abatutsi
Byilingiro Hesron acana urumuri rw'icyizere
Umuyobozi w'Itorero ry'Abadiventisiti b'Umunsi wa Karindwi mu Rwanda, Byilingiro Hesron, acanira urumuri abaririmbyi ba Ambassadors of Christ
Hari tariki ya 7 Mata 2018, ubwo bibukaga ku nshuro ya 24 Jenoside yakorewe Abatutsi
Korali 'Ambassadors of Christ' batanze ubutumwa bw'ihumure mu ndirimbo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza