Koperative irimo abize muri Israel imaze amezi umunani itishyurwa mu isoko yahawe na RAB

Yanditswe na Tuyishimire Raymond
Kuya 31 Werurwe 2021 saa 12:52
Yasuwe :
0 0

Abagize Koperative y’abanyeshuri barangije amashuri ya Kaminuza muri Israël ndetse n’abandi bize iby’ubworozi bibumbiye muri koperative ya RARICO (Rwanda Animal Resource Improvement Cooperative) bamaze amezi umunani batarishyurwa n’Ikigo cy’Ubuhinzi n’Ubworozi (RAB) nyuma y’isoko batsindiye.

Muri Werurwe 2020, RAB yatangije umushinga ujyanye no korora amafi mu turere dutandukanye tw’Igihugu ( PFP&MPRL) , abantu batandukanye bapiganira isoko maze riza gutsindirwa na RARICO (Rwanda Animal Resource Improvement Cooperative).

Iyo koperative ni nayo yahawe inshingano zo gutanga akazi ku bakozi bari kujya babafasha.

Nyuma yo gutsindira isoko , RARICO yagiranye amasezerano y’umwaka na RAB yo kujya ifasha aborozi mu guhugura aborozi no kubyaza umusaruro ibyuzi.

Icyo gihe abagize Koperative boherejwe mu turere dutandukanye ndetse buri Karere kakagenda kagira umuntu umwe cyangwa babiri bafasha aborozi.

Abagize iyi Koperative bavuga ko mbere bajya guhabwa akazi na RAB bari bijejwe guhabwa amafaranga agera 230 000Frw ku kwezi , harimo ay’urugendo ndetse n’itumanaho.

Gusa bavuga ko bahembwe amezi abiri yonyine kandi ko amasezerano y’akazi bari bagiranye y’umwaka yarangiye kuwa 28 Werurwe 2021 .

Babwiye IGIHE ko bakomeje gutegereza ko bazahabwa amafaranga yabo ariko amaso agahera mu kirere.

Umwe yagize ati “Natangiye akazi muri Nyakanga 2020, nabaga i Kigali mva mu kazi banyohereza mu kandi Karere , ibintu byanjye byose mbijyana muri ako karere. Kuva nagerayo sindahembwa n’ukwezi kumwe . Nahawe amafi ndetse twayashyize mu byuzi kandi koperetive irabizi . Dutanga raporo umunsi ku wundi , ariko nta mafaranga ndabona kandi amasezerano y’akazi agiye kurangira.”

Yavuze ko ikibazo bakibwiye RAB bakabwirwa ko bari kubisuzuma kandi nta cyizere bahabwa.

Undi yavuze ko muri Werurwe ari bwo yatangiye nyuma haza ikibazo cya COVID-19 gusa nyuma bakomeje gukora ariko ntibigeze bahabwa amafaranga bakoreye uretse amezi abiri ya mbere.

Undi ati “Twatangiye mu mwaka ushize nko muri Werurwe hazamo ikibazo cya COVID-19, kugira ngo bidahagarara ariko kuko byari iby’ubuhinzi n’ubworozi tukazajya dukora , dutangira mu kwezi kwa Mata, kugera n’uyu munsi. Ariko muri icyo gihe cyose baduhembye ukwezi kwa Gicurasi na Kamena.”

Yavuze ko bakwiye guhabwa amafaranga yabo kuko bamwe bafite imiryango kandi bakaba bakodesha.

Ati “Umuntu asigaye akwepakwepa na nyiri inzu. Kurya ho umuntu ashobora kurya rimwe mu minsi ibiri .Ubwo rero ni ikibazo gikomeye cyane , bashake uko batuvuganira, RAB itwishyure.”

Perezida wa Koperative RARICO, Bizimana Jean Bosco, yabwiye IGIHE ko impamvu abagize koperative batinze kwishyurwa ari uko babanje kuvugurura amasezerano nyuma y’aho umugenzuzi w’imari wa leta asanze hari ibikwiye gukosorwa mu masezerano.

Yavuze ko mu masezerano bari bagiranye, basabwaga gutanga raporo y’uko akazi gakorwa nyuma y’amezi atatu bakabona guhabwa amafaranga, ariko nyuma y’aho ntibishyurwa.

Avuga ko indi mpamvu nyamukuru ari uko hari imirimo yakozwe na Koperative kandi itagakwiye gukorwa na bo kuko bo bari bashinzwe gutanga ubumenyi gusa.

Ati “ Ibibazo biri mu masezerano ni uko hari imirimo twabaze itagombaga gukorwa ku ruhande rwacu . Ubwo Umugenzuzi w’imari ya leta yakoraga ubugenzuzi yarabibonye. Harimo kugura abana b’amafi , no gukora ibyuzi abaturage bagomba kororeramo kandi iyo mirimo ntiyari iyacu.”

Yavuze ko ibyo Koperative yasabwaga yabikoze , hasigaye uruhare rwa RAB rwo kwishyura abanyamuryango.

Umuyobozi ushinzwe ibikorwa by’ubushakashatsi ku matungo n’ikoranabuhanga muri RAB , Dr Ndayisenga Fabrice, yabwiye IGIHE ko impamvu batinze kwishyura byatewe n’ibihe bya Coronavirus.

Yabijeje ko ikibazo cyabo kiri kwigwaho mu cyumweru kimwe bazaba bamaze kwishyurwa.

Ati “Inyemezabwishyu yabo iri muri Minecofin , biraterwa n’uburyo uyikoraho ayihutisha . Ikibazo cyabo kirimo kiri kwihutishwa mu cyumweru bizaba byakemutse".

Yavuze ko nubwo bazaba bamaze kwishyurwa hazakorwa ubugenzuzi bw’uburyo umutungo wakoreshejwe nk’abantu bahawe isoko.

Bamwe mu bagize RARICO bavuze ko RAB imaze amezi umunani itarabishyura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .