Kaminuza ya Kigali yateye intambwe izafasha abanyeshuri kwiyungura ubumenyi

Yanditswe na Evariste Nsengimana
Kuya 31 Kanama 2017 saa 02:10
Yasuwe :
0 0

Mu rwego rwo kongerera abanyeshuri ubumenyi bubafasha guhangana ku isoko mpuzamahanga ry’umurimo, Kaminuza ya Kigali (University of Kigali) yasinyanye amasezerano n’umuryango mpuzamahanga ufasha abanyeshuri kwimenyereza umwuga (AIESEC) ukorana na Kaminuza zisaga ibihumbi umunani zo mu bihugu birenga 130.

Aya masezerano yashyizweho umukono kuri uyu wa 31 Kanama 207 n’abayobozi batandukanye b’impande zombi, ku cyicaro cy’iyi Kaminuza, Kacyiru.

Umuyobozi mukuru wa AIESEC mu Rwanda, Niyonsaba David, yavuze ko aya masezerano azafasha abanyeshuri bacyiga n’abarangije kugira ubumenyi buri ku rwego mpuzamahanga no kungurana ibitekerezo.

Yagize ati “Ni amasezerano agamije gufasha abanyeshuri ba UoK kwimenyereza umwunga hanze y’igihugu, kubazanira inzobere n’abahanga baturutse hanze bakabafasha mu bijyanye n’imyigire ariko by’umwihariko icyo dushaka gukorana, ni ugufasha abanyeshuri babo kugira ibikorwa mu ntego z’iterambere rirambye bakaba ari nabo babyikorera.”

Umuyobozi wungirije w’agategenyo wa UoK, Prof. Danson Kimeu Musyoki, yavuze ko gusinya aya masezerano na AIESEC ari amahirwe kuri Kaminuza n’abanyeshuri.

Yagize ati “Aya ni amahirwe akomeye tubonye yo gukorana no kungukira byinshi kuri AIESEC. Aya masezerano azafasha abanyeshuri bacu kugira ubumenyi no kungurana ibitekerezo n’urundi rubyiruko rwo hanze y’u Rwanda.”

Abanyeshuri bazajya basaba guhugurirwa mu zindi Kaminuza zirenga 8000 zikorana na AIESEC cyane cyane ku mishanga y’iterambere, gusaba aho bimenyereza umwuga bahembwa mu gihe cy’umwaka mu bigo bifitanye ubufatanye na AIESEC, guhugurwa n’abandi baturutse mu bigo AIESEC ikoreramo n’ibindi.

AIESEC yatangiye gukorera mu Rwanda mu 2007, isanzwe ikorana na Kaminuza zitandukanye zirimo Mount Kenya, Kaminuza y’u Rwanda, UTB, KIM n’izindi, by’umwihariko umwaka ushize, abanyeshuri basaga 231 babonye ayo mahugurwa.

Kaminuza ya Kigali yafunguye imiryango mu Ukwakira 2013, imaze kugira abanyeshuri bagera ku 4500 mu cyiciro cya kabiri n’icya gatatu aho ikorera ku ishami rya Kigali n’i Musanze mu Ntara y’Amajyaruguru, Abagera kuri 700 basoje amasomo mu gihe gishize ndetse iritegura gushyira abandi ku isoko ry’umurimo muri uyu mwaka.

Kaminuza ya Kigali ifite amashami atatu ari yo irya ‘Business Management and Economics’, ‘Information Technology and Architecture’, ‘Law and the School of Post Graduate Studies.’ Ifite kandi ishuri ry’icungamutungo(Accountancy’) na porogaramu ya ‘CISCO’(‘ Centre for Economic Governance and Leadership’.

Gutanga uburezi bufite ireme Kaminuza ya Kigali ibikesha ubufatanye na kaminuza z’ikimenyabose zo mu Buhinde, u Budage na Kenya bituma iganwa n’abanyeshuri baturutse mu bihugu bya Nigeria, u Burundi, Uganda, Kenya, Tanzania, Sudani y’Epfo na Repubulika Iharanira Demokarasi ya Congo.

Abayobozi bashyira umukono ku masezerano
Umuyobozi mukuru wa AIESEC mu Rwanda, Niyonsaba David, yavuze ko aya masezerano azafasha abanyeshuri bakiga n'abarangije kugira ubumenyi buri ku rwego mpuzamahanga no kungurana ibitekerezo
Umuyobozi wungirije w'agateganyo wa UoK, Prof. Danson Kimeu Musyoki n'Umuyobozi mukuru wa AIESEC mu Rwanda bashyira umukono ku masezerano
Umuyobozi wungirije w'agategenyo wa UoK, Prof. Danson Kimeu Musyoki n'Umuyobozi mukuru wa AIESEC mu Rwanda bahererekanya amasezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza