Umunyarwanda Sebusande yiciwe muri Uganda

Yanditswe na IGIHE
Kuya 13 Gashyantare 2021 saa 10:14
Yasuwe :
0 0

Sebusande Lawrence wari uri ufite ubwenegihugu bwa Uganda ariko akomoka mu Rwanda, mu ijoro ryo ku wa Gatatu w’iki Cyumweru ahagana saa tanu z’ijoro yishwe arashwe n’abantu bitwaje intwaro bataramenyekana.

Amakuru avuga ko Nyakwigendera w’imyaka 60 y’amavuko yatewe mu rugo rwe n’abagabo batatu bitwaje imbunda, baramurasa bakubita n’umugore we, Julian Mbabazi, by’indengakamere agwa muri koma.

Aba hafi y’umuryango wa Sebusande wari utuye mu karere ka Isingiro kari mu Majyepfo ashyira Uburengerazuba bw’icyo gihugu, bavuze ko yamaze kwicwa abicanyi bakamusahura miliyoni 5 z’amashilingi ya Uganda.

Umurambo we wahise ujyanwa mu bitaro bya Mbarara, naho umugore we we ajyanwa ku kigo nderabuzima cya Nakivale III ari naho ari kuvurirwa kugeza ubu.

Hari amakuru avuga ko mu rugo rwa Sebusande hasanzwe agasanduku k’amasasu k’imbunda yo mu bwoko bwa AK-47. Inzego z’ibanze zavuze ko “zigiye gutangiza iperereza.”

Ku rundi ruhande ariko bimaze kumenyerwa ko gukora iperereza ku mpfu z’Abanyarwanda cyangwa Abenegihugu bafite inkomoko mu Rwanda baguye muri icyo gihugu bihera mu magambo gusa; kuko ababishe usanga bidegembya hirya no hino mu gihugu ntacyo bikanga ndetse n’inzego zibishinzwe ntizibakurikirane.

Nk’urugero uwitwa Nsanzimana Janvier n’umuvandimwe we baherutse guterwa n’abantu bitwaje imihoro; batemagura Nsanzimana kugeza apfuye naho umuvandimwe we akizwa n’amaguru.

Nta perereza ryigeze rikorwa kuri urwo rupfu, ahubwo ngo abapolisi bagiye bihuta cyane bajya gushyingura Nsanzimana nta n’umwe wo mu muryango we babimenyesheje.

Abanyarwanda bafungwa n’abicirwa muri icyo gihugu usanga ahanini ari bantu bafite imitungo cyangwa abacuruzi bafite ibikorwa biteye imbere mu murwa mukuru Kampala no mu nkengero zawo, hakaba n’ubwo basahuwe.

Sebusande Lawrence yishwe arashwe n'abantu bitwaje intwaro bamuteye mu rugo rwe bikekwa ko ari inzego z'umutekano za Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .