Impunzi 75 za mbere zigiye kuzanwa mu Rwanda zivuye muri Libya

Yanditswe na Habimana James
Kuya 20 Nzeri 2019 saa 10:15
Yasuwe :
0 0

Leta y’u Rwanda yamaze kwemeza urutonde ruriho impunzi 75 zikeneye ubuhungiro zizava muri Libya, mu minsi mike zikazagezwa mu gihugu.

Iki ni icyiciro cya mbere cy’impunzi 500 u Rwanda rwiyemeje kwakira ziva muri muri Libya, aho zikomeje gukorerwa ibikorwa bya kinyamanswa.

Uyu mwanzuro w’u Rwanda washyigikiwe n’Umuryango wa Afurika Yunze Ubumwe, AU ndetse n’Ishami ry’Umuryango w’Abibumbye ryita ku mpunzi, UNHCR.

Muri uku kwezi guverinoma y’u Rwanda yasinyanye amasezerano na AU na UNHCR, hagamijwe ko impunzi z’Abanyafurika 500 zaheze muri Libya zazanwa mu Rwanda.

Aya masezerano yasinywe nyuma y’aho mu 2017 Guverinoma y’u Rwanda ifashe umwanzuro wo kwakira izi mpunzi zaheze muri Libya, nyuma yo kugerageza kwambuka zijya ku mugabane w’u Burayi bikanga.

Izi mpunzi zituruka mu bihugu bitandukanye bya Afurika, zigera muri Libya zigerageza kwerekeza mu bihugu by’Iburayi gushaka imibereho.

The New Times yavuze ko amakuru aturuka muri Minisiteri ishinzwe ibikorwa by’Ubutabazi, Minema avuga ko kuri uyu wa Kane aribwo u Rwanda rwakiriye urutonde rw’izi mpunzi 75 zitegereje kugezwa mu Rwanda.

Mu gihe bazaba bageze mu Rwanda, bazahita bajyanwa i Gashora mu karere ka Bugesera.

Ibikubiye mu masezerano yasinywe hagati y’u Rwanda na AU ndetse na UNHCR, ni uko leta y’u Rwanda igomba kutanga uburinzi kuri izi mpunzi.

Umwanzuro wo kuvana izi mpunzi muri Libya wafashwe nyuma y’uko aho ziri hari hatangiye kuraswa, ikibazo cyatijwe umurindi n’uko Libya yugarijwe n’umutekano muke nyuma y’ihirikwa rya Muammar Gaddafi, ku buryo igihugu kidafite ubutegetsi buhamye ngo buzirengere.

Hari n’andi makuru y’uko izi mpunzi zigurishwa ku masoko yo muri Libya ngo zijye kuba abacakara, ibintu byatunguye abatari bake bumvaga ko ubucakara bwacitse.

Ababashije kurenga Libya, ni kenshi humvikana inkuru z’uko barohamye mu Nyanja ya Mediterranée bagerageza kwambuka bajya i Burayi.
Ubwo ikibazo cy’aba bimukira cyajyaga ahabona mu 2017, u Rwanda rwari rwemeye kwakira impunzi 30 000 mu myaka itanu, ndetse ngo nubwo hakiriwe 500, Minisiteri ishinzwe ubutabazi ivuga ko bishoboka ko bibaye ngombwa hazakirwa n’abandi.

Kugeza ubu habarwa ko muri Libya, ubaze impunzi, abimukira n’abagishaka ubuhungiro, bose hamwe bagera ku bihumbi 80.

U Rwanda rwo rucumbikiye impunzi hafi ibihumbi 150 ziganjemo izikomoka muri Repubulika Iharanira Demokarasi ya Congo n’u Burundi.

Leta y’u Rwanda yamaze kwemeza urutonde ruriho impunzi 75 zikeneye ubuhungiro zizava muri Libya, mu minsi mike zikazagezwa mu gihugu.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza