Bapfuye urusorongo: Imitwe myinshi ikorera muri RDC yarwanyaga u Rwanda igeze ku buce

Yanditswe na Musangwa Arthur
Kuya 23 Gashyantare 2021 saa 02:05
Yasuwe :
0 0

Raporo nshya yiswe Baromètre sécuritaire du Kivu (KST), yagaragaje ko imitwe myinshi yitwaje intwaro yarwanyaga u Rwanda ari nako iteza umutekano muke mu Burasirazuba bwa Repubulika Iharanira Demokarasi ya Congo (RDC) ubu igeze ku buce, ndetse imwe yamaze gusenyuka burundu.

KST ni raporo igaragaza ishusho y’umutekano mu Burasirazuba bwa RDC. Iheruka ivuga ku bikorwa by’umutekano muke byaranze umwaka wa 2020. Iyi raporo yakozwe na Groupe d’Étude sur le Congo, ifatanyije na Kaminuza ya New York na Human Rights Watch. Intego ni ukugaragaza ubugizi bwa nabi bukorwa n’imitwe yitwaje intwaro mu Burasirazuba bwa RDC, hagamijwe gutanga umucyo ku bibazo by’umutekano muke bigaragara muri ako gace.

Hagaragajwe ko guhera muri Mutarama 2020 kugeza muri Mata uwo mwaka, ibikorwa by’ubugizi bwa nabi byakozwe n’imitwe yitwaje intwaro byakomeje mu gihe Isi yari ihanganye n’icyorezo cya Covid-19. Muri icyo gihe, KST igaragaza ko nibura buri kwezi abaturage bakorewe ubugizi bwa nabi cyangwa bishwe n’imitwe yitwaje intwaro babaga bari hagati ya 350 na 450.

Muri uwo mwaka kandi, raporo yagaragaje ko nibura buri kwezi, imitwe yitwaje intwaro muri Kivu zombi yahitanaga abaturage bari hagati ya 50 na 250.

Ibyo byatumye uwo mwaka muri RDC yose, abaturage basaga miliyoni 5.5 bava mu byabo. Abo baturage kandi bahuye n’indi mbogamizi yo kubura ubufasha bw’ibanze nk’uko byari bimeze mbere kuko abaterankunga benshi bari bahugiye mu guhashya Covid-19. Byatumye ku nkunga Congo yari ikeneye ngo yite ku bavuye mu byabo, ibona gusa 34 %.

Icyakora Raporo ya KST, igaragaza ko umwaka wa 2020 utahiriye myinshi mu mitwe yari imaze igihe iyogoza Uburasirazuba bwa Congo kuko isaga umunani yasenyutse burundu, isigaye nayo imyinshi yiganjemo imaze igihe muri ako gace nka FDLR ikaba igeze ku buce.

Muri rusange, umwaka wa 2020 mu Burasirazuba bwa Congo habarurwaga imitwe yitwaje intwaro 122, ivuye ku 130 yabaruwe mu mwaka wa 2019 wari wabanje.

Raporo ivuga ko imitwe yagize uruhare mu bikorwa byinshi bihungabanya umutekano mu 2020 harimo Forces démocratiques alliées (ADF), Forces démocratiques pour la libération du Rwanda (FDLR), Alliance des patriotes pour un Congo libre et souverain (APCLS) , NDC-Rénové n’igisirikare cya Leta ya Congo (FARDC).

Umutwe wa ADF niwo wabangamiye cyane umutekano kuko wihariye 37 % by’impfu zibasiye abasivile bikozwe n’imitwe yitwaje intwaro.

Imitwe ikuze irimo irwanya u Rwanda igeze habi

Uburasirazuba bwa Congo bwatangiye kugaragaramo umutekano muke ku buryo bukomeye guhera mu 1994 ubwo abasize bakoze Jenoside mu Rwanda barimo n’abahoze mu gisirikare cya Leta, batsindwaga bagahungira muri Congo.

Hatangiye kuvuka imitwe itandukanye irimo iyo y’abari bamaze guhunga ndetse n’indi y’imbere mu gihugu yari igamije kwirwanaho ngo irengere abaturage gakondo. Byabaye icyuho kandi abandi bafite inyungu runaka muri ako kavuyo, bashinga imitwe bagamije indonke zabo bwite dore ko icyo gice cya Congo kigaragaramo umutungo kamere mwinshi.

Imwe mu mitwe imaze igihe mu mashyamba yo mu Burasirazuba bwa Congo harimo FDLR-FOCA , FNL y’i Burundi na ADF yo muri Uganda.

FDLR na FNL ni imitwe itarahiriwe mu myaka itatu ishize kuko yagabweho ibitero simusiga byayishegeshe, kuva mu 2018 ubwo Perezida Felix Tshisekedi yajyaga ku butegetsi.

Raporo ivuga ko umwaka ushize, mu bice bya Walikale, Masisi, Lubero na Rutshuru muri Kivu y’Amajyaruguru, umutwe wa NDC-Rénové wa General Guidon Shimiray Mwissa waganje FDLR yari yarahagize indiri kuko isa n’iyacitse intege nyuma y’ibitero simusiga yagabweho n’ingabo za Leta guhera mu 2019, byanahitanye umuyobozi wayo Sylvestre Mudacumura.

FDLR imaze gutakaza abayobozi benshi kubera ibitero, gufatwa mpiri no kwicwa. Lt Gen Mudacumura washakishwaga n’urukiko mpuzamahanga mpanabyaha guhera mu 2012 ku byaha byibasiye inyokomuntu byakorewe mu Burasirazuba bwa Congo, ni umwe mu batarahiriwe n’ubutegetsi bushya bwa Tshisekedi.

Mudacumura yari ayoboye igisirikare cya FDLR, (FOCA) mu gihe General Byiringiro Victor ayoboye igice cy’uwo mutwe cya Politiki. Uretse urupfu rwe, mu 2018 abandi bayobozi b’uwo mutwe barafashwe bajyanwa mu Rwanda kuburanishwa. Abo barimo Nsekanabo Jean Pierre uzwi nka Lt. Col Abega Kamara wari ushinzwe iperereza muri FDLR na Nkaka Ignace uzwi nka La Forge Fils Bazeye wari umuvugizi wayo.

Uwo mutwe kandi Raporo ivuga ko mu myaka itanu ishize, wahuye n’ibibazo bikomeye birimo isubiranamo no gucikamo ibice, byatumye mu 2016 havuka ikindi gice cyiswe CNRD-Ubwiyunge.

KST ivuga ko mu mwaka wa 2008, FDLR yabarirwaga abarwanyi 6800, nyamara mu 2020 uwo mutwe wabarirwaga abarwanyi bari hagati ya 500 na 1000.

Raporo kandi igararagaza ko FDLR yatakaje ibice byinshi yakoreragamo ibikorwa by’ubucukuzi bw’amabuye y’agaciro ari nako ubushobozi bwo kubona intwaro ukoresha bugabanyuka.

Mu 2020 uwo mutwe wafatiranye amahirwe yo gucikamo ibice kwa NDC-Rénové, wongera kwisuganyiriza mu gace ka Bwito ubifashijwemo n’undi mutwe bacuditse wa CMC.

Kubera uko gucika intege, ibikorwa bya FDLR byacitse intege cyane ku buryo isigaranye ibirindiro ahantu hake harimo mu Burengerazuba bwa Rutshuru no mu Majyaruguru ya Masisi.

RUD Urunana ntikibaho, Col Wilson Irategeka yaburiwe irengero

Undi mutwe urwanya u Rwanda utarahiriwe n’urugendo ni RUD Urunana. Uyu mutwe wiyomoye kuri FDLR mu 2007 nyuma yo gushwana bapfa inkunga bahabwaga.

Washinzwe na Jean Damascene Ndibabaje alias Musare, utangira ukorera muri Rutshuru mu bice bya Bwito na Bwisha. Nubwo uwo mutwe abarwanyi bawo bagabanyutse, guhera mu 2016 wagiye wihuza n’indi mitwe bakagaba ibitero ku basivile.

Mu mwaka wa 2016, umuyobozi wawo Musare yarishwe yicirwa mu bitero bikekwa ko byagabwe n’indi mitwe itarumvikanaga na RUD Urunana.

Musare yasimbuwe na Jean Michel Afrika ariko nawe byabaye iby’akanya gato kuko mu Ugushyingo 2019 atasizwe n’ibitero ingabo za Congo zabagabyeho. Kugeza ubu uyu mutwe nawo usa nk’utakiriho ndetse hari benshi mu barwanyi bawo bafashwe bajyanwa mu Rwanda, abandi baricwa.

Undi mutwe wacitswe umutwe ni CNRD –Ubwiyunge. Ni umutwe wiyomoye kuri FDLR- FOCA mu 2016 nyuma yo kutumvikana ku miyoborere n’ibijyanye n’impunzi z’Abanyarwanda bari baragize ingwate. Washinzwe na Colonel Wilson Irategeka.

Benshi mu barwanyi ba FDLR binjiye muri CNRD Ubwiyunge ubwo yari igishingwa, ni abari bari mu bice bya Kivu y’Amajyepfo. Raporo igaragaza ko abo muri Kivu y’Amajyaruguru abenshi bagumanye na FDLR .

CNRD yaje ifite amatwara asa n’aho ateye imbere kurusha FDLR kuko yo yari ishyigikiye ko impunzi z’Abanyarwanda ziri muri Congo zifashwa gutaha, ikagirana ibiganiro na Guverinoma y’u Rwanda, ibintu FDLR itari ishyigikiye. Byatumye CNRD ishyigikirwa n’indi mitwe irimo Nyatura ndetse n’igisirikare cya Congo.

Gushyigikirwa CNRD yabonye igishingwa, ntikwamaze kabiri kuko kwatangiye kuyoyoka nyuma y’umwaka ishinzwe.

Abayobozi ba Congo batangiye kuyihinduka bata muri yombi bamwe mu bayobozi bayo. Igice kinini cya Kivu y’Amajyaruguru bagenzuraga nacyo bagiye bagitakaza, batangira gucika intege.

Ibintu byabaye bibi mu 2019, ubwo abarwanyi ba CNRD bari bari muri Kivu y’Amajyaruguru bashakaga gusanga bagenzi babo muri Kivu y’Amajyapfo. Bamwe mu barwanyi bari bari muri Kivu y’Amajyepfo, bimukiye i Kalehe naho ho muri Kivu y’Amajyepfo. Ingabo za Congo zabatunguriye muri ako gace zibacanaho umuriro, abayobozi benshi ba CNRD baricwa abandi barafatwa.

Icyo gihe nibwo umuyobozi w’uwo mutwe Wilson Irategeka yaburiwe irengero kugeza n’ubu ntawe uzi aho aherereye.

Hari indi mitwe nka P5 ya Kayumba Nyamwasa yakunze kumvikana muri Kivu y’Amajyepfo mu myaka ya 2017, icyakora kuri raporo ya KST ya 2020 ntabwo igaragaraho.

Birashoboka ko nayo yahwekereye nyuma yo kugabwaho ibitero bikomeye n’ingabo za Congo, byatumye abayobozi bayo barimo Rtd Major Mudathiru bafatwa mpiri abandi bakicwa. Mudathiru na bagenzi be bamaze igihe baburanira mu nkiko zo mu Rwanda.

Ubwo Bazeye na Nsekanabo bari abayobozi muri FDLR bagezwaga imbere y'urukiko
Abantu bane barindaga Mudacumura barafashwe berekwa itangazamakuru
Muri Nzeri 2019 nibwo FARDC yemeje ko yishe Lieutenant General Sylvestre Mudacumura wayoboraga FDLR
Mudathiru wayoboraga abarwanyi ba P5 yafatiwe mu mashyamba ya RDC muri uyu mwaka
Rtd Maj Mudathiru hamwe n'abarwanyi 25 yari ayoboye ubwo bagezwaga mu rukiko rwa gisirikare mu Rwanda
Abarwanyi batanu mu bagabye igitero mu Kinigi ba RUD Urunana bafashwe mpiri mu 2019
Jean Michel Afurika wayoboraga RUD Urunana aheruka kwicwa na FARDC
Abarwanyi 19 mu bagabye igitero mu Kinigi bishwe n'inzego z'umutekano z'u Rwanda
Col Wilson Irategeka wayoboraga CNRD Ubwiyunge hashize imyaka ibiri ntawe uzi aho aherereye. Bikekwa ko yaba yariciwe mu bitero bagabweho na FARDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .