Ikinamico Umurage yahinduye ubuzima bw’ababyeyi bahanaga abana bihanukiriye

Yanditswe na Tombola Felicie
Kuya 12 Werurwe 2018 saa 10:33
Yasuwe :
2 3

Ubuzima abantu bakuriyemo butuma uko barezwe ariko barera abana babo ku buryo niba barakuze bakubitwa cyangwa bavunishwa nabo bibajyamo bakumva ko abana babo nabo bagomba kuzaca muri iyo nzira.

Ibyo byemezwa na bamwe mu babyeyi bo mu Murenge wa Shyogwe mu Karere ka Muhanga, batangaza ko gukurikirana ikinamico ‘Umurage’ byatumye bahinduka kuko kutamenya uburenganzira bw’umwana byatumaga babavunisha ndetse bakanabahondagura bumva ko aribwo babarera neza.

Ku itariki ya 9 Werurwe 2018, nibwo abakinnyi b’Ikinamico ‘Umurage’ berekeje mu Murenge wa Shyogwe, Akagari ka Mubuga, gutambutsa ubutumwa imbonankubone no kuganira n’abaturage ku byo bungukira muri iyo kinamico itambutswa ku maradiyo umunani mu gihugu.

Abaturage bamwe bemeje ko iyi kinamico nyigisho yatumye hari ibyo bahindura kuko bareraga uko barezwe nabo nubwo byabaga bibangamiye abana.

Nyirazaninka Dina, umubyeyi w’abana bane ati “Ikinamico ‘Umurage’ icyo yampinduyeho ni ikijyanye no kutavunisha abana no kutabahondagura. Muri njyewe numvaga ko gukubita umwana ukamubabaza bituma acika ku kintu wamubujije, nasanze hari ubwo bituma akwanga ukitwa umugome, akaba yanagucika kandi wabashaga kumukosora umubwira neza ahubwo mukaba inshuti cyangwa wanakumubita nturengere.”

Uyu mubyeyi uvuga ko yakuriye mu rugo rurimo igitsure gukubitwa bikaba ari ibintu yabaga yiteze buri gihe ngo na we yatekerezaga ko gukubita abana akabumvisha byatuma batamunanira.

Mukashema Laetitia we ati “ ..Ibyo kuvunisha abana nibyo nasanze bindega muri iyi kinamico, umwana wanjye kuva namugaburiye kandi ari mu biruhuko nasubiraga mu murima ikigoroba na we tugasubiranayo kandi na mu gitondo twahinganye. Numvise bituma adakura neza kuko biba bitajyanye n’ikigero cye.”

Umugabo w’imyaka 27, Tuyishime Leandres, ati “ Nubwo njyewe maze igihe gito nshatse umugore,iyi kinamico yaramfashije; hari ukuntu usanga ababyeyi ino aha cyane abagabo bakubita abana kubera wenda ko nabo bakuze bakubitwa ugasanga abaturanyi ni bo barimo gusabira umwana imbabazi.”

“Ibyo nasaze nzabyirinda kuko umwana uko umukubita cyane arahahamuka aho kugira ngo abone ko wamugiriraga neza umukosora ku kibi yakoze ahubwo akakwanga urunuka, mukagirana amakimbirane.”

Kuba inyigisho zitambuka mu kinamico Umurage zifasha abaturage, byemezwa n’Umuyobozi ushinzwe abafatanyabikorwa b’Akarere ka Muhanga mu iterambere Nyiratunga Iphigenie avuga ko ubutumwa bwumvikana vuba kurenza uko babivuga mu nama.

Ati“ Amakinamico ari mu bintu byigisha neza, ubundi ibiganiro bindi iyo tubitanze hari n’igihe abantu barambirwa ntibakurikire ariko iyo ari urwego rw’ikinamico abaturage barabyumva kandi bakabifata.”

Yongeyeho ko ubutumwa butambutswa mu kinamico bureba abaturage bo mu Karere ka Muhanga nk’ahandi hose mu gihugu.

Ati “Nk’uko mugenda mu bikurikirana hirya no hino mu gihugu kimwe no mu karere ka Muhanga hari ikibazo cy’imirire mibi, ikibazo cy’ihohoterwa rishingiye ku gitsina, hari ikibazo cy’abana bahohoterwa na bo. Iyo inyigisho nk’iyi ngiyi ije irabafasha bigatuma hari imyumvire ibasha guhinduka.”

Umwanditsi w’Ikinamico Umurage, Muhirwa Terance, avuga ko bajya gukinira mu baturage imbonankubone bagamije kwegera abaturage ngo babibonemo.

Ikinamico Umurage itambuka ku maradiyo umunani ari yo Radio Rwanda, Isango Star, City Radio, Radio Salus, Isangano, Radio Izuba, Radio Ishingiro na Radio 10.

Ababyeyi bakubitaga abana bihanukiriwe bavuze ko bigiye byinshi kuri aba bakinnyi
Abantu bakoresha abana mu tubari na bo bahawe inyigisho
Abari baje kurema isoko banakurikiranye abakinnyi b'ikinamico Umurage babakinira imbonankubone
Abasubije neza ku byo bungukiye mu ikinamico Umurage bahembwe imitaka, radio n'imipira yo kwambara
Abaturage ba Shyogwe batangaje ko hari byinshi bungutse nyuma yo guhura n'abakinnyi b'ikinamico Umurage
Aharemera isoko ryo mu Kinini mu Murenge wa Shyogwe hari abantu benshi baje kureba abakinnyi b'ikinamico Umurage
Bamwe bavuze ko basanze bahohoteraga abana babo mukuvunisha imirimo itajyanye n'uko bangana ndetse no mu kubahana bihanukiriye
Banaganirijwe ku ihohoterwa rishingiye ku gitsina
Muri iyi kinamico hatanzwemo n'ubutumwa buvuga ku ihohoterwa ryo mu ngo
Nyiratunga Iphigenie, umuyobozi ushinzwe abafatanyabikorwa b'akarere ka Muhanga, JAF
Terance Muhirwa, umwanditsi w'Ikinamico Umurage
Uyu mukinnyi yakinaga yarabujijwe kwiga ahubwo iwabo bakamuvunisha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza