Ibyo kwishimira mu byumweru bitatu irushanwa “Wavumbuzi Entrepreneurship Challenge” rimaze ritangiye

Yanditswe na Uwimana Abraham
Kuya 23 Gashyantare 2021 saa 04:37
Yasuwe :
0 0

Ibyumweru bitatu birashize irushanwa rigenewe abanyeshuri bo mu mashuri yisumbuye rya “Wavumbuzi Entrepreneurship Challenge” ritangiye. Abanyeshuri bashimishijwe n’ubumenyi bahabwa bubategura guhangana n’impinduka z’isoko ry’umurimo.

Iri rushanwa ryatangiye ku wa 18 Mutarama 2021 rikazarangira ku wa 28 Gashyantare 2021, rikaba ryarateguwe n’umuryango Allan and Gill Gray Philanthropy. Ni ku nshuro ya mbere utangije iri rushanwa mu Rwanda, ariko risanzwe rikorwa muri Afurika y’Epfo ndetse na Kenya.

Abanyeshuri barushanwa binyuze kuri internet hifashishijwe mudasobwa cyangwa telefone, aho buri cyumweru bahabwa imikoro (challenge) inyuranye igendanye no gusobanukirwa ibibazo byugarije sosiyete yacu n’isi muri rusange, n’uburyo byashakirwa ibisubizo.

Umuyobozi wa Allan and Gill Gray Philanthropy mu Rwanda, Aline Kabanda, yavuze ko muri ibi byumweru bitatu iri rushanwa rimaze ritangiye, babonye umuhate ndetse n’ubwitange bw’abarimu n’abanyeshuri mu mikoro bagiye bahabwa.

Yagize ati “Wavumbuzi yibanda ku gukuza imyumvire yo guhanga udushya, bikagaragarira mu buryo abanyeshuri bitwara mu mikoro baba bahawe. Ibyumweru bitatu bishize byibanze ku buryo isi ihinduka ndetse no kubaka imwe mu mitekerereze izafasha abanyeshuri guhangana n’izi mpinduka ari yo ubushake, kwigira, ndetse no gufata iy’ ambere. Iki cyumweru cyo kibanze ku gushishikariza abanyeshuri kwishakira ibisubizo."

Uretse ibyo, abarimu bitabiriye iri rushanwa banaganirijwe na bamwe mu bateye intambwe igaragara mu byo guhanga udushya, barimo Umuyobozi Mukuru wa City Group, Mukeshimana Eugene; Uwashinze BAG Innovation, Yussouf Ntwali.

Muri iri higanwa, buri cyumweru hashimirwa abanyeshuri batsinze, abarimu bitwaye neza mu gufasha abanyeshuri, ndetse hagatangazwa n’ibigo byitwaye neza kurusha ibindi muri icyo cyumweru.

Mu cyumweru cya gatatu abanyeshuri bagaragaje ibitekerezo byumvikana ndetse by’umwimerere mu mikoro bahawe kurusha abandi, ni Irakoze Leon De Pere, wiga muri G.S.O. Butare yo mu karere ka Huye, na Kwizera Christian na we wo muri G.S.O. Butare.

Ababonye amanota menshi kurusha abandi ni Aline Tuyisabe wiga muri Gashora Girls Academy of Science & Technology mu karere ka Bugesera, Uwababyeyi Isugi Nadia wiga muri Inyange Girls’ School of Sciences muri Rulindo, Byiringiro Fiston wiga muri GS St Bonaventure Buhokoro muri Nyamasheke, Sylvie Ikuzwe wiga muri G.S.O Butare mu karere ka Huye, ndetse na Mucyo Emmanuel Victor wiga muri Kagarama Secondary School mu karere ka Kicukiro.

Abarimu bafashije abanyeshuri kwisanga mu irushanwa no gutsinda neza by’agahebuzo ni Mukeshimana Hilairie wigisha muri E.S. Rugabano mu karere ka Karongi, Nsengiyumva Augustin wigisha muri E.S. Saint Francois Shangi mu karere ka Nyamasheke na Ndahimana Daniel wigisha muri ES Mukono muri Gicumbi.

Amashuri yashimiwe gufasha no kuba hafi abanyeshuri bayo ni Apakape Kayove mu karere ka Rutsiro, E.S. Rugabano yo mu karere ka Karongi, ndetse na G.S. Rambura yo mu karere ka Nyabihu.

Muri ibi byumweru bikurikiyeho irushanwa rizakomeza hitabwa noneho ku kureba uburyo abanyeshuri bagaragaza ubushobozi bwo kwihangana no gushikama, kwiyemeza gufata iya mbere no kuba indashyikirwa.

Uretse ibyo kandi hari na gahunda y’irushanwa ry’ibitekerezo bya business byiza kurusha ibindi (pitch competition), aho abanyeshuri bazagaragaza ibitekerezo bifite umwimerere imbere y’akanama nkemurampaka, hanyuma bazahabwe abazabafasha kubinonosora kurushaho mbere y’uko bongera kohereza ibitekerezo binonosoye ku wa 10 Werurwe 2021.

Ubwo irushanwa rizaba rirangiye nyuma y’ibyumweru bitandatu, abanyeshuri icumi bazaba barahize abandi muri rusange bazagenerwa ibihembo bitandukanye byiganjemo ibikoresho by’ikoranabuhanga bizabafasha gukomeza kwiyungura ubumenyi.

Uretse abanyeshuri bazagenerwa ibihembo, hazanahembwa abarimu bazagaragaza umwete wisumbuyeho mu gufasha abanyeshuri mu buryo bugaragara, ndetse hanashimirwe ibigo by’amashuri bizahiga ibindi, byose bikazabera mu birori biteganyijwe ku wa 31 Werurwe 2021.

Wavumbuzi Entrepreneurship Challenge ni irushanwa ryitabiriwe cyane n'abanyeshuri biga mu mashuri yisumbuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .