00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bigize EAC byatangije ibikorwa bihuriweho mu kurandura malaria

Yanditswe na Hakizimana Jean Paul
Kuya 19 Ugushyingo 2021 saa 10:27
Yasuwe :
0 0

Ibihugu bigize umuryango wa Afurika y’Iburasirazuba kongeraho Repubulika Iharanira Demokarasi ya Congo, byatangije gahunda ihuriweho yo kuranduramalaria mu myaka itanu iri imbere.

Ni igikorwa cyatangijwe kuri uyu wa Kane tariki ya 18, mu Karere ka Kirehe aho mu gishanga cya Cyunuzi herekanwe uburyo u Rwana rukoresha drone mu kurwanya malaria, ku mupaka w’u Rwanda na Tanzania na ho herekanwe ivuriro rusange rizajya ryakira abaturage bambukiranya imipaka rikabasuzuma ndetse rikanabaha imiti mu gukumira iyi ndwara.

Gihuriweho n’u Rwanda, u Burundi, Tanzania, Kenya, Sudani y’Epfo, Uganda na RDC. Ibi bihugu byiyemeje gushyira hamwe ingamba zo kurandura iyi ndwara mu myaka itanu iri imbere bigahuza ibikorwa birimo gutera imiti irwanya imibu itera malaria mu ngo no mu bishanga ndetse hakazanubakwa amavuriro y’ibanze ku mipaka ihuza ibi bihugu azunganira ayasanzwe mu kuvura iyi ndwara ku baturage bambukiranya imipaka.

Ni ingamba zafashwe nyuma y’aho bigaragaye ko mu baturage basaga miliyoni 228 bari barwaye malaria ku isi mu mwaka wa 2018, abagera kuri miliyoni 61 ari abo mu bihugu bya EAC wongeyeho RDC bakaba bangana na 26,8% by’isi yose.

Ni mu gihe kandi mu bantu basaga ibihumbi 405 bishwe na malaria ibihumbi 105 bangana na 26% ari abo muri ibi bihugu.

Minisitiri w’Ubuzima Dr Daniel Ngamije, yavuze ko ubusanzwe wasangaga buri gihugu gifite gahunda yacyo yo kurwanya malaria ariko ibihugu byose byumvikanye gushyira hamwe mu kurandura iyi ndwara mu myaka itanu.

Ati “ Akenshi wasangaga igihugu kimwe gikora gahunda yacyo ikindi kigakora iyacyo ntiduhurize hamwe kandi umubu ntabwo ugira umupaka, ushobora gutera imiti yica imibu mu nzu za hano i Kirehe, hakurya hariya batabishyize kuri gahunda ikaza kwambuka ikajya ku ruhande rwa Tanzania, nyamara iyo tubyumvikanyeho gahunda zose tuzikorera hamwe.”

Yakomeje agira ati “Izo gahunda zirimo gutera imiti mu nzu, gutanga inzitiramibu, kuvura malaria dukoresheje imiti ifite ingufu kuko hari igihe usanga hari iyacitse integer, hari abakiyikoresha abandi bakoresha iyindi .”

Dr Ngamije yavuze ko kudakorera hamwe ibikorwa bingana bituma malaria idacika mu Karere ndetse anavuga ko hari n’imibu bazafata bakayikoreraho ubushakashatsi.

Ati "Dufite gahunda yo gufata imibu tukayikoreraho ubushakashatsi tukareba ubwoko bw’iyo mibu tukayitera imiti tukareba ikigero ipfiraho kugira ngo tumenye inzitiramibu twakoresha, imiti twakoresha dutera mu nzu cyangwa mu bishanga."

Minisitiri Ngamije yavuze ko kandi nk’u Rwanda rumaze gutera intambwe ishimishije mu kurwanya malaria bitewe no gukoresha abajyana b’ubuzima mu kuvura abaturage no kubagezaho ibikoresho bibafasha mu kuyirinda.

Minisitiri w’Ubuzima wungirije wa Tanzania, Dr Godwin Mollel, yavuze ko guhuza ibikorwa byo kurwanya malaria muri ibi bihugu bizafasha abaturage b’ibihugu byose kuko buri muturage azajya yishyira akizana azi neza ko iyi ndwara aho agiye na ho bari kuyirwanya neza.

Uhagarariye Ishami ry’Umuryango w’Abibumbye ryita ku buzima mu Rwanda, Dr Brian Chirombo, yavuze ko yishimiye ubufatanye bw’ibi bihugu mu kurandura malaria mu bihugu byabo ngo kuko ubusanzwe buri gihugu wasangaga gikoresha uburyo butandukanye n’ubw’ikindi mu kuyirwanya.

Mu mwaka wa 2016 abari barwaye malaria mu Rwanda bari miliyoni 4,5 mu gihe mu 2020/2021, abayirwaye bageze kuri miliyoni imwe n’ibihumbi 400, abapfuye bavuye ku 167 mu mwaka wa 2019/2020 bagera kuri 96 mu mwaka wa 2021.

U Rwanda rufite intego yo kurandura malaria burundu mu mwaka wa 2024, ibi bikazagerwaho mu gihe abaturage bose bazajya batererwa imiti yica imibu iyitera, kuryama mu nzitiramibu ku baturage bose, gukoresha abajyanama b’ubuzima mu kuvura abaturage n’izindi ngamba nyinshi zagiye zikorwa.

Muri ibi bikorwa bihuriweho biteganyijwe ko hazubakwa amavuriro y'ibanze hafi y'imipaka yose
U Rwanda rwasangije ibindi bihugu uburyo rukoresha drone mu gutera imiti mu bishanga
Minisitiri w'Ubuzima Dr Ngamije yavuze ko ibihugu byo mu karere bizajya bakorera hamwe mu kurwanya malaria
Umuyobozi wa OMS, ishami ry'u Rwanda, Dr Brian Chirombo yavuze ko ugushyira hamwe kw'ibi bihugu ari inyungu ku baturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .