HCR iratabariza impunzi z’Abarundi ziri mu Rwanda

Yanditswe na Herve Ugirumukunda
Kuya 3 Ukwakira 2017 saa 04:21
Yasuwe :
0 0

Ishami ry’Umuryango w’Abibumbye ryita ku mpunzi, HCR, ryatangaje ko riri mu nzira yo gushirirwa n’inkunga yo gufasha impunzi z’Abarundi ziri mu Rwanda,ritabaza amahanga n’abagiraneza ngo bazigoboke.

HCR ivuga ko hakenewe miliyoni 429 z’amadorali kugira ngo impunzi z’Abarundi ziri mu Rwanda n’ibindi bihugu bituranye n’u Burundi zibone ibizitunga bihagije nk’uko itangazo yashyize ahagaragara ribigaragaza.

Umuyobozi muri HCR ushinzwe ibikorwa byo kwita ku mpunzi z’Abarundi mu karere, Catherine Wiesner, yavuze ko kuri ayo mafaranga asabwa, hamaze kuboneka 12% gusa, bigatuma impunzi z’Abarundi ari zo zititaweho kurusha izindi ku Isi.

Yasobanuye ko izo mpunzi zikomeje kubaho mu nkambi zicucitse, zidafite umutekano, amahema yazo akaba arushaho gusaza, nta mazi, nta funguro rihagije, ndetse ntizibone serivisi z’ubuzima n’uburezi.

Yongeyeho ati “Impunzi zibayeho zityo ari nyinshi zishobora kwanduzanya indwara nka malaraya ndetse n’impiswi.”

Umukozi wa HCR mu nkambi ya Mahama mu karere ka Kirehe, Janet Pima, avuga ko ibura ry’inkunga ryamaze kugira ingaruka ku mpunzi zaho, kuko Abarundi bahahungira bakomeje kwiyongera bakabura uko bubakirwa.

Ati “Ibura ry’inkunga ni ikibazo gikomeye kuko rituma tutabasha kubaka amahema mashya cyangwa ngo duhe impunzi ibyo zikeneye byose, mu gihe hari abandi benshi bakomeje kuduhungiraho.”

HCR ivuga ko mu Rwanda hari impunzi 85 000 zirimo iziba mu mijyi nka Kigali, ariko inyinshi muri zo zicumbikiwe mu nkambi ya Mahama.

Janet Pima avuga ko bahangayikishijwe bikomeye n’ibura ry’aho kwakirira Abarundi bahunga muri iyi minsi kuko aho kwagurira Mahama hashize.

Ati” Dufite impunzi zibarirwa mu 54 000 kandi hose huzuye amahema. Ubu nta mwanya dufite ni cyo kitubangamiye cyane muri iyi minsi.”

Kuri ubu impunzi zimara igihe kinini mu bigo zakirirwamo, cyane cyane mu karere ka Nyanza zitarabasha kwimurirwa i Mahama.

Pima yasobanuye ko HCR na Leta y’u Rwanda biri kuganira ku buryo abaturage begereye inkambi ya Mahama bimurwa naho hagashyirwa amahema.

U Rwanda rwakiriye impunzi z’Abarundi kuva muri 2015 ubwo Perezida Nkurunziza yatangazaga ko aziyamamariza manda ya gatatu bigateza imvururu zahitanye abaturage barirwa hagati ya 500-1000.

Si ubwa mbere HCR ivuga ko yashiriwe n’inkunga yo gufasha impunzi z’Abarundi kuko no muri Werurwe umwaka ushize, yatanze impuruza isaba miliyoni 175 z’amadorali y’Amerika, icyo gihe yavugaga ko imaze kubona 3% gusa.

Muri Nzeri 2016 nabwo uyu muryango wasabaga miliyoni 94.5 ariko icyo gihe wari umaze kubona 18% gusa.

Impunzi z'Abarundi, Charlene n'abo mu muryango we nyuma yo kwakirwa i Nyanza
Inkambi ya Mahama icumbikiwemo impunzi z'Abarundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza