Hateguwe amarushanwa y’abahanzi, abanyamakuru n’abashakashatsi babungabunga neza Ikinyarwanda

Yanditswe na IGIHE
Kuya 7 Gashyantare 2021 saa 12:19
Yasuwe :
0 0

Inteko y’Umuco yateguye amarushanwa agamije gushimira abahanzi, abanyamakuru n’abashakashatsi bagaragaza umuhate mu guteza imbere no kubungabunga ururimi rw’Ikinyarwanda binyuze mu byo bakora.

Ayo marushanwa yateguwe mu mu rwego rwo kwizihiza umunsi Mpuzamahanga w’Ururimi Kavukire uzaba tariki ya 21 Gashyantare 2021,.

Abahanzi

Abahanzi babiri bazashimirwa ni abahize abandi mu guteza imbere Ikinyarwanda n’umuco w’u Rwanda bigaragarira mu ndirimbo zabo. Ibizagenderwaho mu kubatoranya harimo kuba ari Umunyarwanda; Umuhanzi wa muzika agomba kuba amaze imyaka nibura ibiri ahanga mu Kinyarwanda kandi indirimbo ze zinyura mu bitangazamakuru binyuranye; Indirimbo igomba kuba ari umwimerere w’umuhanzi atari ugusubiramo iz’abandi, indirimbo z’umuhanzi zigomba kuba zikoresha Ikinyarwanda kinoze kandi zitarimo imvugo zitokoza umuco n’indangagaciro by’u Rwanda.

Inteko y’umuco kandi yavuze ko umuhanzi agomba kuba aririmba ku giti cye, ariko ufite abamufasha, kuba afite nibura indirimbo imwe yatangaje mu mwaka wa 2020 cyangwa uwa 2021 byaba ari akarusho.

Indirimbo mu majwi cyangwa mu majwi n’amashusho zizohererezwa inama y’igihugu y’abahanzi (Rwanda Arts Council) n’inteko y’umuco bitarenze ku wa 12 Gashyantare 2021 mu buryo bw’ikoranabuhanga hatangwa umurongo “links” (Youtube, Sound Cloud,…) w’indirimbo eshanu (5) kuri [email protected], [email protected] Hagomba kandi koherezwa inyandiko ya buri ndirimbo (lyrics) n’umwirondoro mugufi (CV) wa nyirayo.

Ku ikubitiro hazatoranywa abahanzi batanu bazavanwamo babiri bahize abandi. Babiri batoranyijwe, bazashimirwa buri wese agenerwa icyemezo cy’ishimwe n’agahimbazamusyi gafite agaciro k’amafaranga ibihumbi magana atanu y’u Rwanda (500.000FRW), akazaterwa kandi inkunga ya miriyoni imwe y’amafaranga y’u Rwanda (1,000,000 FRW) azamufasha mu kwagura ubuhanzi bwe ahanga indirimbo nshya mu majwi n’amashusho ku muco n’umurage by’u Rwanda. Abahanzi 3 bandi na bo buri wese azagenerwa ishimwe.

Abanyamakuru

Inteko y’umuco yatangaje ko hazashimirwa umunyamakuru uyobora ikiganiro mu Kinyarwanda gihoraho kuri radiyo, umunyamakuru wandika inkuru zicukumbuye cyangwa zisesenguye mu Kinyarwanda (abinyujije kuri murandasi cyangwa ikinyamakuru gicapuruye ku mpapuro), umunyamakuru uyobora ikiganiro gihoraho mu Kinyarwanda kuri TV ndetse n’umunyamakuru wabaye indashyikirwa mu gukoresha neza Ikinyarwanda.

Aba banyamakuru bagomba kuba bakorera ibitangazamakuru byo mu Rwanda, bifite uburenganzira butangwa n’inzego z’Igihugu zibifitiye ububasha.

Ibizashingirwaho hatoranywa abo banyamakuru harimo kuba afite ikarita iranga umunyamakuru yatanzwe n’urwego rubifitiye ububasha;Umunyamakuru agomba kuba amaze imyaka nibura ibiri ku bakora kuri TV, imyaka itatu ku bakora kuri radiyo n’abandika, kuba afite ikiganiro gihoraho kuri radiyo/ kuri TV. Ku wandika, agomba kuba yandika mu buryo buhoraho inkuru zisesenguye cyangwa zicukumbuye, ikiganiro cyangwa inkuru bigomba kuba bikoresha Ikinyarwanda kinoze kandi kiboneye, ibiganiro bigomba kuba biyoborwa mu buryo bw’imbonankubone (adasoma) kandi ikiganiro cyangwa inkuru, bigomba kuba byarakozwe mbere ya Gashyantare 2021.

Umunyamakuru kandi agomba kuba afite nibura ibiganiro 5 cyangwa inkuru 5 byatangajwe kandi byaboneka mu buryo bw’ikoranabuhanga.

Inkuru eshanu ku bandika cyangwa ibiganiro bitanu mu majwi (radiyo)/mu majwi n’amashursho (TV) bizohererezwa Inteko y’Umuco bitarenze ku wa 12 Gashyantare 2021 mu buryo bw’ikoranabuhanga hatangwa: inkuru muri PDF kubatarabitangarije kuri murandasi n’umurongo “links” (Youtube, Sound Cloud,…) kuri [email protected] na kopi kuri [email protected] Hagomba kandi koherezwa umwirondoro mugufi (CV) w’umunyamakuru uherekejwe na fotokopi y’ikarita ye.

Muri buri cyiciro hazatoranywa umunyamakuru umwe wahize abandi uzahabwa icyemezo cy’ishimwe ndetse n’agahimbazamusyi k’amafaranga y’u Rwanda ibihumbi magana atanu (500.000 FRW). Inteko y’Umuco izashimira kandi umunyamakuru wagaragaje kuba indashyikirwa mu gukoresha neza Ikinyarwanda imugenera icyemezo cy’ishimwe n’agahimbazamusyi kangana na miliyoni imwe y’amafaranga y’u Rwanda (1.000.000 FRW). Uburyo azatoranywa bigenewe akanama kihariye kazajyaho.

Abashakashatsi

Hazashimirwa umushakashatsi uzaba waragaragaje ibikorwa by’imena bigamije gusigasira no guteza imbere Ikinyarwanda mu bushakashatsi bwe.

Hazashingirwa ku kuba ari Umunyarwanda, kuba akiriho ku itariki ya 21 Gashyantare 2021, kuba yaranditse nibura igitabo kimwe mu Kinyarwanda no ku Kinyarwanda. Ibi bivuze ko igitabo kigomba kuba cyanditse mu rurimi rw’Ikinyarwanda kandi kikavuga ku Kinyarwanda nk’ururimi.

Asabwa kandi kuba igitabo kigaragaza aho cyatunganyirijwe, umwaka cyasohokeyeho, amazina y’uwacyanditse, amazina y’ugifiteho uburenganzira. Kuba gifite inomero iranga ibitabo (ISBN) byaba akarusho. Ntabwo inyandiko y’ubushakashatsi irangiza icyiciro cy’amashuri (mémoire, thèse,..) runaka byemewe.
Umushakashatsi kandi igitabo cye kigomba kuba cyarasohotse muri iyi myaka 10 ya nyuma, kuba cyaranditswe biturutse ku bushakashatsi bwite bw’umwanditsi butegamiye cyangwa bwasabwe/bwatewe inkunga n’urwego uru n’uru cyangwa se cyaranditswe mu rwego rw’akazi no kuba igitabo kidahuriweho n’abanditsi.

Abashakashatsi bazohereza ibitabo byabo mu buryo bw’ikoranabuhanga kuri [email protected] bitarenze tariki ya 10 Gashyantare 2021. Inyandiko y’igitabo igomba kuba iherekejwe n’umwirondoro w’Umushakashatsi (mu Kinyarwanda).

Umushakashatsi uzahembwa azahabwa icyemezo cy’ishimwe n’igihembo cy’amafaranga Miriyoni imwe n’ibihumbi magana abiri (1.200.000 FRW) azamufasha mu gutangaza no kumenyekanisha igitabo cye.

Mu kuzirikana umunsi Mpuzamahanga w’Ururimi Kavukire hazashimirwa abahanzi, abanyamakuru n'abashakashatsi bagaragaza umuhate mu gusigasira ururimi rw'Ikinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .