Gatsibo: Uwiyitaga umukozi wa REG akambura abaturage yafashwe

Yanditswe na Tuyishimire Raymond
Kuya 23 Gashyantare 2021 saa 09:49
Yasuwe :
0 0

Umugabo wo mu murenge wa Kiramuruzi mu karere ka Gatsibo, yatawe muri yombi nyuma y’iminsi yiyitirira kuba umukozi wa Sosiyete ishinzwe ingufu (REG), akajya kubaka imiyoboro y’amashanyarazi itemewe.

Uyu mugabo yafashwe kuwa 22 Gashyantare 2021 nyuma y’aho yari amaze ibyumweru bibiri akora ibyo bikorwa.

Umuyobozi wa REG ishami rya Gatsibo, Nyiringabo Jean de Dieu ,yabwiye IGIHE ko uyu mugabo yibaga mubazi ku nzu z’abaturage akazijyana kuziha abandi yahaga amashanyarazi mu buryo butemewe.

Nyiringabo yavuze ko uwo mugabo kugira ngo yemere guhereza umuturage umuyoboro w’amashanyarazi, yabanzaga kumwaka amafaranga. Yafashwe hari uwo yari yaciye 140 000Frw.

Ati “Ubundi kugira ngo umuntu ahabwe amashanyarazi hari inzira bicamo. Wegera REG ugasaba nkuko abanyarwanda bose basaba, REG ikamusura ikamenya ibikenewe. Icyo gihe ntabwo amafaranga atangwa mu ntoki, nubwo yaba ari umukozi wa REG, ntabwo yayafata mu ntoki”.

Yakomeje ati ”Akorerwa ibintu byose bikenewe byo kuzakora aho hantu niba ari amafaranga y’imirimo ,wenda ibikoresho bigashakishwa ,umuyoboro ukubakwa kandi wuzuje ubuziranenge”.

Yongeyoho ko abaturage badakwiye guca iy’ubusamo ngo babone amashanyarazi kuko mu ntego Guverinoma yihaye harimo kuba abaturage bose babonye amashanyarazi bitarenze 2024.

Uwafashwe yagiye gufungirwa kuri sitasiyo y’Urwego rw’Ubugenzacyaha ya Kiramuruzi.

Uyu mugabo yafashwe yiyitirira kuba umukozi wa REG agaha abantu amashanyarazi mu murenge wa Kiramuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .