Dr. Rwigema Pierre Céléstin yahawe impamyabumenyi ihanitse mu bijyanye n’imiyoborere

Yanditswe na Twarabanye Venuste
Kuya 1 Ukuboza 2019 saa 08:28
Yasuwe :
0 0

Dr. Rwigema Pierre Céléstin wigeze kuba Minisitiri w’intebe w’u Rwanda, ubu akaba ari Umudepite uhagarariye u Rwanda mu Nteko Ishinga Amategeko y’Afurika y’Iburasirazuba (EALA) yahawe Impamyabumenyi ihanitse mu bijyanye n’imiyoborere (Doctor of Philosophy in Leadership and Governance) muri Kaminuza yitiriwe Jomo Kenyatta.

Dr. Rwigema Pierre Céléstin yahawe iyo mpamyabumenyi mu muhango wabereye ku cyicaro cya Kaminuza yitiriwe Jomo Kenyatta giherereye Juja, kuri uyu wa Gatanu tariki 29 Ugushyingo 2019.

Hari ku nshuro ya 34 iyo Kaminuza itanga impamyabumenyi, aho abagera ku 4,733 basoje amasomo mu byiciro bitandukanye.

Mu gitabo gikubiyemo ubushakashatsi yakoze atangira ashimira Imana ndetse agashimira Perezida wa Repubulika Paul Kagame avuga ko iyo atagira umwanya w’imirimo arimo ubu, bitari kumworohera gutera iyo ntambwe .

Dr. Rwigema yabwiye IGIHE ko yishimiye cyane intambwe yateye.

Ati “Byaranshimishije cyane kuko nabitsinze neza n’amanota yo hejuru cyane kandi nakubwira ko no mu ishami nari ndimo ry’imiyoborere (Leadership and Governance) nabonye Impamyabumenyi ihanitse ari njye njyenyine, byaranshimishije cyane nubwo ndi umusaza ariko ndishimye.”

Dr. Rwigema yakoze ubushakashatsi ku ruhare rw’amatora ku butajegajega bwa Politiki y’ibihugu bigize Umuryango wa Afurika y’Iburasirazuba.

Mu bushakashatsi bwe, yibanze ku bihe bikuru biranga amatora, birimo itegurwa ryayo, igihe ari kuba na nyuma yayo n’uruhare rw’imiyoborere kugira ngo abe mu mucyo.

Avuga ko ikibazo cya mbere ari uko abaturage badategurwa ngo bajye mu matora bazi ibyo bagiye gukora, kandi nyamara bikozwe bityo bajyamo biteguye uruhare rwabo.

Ati “ Nk’urugero kubona nk’ubu muri Leta zunze ubumwe za Amerika, kugeza ubu batangiye kuvuga ibyerekeye amatora, amashyaka ari guhatana, kugeza ubwo bazagenda bavamo bavamo hakazasigara umuntu umwe, usanga rero muri Afurika igihe cya mbere y’amatora kigomba kujyana no gusobanurira abaturage iby’amategeko, kubigisha kugira ngo bumve uruhare rwabo, kugira ngo bajye mu bintu biteguye bazi kandi banashaka, bashobora no kugiramo uruhare mu gutanga icyo bifuza.”

Yakomeje agira ati “Icyo gihe kiba gito cyane bamenyeshwa ko bagiye gutora bugacya bakajya gutora noneho bajyamo batiteguye batarasobanukiwe, ahanini ugasanga noneho hajemo amakimbirane, ya makimbirane akaza mu gihe cya nyuma y’amatora.”

Mu bushakashatsi bwe, yanagaragaje ko Demokarasi idashingiye ku matora gusa, ahubwo ko ishingira no ku bundi buzima bw’igihugu burimo iyubahirizwa ry’amategeko n’uburenganzira bwa muntu ndetse no kurwanya ubukene.

Dr. Rwigema yatangiye urugendo rwo gukorera impamyabumenyi ihanitse mu mpera za 2014 akaba ari urugendo amazemo imyaka igera kuri itanu.

Mu kazi ke muri EALA yakurikiranye amatora y’ibihugu bya EAC mu bihe bitandukanye; harimo Kenya mu 2012, mu Burundi mu 2015 ndetse n’ayo muri Tanzaniya.

Ku rutonde rw’abasoje bahawe Impamyabumenyi zihanitse hariho n’umunyarwandakazi witwa Kayirangwa Venerande wayibonye mu micungire y’ubucuruzi (Doctor of Philosophy in Business Administration).

Rwigema yahawe Impamyabumenyi ihanitse mu bijyanye n’imiyoborere (Doctor of Philosophy in Leadership and Governance) muri Kaminuza yitiriwe Jomo Kenyatta
Rwigema atangira ashimira Imana ndetse agashimira Perezida wa Repubulika Paul Kagame avuga ko iyo atagira umwanya w’imirimo arimo ubu, bitari kumworohera gutera iyo ntambwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza