Congo yatangaje ko abashaka kuyiryanisha n’u Rwanda batazabigeraho

Yanditswe na Muhonzire Sylvine
Kuya 15 Gashyantare 2021 saa 11:31
Yasuwe :
0 0

Repubulika Iharanira Demokarasi ya Congo (RDC) yatangaje ko abashaka ko umubano w’icyo gihugu n’u Rwanda umera nabi batazabigeraho kuko ibihugu byombi bifitanye umubano ukomeye.

Byavugiwe mu nama y’iminsi ibiri yahuje intumwa z’inzego z’umutekano muri Repubulika Iharanira Demokarasi ya Congo n’ubuyobozi bw’ingabo z’u Rwanda, yatangiye ku wa Gatandatu i Kigali, yibanze ku gushimangira umubano n’ubufatanye hagati y’ibihugu byombi.

Intumwa zaturutse muri RDC zaje ziyobowe n’Umujyanama wihariye mu by’umutekano wa Perezida Félix Antoine Tshisekedi, François Beya Kasonga, mu gihe iz’u Rwanda zari ziyobowe n’Umugaba Mukuru w’Ingabo z’u Rwanda, General Kazura Jean Bosco.

Mu biganiro bagiranye bagarutse byumwihariko ku mutekano wo mu Karere, gutsura umubano hagati y’ibihugu byombi, ndetse no ku bibazo by’umutekano bikunda kwibasira akarere.

François Beya, yavuze ko iyi nama yabaye kugira ngo bereke isi ko bunze ubumwe ndetse ko abatifuza kubona u Rwanda na Congo byiyunze batazabigeraho.

Yagize ati “Twaje hano ngo duhinyuze isi yose, cyane cyane abo mu Burengerazuba bw’Isi badashaka kutubona tuganira cyangwa dukorera hamwe. Turi hano ngo tuvuge ko twunze ubumwe kandi nta makimbirane ari hagati yacu.”

Umugaba Mukuru w’Ingabo z’u Rwanda, Gen. Kazura yunze mu rya François Beya agira ati “Iyo abantu bashyize hamwe, bagakorera hamwe ntacyo batageraho.”
Mu bindi byibanzweho cyane muri iyi nama harimo guhashya imitwe yitwaje intwaro ibarizwa mu Burasirazuba bwa Congo irimo FDLR, ADF, Mayi-Mayi n’iyindi.

Iyi nama yabaye ku busabe bwa Perezida w’u Rwanda, Paul Kagame, ndetse na mugenzi wa Congo, Félix Tshisekedi, nyuma y’indi yabereye muri RDC muri Mutarama 2021.

Yahuje abayobozi batandukanye muri Congo harimo na Perezida Tshisekedi, ndetse n’abaturutse mu Rwanda barimo Minisitiri w’Ububanyi n’Amahanga w’u Rwanda, Dr Vincent Biruta, Umugaba Mukuru w’ingabo z’u Rwanda General Jean Bosco Kazura na Maj Gen Joseph Nzabamwita uyobora Urwego rw’igihugu rushinzwe iperereza, NISS.

Kuva Perezida Félix Antoine Tshisekedi yatorerwa kuyobora RDC yakomeje kugaragaza ubushake bwo gufatanya n’u Rwanda mu gushakira umuti ibibazo byo mu Karere birimo guhashya imitwe igamije guhungabanya umutekano. Ndetse abari abarwanyi ba FDLR barafashwe boherezwa mu Rwanda abandi baricwa ku buryo abasigaye ari mbarwa.

Ibiganiro byabereye i Kigali byakurikiye ibyabereye i Kinshasa muri Mutarama 2021
Intumwa za RDC zatangaje ko umubano w'u Rwanda n'icyo gihugu uhagaze neza
Ibiganiro byabereye i Kigali byakurikiye ibyabereye i Kinshasa muri Mutarama 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .