Burera: Ubuyobozi bwiyemeje kwinjira mu bibazo by’abatsinze imanza ntibahabwe ibyo batsindiye

Yanditswe na Claude Bazatsinda
Kuya 25 Werurwe 2021 saa 08:26
Yasuwe :
0 0

Ubuyobozi bw’Akarere ka Burera bwatangaje ko bugiye gufasha bamwe mu baturage, bagiye batsindira imitungo yabo mu nkiko ariko abatsinzwe bakinangira kuyivamo ngo usibizwe bene yo bikongera amakimbirane.

Iki kibazo usanga aho kiri, ahenshi gituruka ku izungura ryakozwe nabi cyangwa ababa baraguze ubutaka n’abatari bene bwo mu buryo bunyuranyije n’amategeko.

Bamwe muri aba baturage baganiriye na IGIHE, bavuze ko n’ubwo baba barahawe ubutabera, hakigaragara akarengane kuko imitungo yabo baba baratsindiye baba batarayisubizwa kubera ababa barinangiye ntibayisubize, ibintu bavuga ko hari n’igihe haba haratanzwe ruswa ku bayobozi b’inzego z’ibanze.

Uwizeyimana Vestine n’abavandimwe be bavuga ko bamaranye ikibazo nk’iki imyaka igera kuri ine, bagifitanye n’uwari waraguze isambu na musaza wabo mu buryo bunyuranyije n’amategeko nyamara baratsindiye ubutaka basigiwe n’ababyeyi babo buherereye mu Mudugudu wa Kabindi Akagari ka Kidakama mu Murenge wa Gahunga.

Yagize ati"Iyi sambu yacu yaguzwe na Twahirwa Jean, ayigura na musaza wacu mu buriganya, twaraburanye turatsinda muri 2017, umuhesha w’inkiko aduhesha iyo sambu ariko kugeza n’ubu ntiturayibona kuko Twahirwa yanze kuyivamo. Bamaze kuduhesha iyi sambu yacu, twagiye kuyihinga tujyanayo n’imbuto y’ibigori, twatunguwe n’uko icyo gihe haje inzego z’Umurenge hari na Gitufu wa Gahunga na Polisi badukuramo baravuga ngo tuzajye kurega yewe ngo banadufunga.

Uwiringiyimana Beatrice na we bavukana yagize ati" Isambu twarayitsindiye mu Rukiko Rwisumbuye rwa Musanze turanayigabana nk’abakobwa twavukanaga ariko kuva 2017 ntitwari twayihabwa, turifuza ko ubuyobozi bwadufasha tugahabwa isambu yacu tukayihinga"

Imanaturikumwe Vincent ni umuturanyi w’uyu muryango wemeza ko iyi sambu ari ay’aba bakobwa koko, we yagize ati " Uyu murima ni uwabo n’ubwo batabonye umwanya wo kuwuhinga kuko babusigiwe n’ababyeyi babo baza no kuwugabana bamaze kuwutsindira".

Twahirwa Jean uvugwa kuba yaranze kuva muri iyi sambu ngo isubizwe ba nyirayo, yagize ati " Njyewe ubutaka nabuguze na musaza wabo afite ibyangombwa, niba warabirebye neza mu manza zabaye ntaho ngaragara bo baziburaniye nk’imiryango, abo rero ibyo bavuga ntabwo ari ukuri".

N’ubwo nta mibare igaragaza neza ababa bafite ibibazo bijyanye n’uko kwigomeka ku myanzuro y’inkiko mu Karere ka Burera, usanga hari igihe hari abaturage bazindukira kuri aka Karere bagiye gushaka umukozi utanga ubufasha mu by’amategeko ( MAJ) ngo abafashe mu bijyanye n’amategeko.

Umusaza witwa Bizimana Anaclet ni umwe muri bo wo mu Murenge wa Butaro twahasanze, yagize ati" Njye naje hano nje gushaka umukozi wa MAJ ngo bamfashe kuko maranye ikibazo igihe kirenga imyaka ibiri naratsindiye umurima wanjye ariko uwawufatiriye yanze kuwumpa ngo azashoramo amafaranga yose ashoboka ariko nywubure, ubu nibwo ngeze aha ngo ngishe inama kuko sinahangana n’uwo mugabo dufitanye ikibazo"

Umuyobozi w’Akarere ka Burera, Uwanyirigira Marie Chantal yavuze ko ibi bibazo bigiye gukurikiranwa bigakemurwa kandi ko nta muntu n’umwe wemerewe kwigomeka ku myanzuro y’inkiko.

Yagize ati "Nasabye Umunyamabanga Nshingwabikorwa w’umurenge gukurikirana iki kibazo tukamenya neza uko giteye kugira ngo tubashe kugikurikirana neza no gufasha umuturage dushingiye kucyo itegeko riteganya. Ubundi nta muntu ukwiye kwigomeka ku myanzuro y’urukiko, aho kwigomeka iyo atanyuzwe n’imyanzuro ajuririra urukiko rwisumbuye ariko iyo atsinzwe urubanza rukarangizwa ibyemezo biba bikwiye gushyirwa mu bikorwa"

Mu gitabo cy’amategeko giteganya ibyaha n’ibihano mu Rwanda cyo kuwa 30 Kanama 2018, mu ngingo ya 262 havuga ko "Umuntu wese utesha agaciro igikorwa cyangwa icyemezo cy’inzego z’ubutabera mu buryo busagarira ububasha cyangwa ubwigenge bwazo, hakoreshejwe amagambo, ibyanditse, amashusho cyangwa ibikorwa ibyo ari byo byose, aba akoze icyaha.

Iyo abihamijwe n’urukiko, ahanishwa igifungo kitari munsi y’umwaka umwe (1) ariko kitarenze imyaka ibiri (2) n’ihazabu y’amafaranga y’u Rwanda atari munsi y’ibihumbi magana atatu (300.000 FRW) ariko atarenze ibihumbi magana atanu (500.000 FRW) cyangwa kimwe gusa muri ibyo bihano".

Akarere ka Burera katangaje ko kagiye gukurikirana ibibazo by'abaturage bafite imanza zitarangijwe ngo bahabwe ibyo batsindiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .