Kwigana umusatsi byakuruye impaka hagati y’ababyeyi, abanyeshuri n’abarezi mu Rwanda

Yanditswe na Ntabareshya Jean de Dieu
Kuya 18 Mutarama 2021 saa 10:52
Yasuwe :
0 0

Ababyeyi, abanyeshuri n’abarimu ntibavuga rumwe ku kuba mu burezi bw’u Rwanda, ibigo bimwe byemerera abanyeshuri b’abakobwa kwiga bafite imisatsi harimo no kudefiriza, kwisiga ibirungo by’ubwiza n’ibindi bikorwa n’abakobwa batari ku ntebe y’ishuri.

Amenshi mu mashuri ya Leta asaba umunyeshuri kwiyogoshesha umusatsi buri kwezi, yaba umuhungu cyangwa umukobwa. Ntiyemerera kandi umukobwa kwisiga ibirungo by’ubwiza.

Ibi byakuruye impaka hagati y’ababyeyi, abarezi n’abanyeshuri. Bamwe bemeranya n’icyemezo cyo kogoshesha abanyeshuri bose, abandi bakavuga ko abakobwa bari bakwiye guhabwa uburenganzira busesuye kandi ntibibe umwihariko w’ibigo bimwe na bimwe.

Abavuga ko badashyigikiye icyemezo cy’amwe mu mashuri yigisha abana b’abakobwa bafite umusatsi, bavuga ko bishobora gukurura imyitwarire itari myiza.

Umwe mu babyeyi baganiriye na IGIHE witwa Seraphine Muhoza, yavuze ko umwana w’umukobwa akwiye kugira ikimwibutsa ko ari ku ntebe y’ishuri.

Ati “Niba umwana w’umukobwa yigana umusatsi ntabwo azumva ko ari umunyeshuri, rimwe na rimwe biba byiza ko biyogoshesha ibintu bituma babona itandukaniro n’abarimu babo.”

Uwimana Francine w’imyaka 33, avuga ko atashyigikira na gato ibyo guha uburenganzira busesuye abakobwa bari ku ntebe y’ishuri.

Ati “Twese twagiye twiga twiyogoshesheje. Byatumaga twumva ko turi abanyeshuri, naho uyu muco wo kureka umukobwa akikora ibyo ashaka bishobora no kubashora mu mico mibi itari myiza.”

Abashyigikiye icyemezo cyo guha ubwisanzure umwana w’umukobwa bavuga ko bituma batagira kurarikira ikintu runaka ahubwo bagasanga icyuho kiri ku ruhande rwa Leta ituma biba mu mashuri amwe ahandi ntibyemerwe.

Singirankabo Donat, umubyeyi ufite abana biga mu mashuri, abona ntacyo bitwaye kwigana umusatsi, gusa akemeza ko abanyeshuri bakwiye kugira amabwiriza amwe abagenga.

Ati “Njyewe mbona kuba umwana w’umukobwa yashyiraho imisatsi cyangwa n’ibindi birungo ntacyo bitwaye kubera ko birinda umwana kubirarikira. Ibi bimufasha gutuza akiga ntacyo ararikiye. Ahubwo ikibazo ni uko ibigo byose bisa nk’aho bitandukanye ku mabwiriza bigenderaho.”

Umwe mu banyeshuri b’abakobwa waganiriye na IGIHE wiga ku kigo cyemerera abanyeshuri gutunga umusatsi, yavuze ko kutabyemera aribyo bibi kurusha kubyemera.

Ati “Akenshi hari gihe umukobwa ashobora kurarikira ibintu nk’ibi by’umwihariko mu gihe cy’ibiruhuko ariko iyo asanzwe abikora ntaho umusore cyangwa undi wese yahera ibimushukisha.”

Yongeyeho ati “Erega n’ubundi uretse imyumvire iba itandukanye, ibi ntaho bihurira n’umusaruro tubona. None se twebwe ntidutsinda? Turatsinda kandi neza.”

Abarimu bigisha mu bigo bitemerera abana kwisiga ibirungo by’ubwiza n’imisatsi basobanura ko impamvu zishingirwaho kuri aya mabwiriza bigendana no kurinda umwana w’umukobwa kwiyandarika no kurangaza bagenzi be.

Alex Ndayizeye wigisha mu Karere ka Muhanga yagize ati “Mu by’ukuri iyo umwana yisize ibirungo nka biriya, imisatsi itendera bituma yikuza imburagihe, arangaza bagenzi be, ariko kandi hari igihe na mwalimu bimubangamira bikamubuza ubwisanzure mu kwigisha.”

Minisiteri y’Uburezi igaragaza ko kwemerera abanyeshuri b’abakobwa kwiyogoshesha, gutereka, gusukisha imisatsi cyangwa kwisiga ibirungo by’ubwiza bijyana n’amabwiriza y’ikigo.

Umunyamabanga wa Leta muri Minisiteri y’Uburezi ushinzwe Amashuri y’incuke Abanza n’Ayisumbuye, Twagirayezu Gaspard yabwiye Radio1 ko ishuri naryo rifite uburenganzira bwo gushyiraho amategeko rigenderaho ariko mu nyungu z’umwana.

Ati “Nka Minisiteri dushyiraho amabwiriza rusange ariko ikigo nacyo cyemerewe kugira amategeko agenga uko ikigo gishobora kwitwaramo imbere. Ayo mategeko icyo aba agamije ni ukugira ngo abana bige neza kandi nanone babe ahantu heza ariko bigakorwa hagamijwe ko umwana yiga atekanye.”

Amabwiriza ya Mineduc ari muri nimero 001 yo ku wa 10/05/2017 yashyizeho imirongo migari ishingirwaho n’ishuri mu gushyiraho amategeko ngengamikorere y’ishuri ry’incuke, iribanza, iryisumbuye, iry’inyigisho rusange n’ubumenyingiro.

Ingingo ya 24 yayo ivuga ku myambarire y’abanyeshuri igihe bari ku ishuri igira iti “Mu gihe bari ku ishuri abanyeshuri bose bagomba kwambara umwambaro wagenwe n’ishuri. Abanyeshuri b’abakobwa bagomba kwambara impuzankano yagenwe y’ishuri igera munsi y’amavi kandi itagera hasi cyane.”

Ikomeza ivuga iti “Amategeko ngengamikorere agomba kugaragaza impuzankano zambarwa haba ku bakobwa no ku bahungu. Agomba kugaragaza ko kudefiriza imisatsi, gusiga inzara, iminwa, ibitsike, amaso, kwambara imikufi, imidari n’ amaherena bitemewe. Akagaragaza uburebure bw’impuzankano, uburyo bwo kuyambara n’indi myambaro yemewe ku ishuri.”

Hari amashuri amwe yemerera abanyeshuri kwigana imisatsi mu gihe andi atabyemera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .