AU izabasha gucecekesha imbunda muri Afurika mu 2020?

Yanditswe na Twarabanye Venuste
Kuya 5 Nzeri 2019 saa 08:13
Yasuwe :
0 0

Mu mwaka wa 2013 nibwo abakuru b’ibihugu bya Afurika na Guverinoma zigize Umuryango wa Afurika Yunze Ubumwe bemeje gahunda yo guhagarika Intambara ku Mugabane wa Afurika yise “Silence The Guns”, bitarenze umwaka wa 2020.

Hasigaye amezi make ngo umwaka ntarengwa wemejwe ugere nyamara hamwe mu bice bya Afurika imbunda ziracyumvikana, abantu baracyapfa kubera intambara n’amakimbirane.

Umuyobozi ushinzwe ibikorwa bya Politiki muri Komisiyo ya Afurika Yunze Ubumwe, Dr. Khabele Matlosa, yakomoje kuri iyo ntego ubwo yitabiraga Inama yiga ku buryo amatora akozwe neza yaba ishingiro ryo gukemura ibibazo biyakomokaho muri Afurika, birimo n’izo ntambara.

Kuri uyu wa Kabiri ubwo yari i Kigali, yagaragaje ko icyizere cyo kuyubahiriza ari cyose nk’uko abakuru b’Ibihugu babyemeje.

Yavuze ko intambwe ya mbere kugira ngo ibihugu byose bigende umujyo umwe ari ukumva icyo amakimbirane aricyo ndetse abantu bakamenya ko aho abantu bari hatabura uruntu runtu.

Agira ati“Amakimbirane ubwayo si mabi buri hantu bagira amakimbirane no mu rugo umugore ayagirana n’umugabo. Kutumva ibintu kimwe si ikibazo ahubwo uburyo mubikem. Rero urumva ko no ku mugabane wacu ukutumva ibintu kimwe atari cyo kibazo ahubwo uburyo abantu bafata bwo kubikemura nibwo buteza ibibazo.”

Abajijwe ku mwihariko ukubiye mu kubahiriza iyo ntego ya “Silence The Guns” Dr. Khabele yavuze ko hari inzira ebyiri zikomeye bikwiye kunyuramo.

Agira ati “Itandukaniro ni uko abantu bazajya bayakemura binyuze mu biganiro, abantu bicare baganire ubundi bumvikane.”

Yongeyeho ko bazajya batanga gasopo ku bazajya bagerageza guhembera umwuka w’Intambara, nubwo atavuze ikizajya gikurikiraho igihe, bitubahirijwe.

Agira ati“Icyo gucecekesha imbunda bisobanuye rero ni uburyo tuzajya dukemura amakimbirane, ubu rero tugiye gukumira amakimbirane no kujya dutanga gasopo mbere y’uko amakimbirane agera kure.”

Khabele yavuze ko yizeye neza ko umwata utaha nta mpunzi zizaba zigikurwa mu byazo kubera intambara cyangwa ubundi bugizi bwa nabi butewe n’amakimbirane akoresheje intwaro.

Gahunda ya Silence The Guns yatangajwe ku mugaragaro muri 2014 ibihugu byose bihamagarirwa kugira ubufatanye mu kuyishyira mu bikorwa.

Umuryango wa Afurika Yunze Ubumwe, ushyiraho Intego wibandaho buri mwaka. Intego y’uyu mwaka wa 2019 ikaba yerekeye, kurwanya no gukumira ingaruka ziterwa n’Ibiza, ubuhunzi n’izindi mpamvu zituma Abenegihugu bava mu byabo.

Khabele yavuze ko yizeye neza ko umwata utaha nta mpunzi zizaba zigikurwa mu byazo kubera intambara cyangwa ubundi bugizi bwa nabi butewe n’amakimbirane akoresheje intwaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza