Amezi abiri ataruhuka n’umuhate mu guhashya Covid-19 byahesheje Irakoze ishimwe rikomeye muri Canada

Yanditswe na Karirima A. Ngarambe, Muhonzire Sylvine
Kuya 17 Werurwe 2021 saa 02:21
Yasuwe :
0 0

Irakoze Paterne, Umunyarwanda w’imyaka 26 utuye muri Canada mu Ntara ya Québec, yahesheje ishema u Rwanda atabara abantu mu bihe bya Covid-19, bituma ahabwa ishimwe rihabwa abantu b’indashyikirwa bagaragaje ubwitange n’ubutwari mu bikorwa bitandukanye muri icyo gihugu.

Irakoze umaze imyaka 16 aba muri Canada yahawe igihembo cy’indashyikirwa mu byerekeye ubuzima kubera ubutwari yagaragaje afasha abantu kumenya uko bakwirinda icyorezo cya Covid-19 muri icyo gihugu, ndetse anatanga amahugurwa mu bigo bya gisirikare y’uko bakwirinda ndetse bakarinda n’abandi.

Mu kiganiro na IGIHE, Irakoze yagize ati “Covid-19 igitangira mu kwa kabiri nari maze imyaka itatu cyangwa ine nkora mu bitaro bya Institut Universitaire de Cardiologie et de Pneumologie de Québec (IUCPQ). Nshaka abantu b’inararibonye kugira ngo batwigishe uko tuzajya dufasha abantu ntibandure.”

“Twafashije abantu bo kwa muganga kumenya ukuntu bambara, ntibanduzanye kubera ko baba bafite ibintu byinshi mu mutwe, twe turinda ubuzima bwabo kugira ngo ntibagire aho bahurira n’icyo cyorezo cyangwa bakirinde bihagije.”

Irakoze yakomeje avuga ko yabaye umwe mu bantu bake bemeye kujya gufasha abatuye mu Mujyi wa Montreal kwirinda, ubwo uwo mujyi wari wibasiwe n’icyorezo.

Icyo gihe hari abarwayi benshi cyane ndetse bigera ubwo ahabwa inshingano zo gushyiriraho abantu ingamba bakwiye gukurikiza kugira ngo ubwandu bugabanuke.

We n’itsinda bakoranaga bafashaga abantu ndetse bakabahumuriza kugira ngo badahahamuka.

Irakoze avuga ko atari akazi koroshye kuko byamusabye ubwitange bukomeye, cyane ko hari kure y’aho atuye, abakozi barabuze, we na bagenzi be bagakora amasaha 17 ku munsi kandi ntibabone umunsi n’umwe wo kuruhuka.

Ibi yabikoze amezi abiri yose maze nyuma ubwandu bumaze kugabanuka asubira aho yakoraga akajya ajya gutanga ubufasha rimwe na rimwe.

Irakoze avuga ko ishimwe yahawe ryamutunguye cyane kuko na bagenzi be bitanze nkuko na we yitanze.

Ati “Igihembo gikomeye nahawe ni icya ‘Personnalité de l’année catégorie Santé’, (indashyikirwa y’umwaka mu rwego rw’ubuzima) [...] Ntabwo njyewe numvaga ko nagitsindira kuko n’abo twari kumwe, twaraganyaga ibyo bakoraga n’abo baritanze, ariko ubwo nyine abashinzwe akanama nkempurampaka baje kureba basanga ari njyewe ugomba kugihabwa.”

Irakoze Paterne avuga ko atari azi ko ibyo bihembo bibaho, ndetse ko umunsi yahamagawe ngo ajye kugifata no kuvuga ijambo kuri televiziyo yabanje kujya kubaza niba koko ibyo bintu bisanzwe bibaho, agatungurwa no kumva ko ari ibintu bisanzwe.

Agira inama urubyiruko n’Abanyarwanda muri rusange gukora nk’abikorera, bagatanga ubufasha babikuye ku mutima nta gihembo bategereje cyangwa inyungu runaka, kuko ari byo bizabahesha ishema mu bandi no ku Mana.

Irakoze Paterne yagaragaje ubutwari mu bihe bya Covid-19 ahabwa igihembo cy'indashyikirwa mu by'ubuzima/Ifoto: LaPresse.ca
Irakoze n'itsinda bakoranaga mu gutabara abantu mu Mujyi wa Montreal/ Ifoto: LaPresse.ca
Asanzwe akora kwa muganga
Yahembwe kubera umuhare yagize mu kazi ke ko kwita ku barwayi kwa muganga no gufasha abaturage kwirinda Coronavirus
Irakoze amaze imyaka 16 aba muri Canada
Irakoze yabaye umwe mu bantu bake bemeye kujya gufasha abatuye mu Mujyi wa Montreal kwirinda, ubwo uwo mujyi wari wibasiwe n’icyorezo cya Coronavirus
Yari afite akanyamuneza ubwo yiteguraga guhembwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .