Amb. Uwihanganye ku rutonde rw’abakiri bato bavuga rikijyana muri Afurika

Yanditswe na Uwiduhaye Theos
Kuya 3 Ukwakira 2019 saa 12:20
Yasuwe :
0 0

Uwihanganye Jean de Dieu uherutse kugirwa Ambasaderi w’u Rwanda muri Singapore yashyizwe ku rutonde rw’Abanyafurika ijana bakibyiruka bavuga rikijyana ku mugabane wa Afurika.

Uru rutonde rwasohotse ku wa 2 Ukwakira 2019, Amb. Uwihanganye niwe munyarwanda wenyine ururiho.

Urutonde ruzwi nka ‘100 Most Influential Young Africans’ rumaze imyaka ine rukorwa na Africa Youth Awards, rwatangajwe bwa mbere mu 2016. Kuva icyo gihe kugeza ubu ruba buri mwaka.

Ubu ruhurije hamwe abo mu bihugu 32, abagiraneza, abakinnyi mu mikino inyuranye, impirimbanyi, abahanzi, abakomeye mu itangazamakuru rigezweho, abanyapolitike n’abandi.

Prince Akpah Umuyobozi wa Africa Youth Awards, yatangaje ko muri uyu mwaka wa 2019 uru rutonde ruriho abagore 52 n’abagabo 48 baturuka mu bihugu bitandukanye bya Afurika.

Uru rutonde rukorwa kugira ngo hashimirwe urubyiruko rwagaragaje ibikorwa by’indashyikirwa mu guharanira iterambere ry’uyu mugabane no kurushaho gufasha urundi rubyiruko kwitinyuka.

Abanya-Kenya bari kuri uru rutonde ni icyenda, Nigeria ifitemo abantu 11, Afurika y’Epfo nayo 11, Ghana ikagira abantu umunani.

Kuri uru rutonde hariho amazina y’ibyamamare bitandukanye nka Burna Boy, Davido, Eddy Kenzo, Mr Eazi, Pierre-Emerick Aubameyang ukinira Arsenal, Riyad Mahrez wo muri Algeria ukinira Manchester City, Mohamed Salah wo mu Misiri n’abandi.

Uru rutonde rushyirwaho abari hagati y’imyaka 18 na 36 y’amavuko, mu mwaka wa 2018 rwari ruriho abanyarwanda babiri; Sherrie Silver, umubyinnyi ukomeye ukomoka mu Rwanda. Uyu mukobwa w’imyaka 24 yari ari kumwe na Dominique Alonga na we wo mu Rwanda washinze ’Imagine We’.

Uwihanganye yagizwe Umunyamabanga wa Leta muri Minisiteri y’Ibikorwa remezo ubwo Perezida Kagame yashyiragaho abagize Guverinoma iyobowe na Minisitiri w’Intebe Dr. Edouard Ngirente, tariki ya 30 Kanama 2017.

Yagiye kuri uwo mwanya afite imyaka 30, akaba umwe mu bagiye muri Guverinoma ari muto.

Amb.Uwihanganye Jean de Dieu afite impamyabushobozi y’icyiciro cya gatatu cya kaminuza mu bijyanye no gucunga imishinga minini y’ubwubatsi yakuye muri Kaminuza ya Manchester mu Bwongereza mu 2013.

Amb. Uwihanganye yatowe mu bantu ijana bavuga rikijyana muri Afurika
Uwihanganye niwe Munyarwanda wenyine uri kuri uru rutonde uyu mwaka
Uwihanganye hamwe n'umuryango we mu ifoto y'urwibutso na Perezida Kagame
Ubwo yarahiriraga kuba Umunyamabanga wa Leta muri Minisiteri y'Ibikorwa remezo Ushinzwe Ubwikorezi
Uwihanganye yinjiye muri Guverinoma mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza