Amavu n’amavuko ya ‘Rwanda Nziza’, indirimbo yanditswe n’abagororwa bayobowe na Munyaneza ku Karubanda

Yanditswe na Ferdinand Maniraguha
Kuya 25 Nzeri 2019 saa 04:11
Yasuwe :
0 0

Tariki ya 1 Mutarama 2002, u Rwanda rwabonye ibirango bishya birimo ibendera ry’igihugu, ikirangantego cya Repubulika n’Indirimbo yubahiriza igihugu bisimbura ibyari bimaze imyaka 39 bikoreshwa kuva mu 1962.

Mu mpera za 1999 nibwo hatowe itegeko rishyiraho ibirango bishya. Ni nyuma y’ibiganiro byo mu Rugwiro byahuje abanyarwanda b’amoko yose bategura ejo heza h’igihugu.

Guverinoma yahise itangiza amarushanwa hirya no hino mu gihugu, abanyarwanda bashishikarizwa kurushanwa guhanga ibirango bishya birimo ibendera, ikirangantego, amagambo agize indirimbo yubahiriza igihugu n’injyana yayo.

Mu guhanga imimerere y’ibendera rishya n’ikirangantego, umunyabugeni Alphonse Kirimobenecyo yatsinze bagenzi be basaga 400 bari bahanganye.

Amaso yasigaye ahanzwe abarushanwaga mu guhanga amagambo y’indirimbo yubahiriza igihugu n’injyana yayo.

Mu magana y’abahatanaga, Munyaneza Vedaste na bagenzi be batatu bari imfungwa muri gereza ya Karubanda i Huye nibo bagize amahirwe, amagambo banditse atsinda ku rwego rw’igihugu ngo abe ariyo agira indirimbo yubahiriza igihugu.

IGIHE yaganiriye na Munyaneza umaze imyaka 22 muri gereza ya Karubanda ashinjwa ibyaha bya Jenoside. Uyu mugabo yasobanuye byinshi ku buryo bahimbyemo amagambo agize ‘Rwanda Nziza’, ibihembo bahawe n’ibyiyumviro agira iyo iyo ndirimbo iririmbwe mu birori.

Indirimbo yahimbwaga nijoro…

Mu twumba two hejuru mu nyubako ishaje ya gereza ya Karubanda niho Munyaneza na bagenzi bararaga batagohetse, bajya impaka ku magambo y’indirimbo yagombaga kuranga u Rwanda mu cyerecyezo gishya.

Byatangiriye kuri Munyaneza kuko amagambo yanditse niyo yabaye aya mbere muri gereza, asabwa kwifatanya na batatu bari bamukurikiye ngo banoze neza ayo magambo maze bazaseruke nk’itsinda ku rwego rw’igihugu.

Abo bafatanyije barimo Kalisa Evariste usigaye ari umunyamakuru, Shenge Laurent umwalimu muri Kaminuza na Mbonyizina Jean Marie Vianney ukora muri Diyosezi ya Butare.

Munyaneza w'imyaka 45, avuga ko yicuza ubusore bwe yapfushije ubusa, agasaba urubyiruko gutekereza ku mahitamo rukora

Ku izuba rya saa yine z’igitondo, mu marembo ya gereza ya Karubanda Munyaneza yabwiye IGIHE ko ‘Rwanda Nziza’ ari inyito yahaye iyo ndirimbo ku mpapuro ze za mbere yanditseho amagambo agize iyo ndirimbo.

Amaze guhuzwa na bagenzi be, bamwe bashatse ko inyito ihinduka ababera ibamba abumvisha ko iyo nyito ariyo nziza ibereye.

Ati “Natangiye indirimbo yitwa ‘Rwanda Nziza’ ariko mu itangira ryayo hari amakosa nari nakoze. Abandi barambwiraga bati ibe ‘Rwanda Rwiza, Rwanda Yacu, Rwanda Rwacu, ibintu nk’ibyo. Bakambaza bati se ni Nziza nk’iki? Biba ngombwa ko tubiganiraho tubyemeranyaho ikomeza ityo.”

Bamaze ibyumweru bitatu barara badasinziriye. Mu gihe abandi babaga bagiye kuryama, urusaku rucururutse nibwo itsinda ryabo ryabonaga umwanya wo kujya impaka no gusubiramo neza amagambo banditse.

Mu mabwiriza bari bahawe, bari basabwe kwandika indirimbo izagaragaza ubumwe bw’igihugu, itarimo amoko kandi igaragaza uruhare rw’u Rwanda mu kwibohora kwa Afurika.

Ati “Ubundi muri gereza habamo urusaku, nta hantu wabona haba hatuje. Nijoro nibwo twakoraga, tugahana gahunda. Nanjye nandika bwa mbere nabikoraga nijoro, nararyamaga cyangwa nkarindira ko abantu baryama bamara gusinzira nkabona kujya mu buhanzi bwanjye, byagera nka saa saba zijoro nkabona kuryama kuko numvaga mfite ishyaka ngo tuzatsinde.”

Yakomeje agira ati “Tumaze kuyemeza twayeretse ubuyobozi bwa gereza, bayijyana mu marushanwa. Ku nshuro ya mbere sitwe twabaye aba mbere ariko amakuru twamenye nuko n’abari babaye aba mbere amanota bari bagize atari ashimishije. Ngo uwa mbere yagize amanota 69 %, twe twari dufite 65.7 %. Bafatamo batatu, ari twe ba gatatu.”

Babasabye kongera gusubiramo indirimbo yabo, babereka amakosa abiri bayinenze babasaba kuyakosora, ariko bisuzumye basanga ahubwo bakwiriye gukosora ibintu bine.

Munyaneza avuga ko mu byo bakosoye hari nk’aho bavuze ngo “Umuco dusangiye uraturanga ururimi rwacu rukaduhuza’ aho kuvuga ngo ‘umuco dusangiye uraduhuza’ kuko umuco ntuduhuza ururimi nirwo ruduhuza.”

Mu mabwiriza bari bahawe kandi, ni uguhimba indirimbo izumvwa n’umwana wiga mu mashuri abanza akumva icyo ivuze, itarenza iminota itatu.

Munyaneza ajya gusabwa kwifatanya na bagenzi be, yari yanditse amagambo y’ibika bine, amaze guhura na bagenzi be bakosora ibika bibiri bya mbere.

Mu gukosora amagambo ya ‘Rwanda Nziza’, Munyaneza na bagenzi be hari ubwo batumvikanaga bakaba bamara n’iminsi ibiri bananiwe kumvikana ku ijambo.

Ati “Byabagaho ugasanga hari ibyo tutumvikanyeho. Wenda duti ‘reka nkushishire ngobyi uduhetse’ ukumva umuntu azanye igitekerezo kimeze gutyo. Twajya gusesengura tugasanga gushishira umwana wo mu wa gatatu ntazabyumva, tugasanga ni ijambo rikomeye. Tukarijyaho impaka, ntitwumvikane hakabaho gushwana ariko tukongera tukumvikana.”

Itangazo ryo guhimba amagambo y’indirimbo yubahiriza igihugu, ryavugaga ko ku ndirimbo izaba yatsinze Guverinoma ifite ububasha bwo gukosora amwe mu magambo ayigize.

Niko byagenze kuko mu magambo agize ibitero bine bya ‘Rwanda Nziza’ Guverinoma yakosoyemo amagambo atatu.

Munyaneza ati “Hari amagambo yahindutse muyo twari twanditse mbere. Hari nk’aho twari twanditse ngo ‘Tubukomeyeho Ubuziraherezo’ ubu haranditse ngo ‘Tubukomeye uko turi twese’. Hahindutsemo amagambo atatu nubwo yose ntayibuka.”

Munyaneza ubu akuriye gahunda ya Ndi Umunyarwanda muri Gereza ya Karubanda ndetse afite gahunda yo kwandika igitabo ku bumwe n'ubwiyunge

Imyaka ibiri yashize batarahembwa

Munyaneza ni umukristu n’iyo muganira urabibona cyane cyane ukurikije uburyo avuga atuje n’amagambo akoresha.

Umunsi babwirwa ko indirimbo banditse ariyo yatsize yari yagiye kuririmba muri Kolari ‘Ingabo z’Umwami’ y’itorero ry’abadivantisiti b’umunsi wa karindwi yari muri gereza ya Karubanda.

Birumvikana akibimenya yarishimye cyane we na bagenzi be, gusa avuga ko muri gereza ibintu bihora ari ibisazwe byarangiye bakajya mu mirimo basanzwemo.

Amabwiriza yavugaga ko indirimbo yatsinze nyirayo ahembwa miliyoni eshanu. Ku mfungwa n’abagororwa, amabwiriza yabo nayo avuga ko umugororwa cyangwa imfungwa yatsinze mu marusanwa, ihabwa kimwe cya cumi cy’ibihembo yatsindiye, andi akajya mu isanduku ya gereza n’urwego rushinzwe amagereza.

Icyakora ibyo bibarwa iyo umugororwa yitabiriye amarushanwa bikaba ngombwa ko aherekezwa n’abashinzwe umutekano kandi akagaburirwa.

Munyaneza na bagenzi be bagombaga guhembwa ibihumbi 500 ukurikije amabwiriza y’amagereza, gusa we avuga ko miliyoni eshanu zose zari zikwiriye kuba izabo kuko ibyo bandikaga byose batasohokaga muri gereza, ubuyobozi bwa gereza nibwo bwabibajyaniraga ku bari bashinzwe amarushanwa.

Babwiwe ko batsinze mu 2001 ariko byageze mu 2003 amafaranga atarabageraho , bigera aho bitabaza Minisitiri w’umutekano.

Munyaneza yagize ati “Duheruka baduha sheki banadufotora birinda bigera mu 2003. Minisitiri w’umutekano, ngira ngo ni Bazivamo Christophe yaje muri gereza hari ibintu byerekeranye n’amatora , dutanga ikibazo ko tutarabona amafaranga.”

Yakomeje agira ati “Minisitiri yahise ahamagara uwari ushinzwe amagereza , amubaza impamvu amafaranga bayatanze akaba ataratugeraho. Icyo gihe hari kuwa Kabiri abategeka ko amafaranga agomba kutugeraho bitarenze kuwa Kane, ko nibaba batarayaduha uwo bayahaye na we bazamuzana muri gereza. Kuwa Kane mu gitondo nibwo batubwiye ko amafaranga yaje.”

Amafaranga yaje ari ibihumbi 500. Rya tsinda batangiye ari abantu bane ryari rimaze gukura rimaze kugira abantu icyenda. Baraganiriye uko ari bane baritangije, basanga bitaba byiza kurya ayo mafaranga bonyine, nuko bemeza ko buri umwe afata ibihumbi 71, asigaye bakayaha bagenzi babo baje mu itsinda nyuma.

Agira umunezero iyo ‘Rwanda Nziza’ iririmbwe

Buri birori bikomeye ku rwego rw’igihugu, aho u Rwanda rwaserukiwe mu birori mpuzamahanga, ‘Rwanda Nziza’ iraririmbwa.

Ni ibintu Munyaneza avuga ko atabona uko asobanura, nk’umuntu wafunzwe azira icyaha gikomeye ariko akaba yaragize uruhare mu kintu gihabwa agaciro ku rwego mpuzamahanga.

Ati “Iyo mbyumvise biranshimisha, nkibuka ndyamye , ukuntu ntasinziraga nkumva biranshimishije, nkumva igikorwa nakoze kiranejeje.”

Uyu mugabo wakatiwe gufungwa imyaka 30, ni we ushinzwe ibikorwa bya Ndi Umunyarwanda muri gereza.

Yemeza ko yakosotse ukurikije ibyaha yakoze, ariyo mpamvu yumva akwiriye kugira uruhare mu bikorwa bikosora abandi.

Ati “Ntabwo wakosora abandi utikosoye mu mutima wawe. Gukosoka kwa mbere ni ukwemera ko wabaye umunyamafuti, ugwa mu cyaha. Iyo umaze kwisubiraho rero ugomba gukosoka ngo ufashe n’abandi bakosoke kugira ngo icyatumye tuba muri gereza kirangire.”

Munyaneza avuga ko afite na gahunda yo kwandika igitabo kivuga ku nzira yanyuzemo n’uburyo yahindutse, gusa akazitirwa no kuba nta mikoro.

Aricuza ubusore bwe yapfushije ubusa

Mu mwaka wa 2005, Munyaneza yari afite imyaka igera kuri 30. Kuko yari yarafunzwe nta dosiye agira, byabaye ngombwa ko afungurwa agasubira iwabo mu Matyazo ya Butare mu buzima busanzwe.

Ubwo yafungurwaga, nibwo imirimo y’Inkiko Gacaca yari irimbanyije, abafite ibyo bazi kuri Jenoside yakorewe Abatutsi basabwa kubivuga abayigizemo uruhare bakabihanirwa.

Munyaneza yari afite inkomanga ku mutima kuko yari azi uruhare yabigizemo, ariko akagira ubwoba bwo kujya kwitanga ngo yongere afungwe.

Yakomeje guceceka, hashize igihe aza gushaka umugore. Mu gihe yari amaze iminsi icumi arongoye, amakuru yaratanzwe ko na we yagize uruhare muri Jenoside, Inkiko Gacaca iwabo ziraperereza zisanga nibyo zihita zimukatira gufungwa imyaka 30.

Umugore we amuheruka ubwo bamaze iminsi icumi babanye gusa ngo yaje kumva ko yaje kwishakira undi mugabo. Imitungo ye ntazi irengero ryayo kuko atongeye gusubira uwabo.

Munyaneza yabwiye IGIHE ko yicuza imyaka ye y’ubusore yapfushije ubusa, aho gukora ibimwubaka bikanateza imbere igihugu, akajya mu bigisenya byanamusenyeye ubuzima.

Ati “Iyo umuntu atitonze mu gihe cy’ubusore bimubyarira ingaruka mbi , arahamugarira. Niba narafunzwe mfite imyaka 20, nkaba ngejeje 45, nabwira urubyiruko kwitonda kandi ntibakurikirane icyo babonye cyose kibajyana mu bintu bibi. Habemo kugisha umutima inama, nta kwihuta ngo abandi baragiye reka nkurikire.”

Ibyo ngo bituma akora uko ashoboye ngo akosore ahahise he nubwo bitavanaho ingaruka mbi byagize.

Indirimbo nshya yubahiriza igihugu “Rwanda Nziza’ Munyaneza yagizemo uruhare igaragaza ubutwari, umuco w’u Rwanda no gukunda igihugu biranga abana barwo.

Nubwo Munyaneza na bagenzi be bari bayihaye amajwi, injyana nyayo Rwanda Nziza ifite uyu munsi yahimbwe na Capt Jean Bosco Hashakimana wo mu muri Army Jazz Band y’ingabo z’u Rwanda.

Amagambo ya Rwanda Nziza yanditswe na Munyaneza na bagenzi be, niyo yabaya aya mbere bahembwa miliyoni 5 Frw, bafata ibihumbi 500 Frw
Munyaneza avuga ko amagambo ya Rwanda Nziza bayandikaga nijoro kuko ku manywa muri gereza habaga hari urusaku
Amagambo agize 'Rwanda Nziza' Munyaneza yayahimbiye muri Gereza ya Karubanda ari nayo akibarizwamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza