Amasoko ya leta agera ku 2000 yatanzwe hifashishijwe ikoranabuhanga mu mezi atandatu ashize

Yanditswe na Evariste Nsengimana
Kuya 10 Mutarama 2018 saa 07:19
Yasuwe :
0 0

Ikigo cy’Igihugu gishinzwe gutunganya amasoko ya leta (RPPA) gitangaza ko intego zacyo zo kwifashisha ikoranabuhangamu kuyatanga (e-procurement) zigenda zigerwaho, kuko kuva muri Nyakanga 2017 , amasoko amaze gutangwa agera ku 2000 n’uburiganya bwagaragaragamo bukaba bwaragabanutse.

Muri Kamena 2016, nibwo umushinga wa e-procurement watangiriye mu bigo umunani bya Leta birimo Minisiteri y’Imari n’Igenamigambi (Minecofin), iy’Ubuzima (Minisante) iy’ibikorwaremezo (Mininfra), Ikigo cy’Igihugu cy’Iterambere, (RDB), Ikigo gishinzwe iterambere ry’Ubwikorezi(RTDA) n’igishinzwe ubuzima (RBC) hakiyongeraho uturere twa Gasabo na Kicukiro.

Nyuma y’aho bigaragaye ko igerageza ry’uyu mushinga ryagenze neza, guhera muri Nyakanga 2017 izi serivisi zagejejwe mu bigo byari bisigaye.

Mu kiganiro RPPA yagiranye n’itangazamakuru kuri uyu wa 10 Mutarama 2018, Umuyobozi w’umushinga wa e-procurement, Migambi Richard, yavuze ko kuva muri Nyakanga kugera mu Ukuboza umwaka ushize, amasoko 1906 yatangajwe agapiganirwa na ba rwiyemezamirimo basaga 3000.

Yagize ati “Kugeza ubu amasoko 1906 yaratangajwe; ni imibare yo mu Ukuboza ariko ubu ashobora kuba yariyongereye akagera ku 2000. Yatangajwe hifashishijwe ikoranabuhanga. Muri ayo, 1313 yamaze gufungurwa […] Ikindi muri amwe yafunguwe, hamaze kunyuramo amasezerano yasinywe 839, ibitabo by’amapiganwa byatanzwe na ba rwiyemezamirimo bigeze ku 7254.”

Migambi yanasobanuye ko ubu buryo bwatanze umusaruro ukomeye mu kugabanya impapuro zikoreshwa mu gutanga amakuru no kugabanya igihe ba rwiyemezamirimo bakoreshaga mu kuyageraho n’uburiganya burimo nko kwigana kashi n’ibindi bishobora gutuma umuntu abona isoko atarikwiriye.

Umuyobozi w’ishami rishinzwe kongera ubushobozi muri RPPA, Sibomana Célestin, yavuze ko iryo koranabuhanga ryashyiriweho kugabanya ruswa kandi ko bigenda bigerwaho nubwo atari 100%.

E-procurement, ni ikoranabuhanga ryatangijwe na Minecofin ku bufatanye n’Ikigo gishinzwe amasoko ya leta (RPPA), rikaba ryitezweho gukemura ibibazo bitandukanye birimo ikoreshwa ry’impapuro na ruswa mu masoko ya leta.

Kugira ngo rwiyemezamirimo cyangwa ikigo cy’ubucuruzi kibashe gupiganira isoko cyangwa kuritanga gikoresheje e-procurement, kibanza kwandikisha umukono w’ikoranabuhanga (e-signature), binyuze muri RDB.

Amakuru yose arebana n’amasoko ari gupiganirwa, ayatsindiwe, n’ajyanye no kohereza inyandiko n’ibindi, agaragara ku rubuga http://www.umucyo.gov.rw

Umuyobozi w'Ishami rishinzwe konera ubushobozi muri RPPA, Sibomana Célestin yashimye umusaruro w'ikoranabuhanga mu masoko ya leta
Umuyobozi w’umushinga wa e-procurement, Migambi Richard
Abanyamakuru bitabiriye ikiganiro na RPPA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza